]]>
خواطر :
انساك ! ده كلام ؟... اهو ده اللي مش ممكن ابدا...   (بلقسام حمدان العربي الإدريسي) . 

والدي

بواسطة: محمود خالد الخريسات  |  بتاريخ: 2016-10-23 ، الوقت: 06:25:46
  • تقييم المقالة:
الو.. هلا يابا
وينك محمود..
بالدار يابا..
طيب اسمع انا هيني قريب من الدار عند دكانة غزال تعال، جاي عبالي امشي وانا وياك...
يلا يابا دقيقتين وبكون عندك..
يما بدك اشي رايح عالدكان ابوي هناك...
خير شو في...
تقلقيش يما شكلو بدو اساعدو باغراض الدار
طيب جيبو معكو خبز...
حاضر يما... كان ضايلي بهظيك الايام كم شهر وبتخرج من الجامعة كنت بدرس محاسبة بالاردنية وعشان اجيب معدل جيد لازم كل موادي بالفصل انزلها B+ وعاهدت وقتها نفسي انزلهم كلهم هيك بس مع اول امتحان فيرست ناسي شو هي المادة جبت 5 من 20 فاحتمال B+ اختفى
هون خلص بعتها منا باي ديفولت رح انجح فيهم وبما انو راح امل ستريت B+ 
طقعت وكنت مش مصدق متى يمروا الاشهر عخير واتخرج بمعدل مقبول
واخلي ابوي يدبرلي واسطة مع اني بعرفو بحبش هاي الشغلات بس قلت انا اكبر ولاده اكيد رح يدبلي اشتغل بالمطار معاه.. هلا يابا يعطيك العافية...
لويش طولت....
منتا بتعرف امي عملتلي تحقيق...
طيب تعال خنقزدر كيف جامعتك...
الحمد لله بخير
بتدرس مليح صح؟ ورح تتخرج جيد...
اه طبعا يابا ان شاء الله برفع راسك
زي ما رفعت راسك بالتوجيهي...
والله يا ابني بدي انتا ترفع راسك لأنو صدقني دراستك الك، بكرة بتدخل مجال الشغل وبتفهم شو يعني شغل شو يعني حياة شو يعني مسؤولية شو يعني تتعب عشان مرتك عشان ولادك
بدي اياك تدير بالك عأمك...
يابا ليش بتحكي هيك مالك...
بدي اياك تدير بالك عحالك تمسك ايدك ما تكون مصرفجي انا بعرفك
ما تطلع بس قدام رجليك تطلع ابعد من هيك
انا بعرفك انتا اوعى واعقل من اخوك
بدي اياك تدعكو معاك هو بعدو مغمض انتا عالقليلة مريت بتجارب اشتغلت بمطعم اشتغلت توزيع جرايد اشتغلت باكثر من شغلة هو بعدو بدو شد وهو ما الو غيرك بهالدنيا انا قربت نهايتي....
لا يابا تحكيش هيك لا قدر الله الله يطول بعمرك ويخليك فوق روسنا ما النا غيرك..
مهاظ الي بدي اوصلك اياه ما بدي تكونو ما الكو غيري بدي تعتمدو على حالكو و........ هو كان يحكي وانا سرحت قلت ايه! شو الكلام الي بسولف فيه، ابوي صغير بعدو ما كمل 47 سنة بعد شهر بصير 47 وبحكي زي هيك كلام
غريب..
فهمت علي يابا....
اه طبعا
ايه نسيييييت....
خير...
امي قلتلي اجيب خبز....
لسا عقلك مش مساعدك
روح جيب لحالك انا تعبت سابقك عالدار....
حاضر يابا سلام  بعد كم شهر... اتخرجت وزي ما كنت متوقع ما جبت ال B+ ابوي دري بس حسيتو ما تبع
خلصت جامعة بثلاث سنين ونص
صحابي بعدهم ضايلهم فصل
اول ما تخرجت ما خليت شركات الا 
وقدمتلهم السيفي
كنت المح لأبوي عالشغل انو يدبرلي هو يحلقلي بالعقل
يقلي بدي اياك تعتمد عحالك
طبعا بعد ما اتخرجت صرت مسؤول عن حالي مادياً انقطع المصروف
وكنت محوشلي كم قرش وقربو يخلصو
قلت بزبطش معي هاظ الوضع ومستحيل اطلب من ابوي مصاري مش لأشي
بس مبدأ انو انا استقليت بغض النظر لسا ما اشتغلت
بس بتعرفو عزة النفس الزائفة
بهاظ الوقت لازم اشفلي شغل مؤقت لو بالمول سيلز او اي اشي
دبرت حالي واشتغل بليفايس محل اواعي مشهور
كنت ابعث سيفيات المساء او اذا كان شفتي مسائي ابعث الصبح وبيوم الاوف اقابل الشركات واغلبهم كانو بدهم موظفين بخبرة
مهو كيف بدك تجيب الخبرة وانتا فريش
ما علينا بصراحة حبيت الشغل بليفايس كانو يعطوني مبلغ محرز خاصة مع الكوميشن
مر علي شهرين وفش اشي جديد
يوم من هالايام روحت من الشغل
كيفك يما...
الحمد لله...
شو طابخة ميت جوع...
لسا ما جهز الاكل...
ول الساعة سبعة خير....
والله يا ابني من الصبح بحضر الشناتي واصلا ابوك متأخر بشغلو اليوم... خير شناتي مين مسافر
العب يا كبير...
لا يا زلمة ابوك نازل كم يوم عندو دورة بابو ظبي مع الشغل....
اها كم يوم رح ينزل...
بجوز اسبوع...
ووين رح يترك سيارتو...
محمود من هسا بلشنا.... 
لا مش هيك يما بس بتعرفي بخلينيش اسوقها
وزهقت من اللانسر...
خص اهدى بس يجي اسألو...
لا طبعا ما رح اسألو ما رح يرضى... السلام عليكم...
هلا يابا يعطيك العافية...
شو رح تجبلي من ابو ظبي....
شو رح اجيبلك يعني، رح اجيبلك حالي..
هههه لا يابا مش هيك قصدي ان شاء بتيجي بالسلامة
ماعلينا اوصلك عالمطار...
اه جهز حالك طالع عالفجر طيارتي عال 7 الصبح....
ما في مشكلة يابا
اوصلك بالشفر اه....
اه...
تؤمر يابا...
نمت وانا متحمس بدي اسوق سيارتو خاصة انها موديل السنة
وانا كنت فايع وقصص ما علينا صحيت عالفجر لقيتهم نايمين
صحيتهم يلا يابا انا 10 دقايق بكون جاهز
صليت الفجر ولبست اواعي الشغل
ورحت احمي السيارة حملت الشناتي وبس اجا ابوي كنت بلف حولين السيارة
قلي شو بتعمل..
قلت بتفقد اذا فيها نقرات قبل ما اسوقها عشان لما ترجع ما تتهمني...
طيب يلا اركب تأخرنا...
بالطريق قعدنا نسولف بشكل عام مواضيع عادية
وصاني عالبيت وقلي دير بالك وانتبه عسواقتك
قلتلو رح اعمل دوامي صباحي عشان ما اتاخر عأمي
وصلنا المطار نزلتلو الشناتي واجيت بدي اعبطو اودعو بس ما خلاني قلي بتعرفني بحبش قصص الوداع
صرت اضحك وقلتلو تروح وترجع بالسلامة وقلتلو رح اداوم اليوم بالسيارة لأنو بلحقش ارجع عالبيت اجيب سيارتي
قلي طيب بس بتصفها محلها وما بتسوقها قلتلو ولا يهمك يابا
سلام
سلام روحت عدوامي زي اي يوم عادي بس طبعا ما خليت حد الا وشافني وانا وسايقها حتى وصلت مديري فيها رجعت المساء عالبيت امي حطتلي لقمتين وكنت متفق اطلع انا وصحابي
بس اخذت سيارتي وصفيت سيارة ابوي
طلعت انا والشباب تعشينا وسهرنا انبسطنا
وتأخر الوقت قلتلهم شباب تعبان بدي اروح من الفجر صاحي كنت انا واثنين من صحابي واحد كان جنبي وواحد وراي كنت نازل باتجاه حارتنا وجاي الشارع عنزول انا حال الجير ومدحل السيارة عاساس بوفر مصاري راتبي كان كمان يومين بنزل
ماخذ اقصى اليمين عشان الي بدو يتجاوز عني ما ادايقو...... خلينا نرجع كم سنة لورنا قبل ما اكمل نجحت بالنظري كنت أقدم بترخيص السلط أبوي طالع عدوامه والي يومين اترجا شفلي واسطة
بس زي ما حكتلو قبل ابوي بحبش الواسطات
يابا توصلني بطريقك عالدوريات وانا بكمل عالسلط
شو اليوم امتحانك السواقة
اه يابا طيب شو وضعك
قد حالي ان شاء الله رح يطلع معي صاحبي
مو مشكلة يلا اطلع حمي السيارة
يابا بصير تشوفلي واسطة مش لأشي بس كثير بدققو وبتعرفني قديش محتاج الرخصة وتغلبت مواصلات كل يوم عالجامعة
واصلا عنا سيارتين وفش غيرك بسوقهم لازم اخفف عنك
قعدت عشر دقايق احزنوا عحالي
قلي اسمع
اه يابا وانا متحمس
بشوفلك واسطة بس بشرط
أؤمرني
تحلق شعرك
طبعا كحال جيلنا ب 2007 كان موضة الواكس والشعر الطويل والسشوار
وابوي ما عمرو اعترض او كان يتركنا عراحتنا مع انو جيل أباءنا ما كان عاجبهم هاظ الاشي
ترددت لثواني وفكرت سريعا قلت الشعر برجع يطول بس الرخصة صعب تاخدها من اول مرة
قلتلو ماشي بعد ما اروح من الترخيص عالحلاق
حكى تلفون وتمت المهمة واخذت الرخصة ورحت عالحلاق
الكل بعرف انو السواقة بالممارسة وكل ما سقت أكثر كل ما خبرتك زادت وكنت مأمن بهاظ الاشي
وابوي برضو خاصة انو طلع معي أكثر من مرة يتأكد كيف سواقتي
فلما دبرلي الواسطة عارف إني بعرف اسوق

اول يوم الي بالجامعة بالسيارة
كان شعور خرافي بعرفش ليش بس انا كنت أحب اللانسر
خاصة بأحلامي المستقبلية بدي اعدلها تصير ايفاليويشن وتهبيط ومن هالقصص
طبعا حارتنا في الي أكثر من صاحب معي بالجامعة وعشان ابين انو معي سيارة سقت بالطرق الي بمشي فيها الباص الي بروح عالجامعة عشان اعمل حالي شفت صحابي بالصدفة واركبهم معي
لميت أربع شباب غيري ورحنا عالجامعة كنت شوي متوتر وبنفس الوقت ما بدي ابين هيك
وصلت بارك التجارة وقفت عند المقص بدي ادفع الأجرة نص دينار
كان الموقف مشكل من طوابق وساحة خارجية
قررت إني أصف بالساحة الخارجية بديش افوت طوابق وانعجق وانا بصف
مباشرة دفعت الأجرة ولفيت عاليمين
ولا اسمع صوت حديد بنشخط نعجقت الشباب قلولي خبطت بعمود صغير
ما نزلت من السيارة مباشرة رجعت ريفيرس وقدمت بعدين لفيت عاليمين
نزلنا كلنا نشوف شو صار بالباب طبعا الباب اتدمر
صرت أسب قال علي حط العمود لو انو أطول كان شفتو
كل هاي التبريرات عشان ابعد الاحراج عني قدام الشباب
طبعا الشيطان وسوسلي قلي عين الشباب الي طلعتهم اكيد نقو عليك
ما علينا هسا همي اصلح الباب من مصروفي
طبعا عطلت من الجامعة
ودبرت اموري نزلت عالبقعة وصلحت الباب ودهان جديد ولا كانو في اشي
حتى الدهين قلي لا تغسلو السيارة بمي بأثر على الدهان
طبعا انا روحت عالدار وضليت قاعد برة خايف يجي الي بغسل السيارة ويخرب الدهان
ومر اليوم بسلام لاحد شاف ولا حد دري
وضليت باقي الاسبوع اشحد بعد الي دفعتو..
تقريبا هاظ كان الحادث الوحيد
الي عملتو والحق علي... خلال فترة دراستي بالجامعة كنت اواجه مواد صعبة ومواد سهلة وامشي حالي معدلي عالافاريج بس في فصل من هالفصول كان من أصعب الفصول الي مرو علي دراسيا ابوي الو فترة بشكي بوجع صدروا راح فحص طلع عندو شرايين مسكرة ولازم يعمل قسطرة واتطور الموضوع وطلع لازم يقعد بالمستشفى وفي شريان مسكر وما زبط بالقسطرة ضل يفوت عالمستشفى ويطلع وهاظ اشي غريب بعيلتنا أغلب عيلتنا شباب وما عمرنا دخلنا مستشفيات كل العيلة وقفت معنا طبعا هاظ أثر عمستواي خاصة انها الفترة تزامنت مع امتحاناتي بالجامعة وماكنت ادرس وكنت منزل 5 مواد متوقع ارسب ب ثنتين على الأقل مع انو ابوي كل ما أوصل امي على المستشفى يقلي روح ادرس همك الأول دراستك كنت أرد عليه على مضض وبس طلعت نتيجتي كان ابوي قايم بالسلامة بحمد الله وطلعت راسب بثلاث مواد للأسف يعني 9 ساعات حاول عمي يوصل لأبوي بطريقة غير مباشرة انو الشباب اكيد تأثرت دراستهم باللي صار بس ابوي أنكر قال لأ ما تأثرت ورح يجيبو علامات عالية زي منا متوقع أنا هون ما كان بأيدي الا اشي واحد انا ادفع حق التسع ساعات من جيبتي والحمد لله أم زميلتي بالجامعة كانت كثير طيبة قلتلي بعطيك المبلغ كامل وسدني اياه على دفعات وبالفعل اخذت المبلغ كامل وكل أسبوع اعطيها 20 دينار مع إني كنت أصفي عالحديدة خلال الأسبوع بس ما باليد حيلة ما كان بدي ابوي يعرف وبنفس الوقت بدي اتحمل التكلفة لحالي مشي الوقت وتخرجت والحمدالله ما عرف ابوي بقصة المواد الي رسبتها وزي محكيتلكم باول القصة بعد ما وصلت ابوي عالمطار وبعد ما خلصنا طلعتنا انا والشباب وكنت مروح باتجاه البيت
وماخذ اقصى اليمين عشان الي بدو يتجاوز عني ما ادايقو.... كنت اتطلع عصاحبي الي جنبي وبنضحك
ولا فجأة اسمع صاحبي الي قاعد ورا بقلي بصوت في خووووف ورجفة.... اوووووووعك ما كمل الكلمة الا لفيت وجهي باتجاه السير فلقيت بوجهي باص صاف فبجزء من الثانية رفعت الهاند البريك ما لحقت ادعس بريك
بس المفاجأة اني لما رفعت الهاند بريك كانت السيارة واقفة من الضربة زي الحلم بالزبط
يعني على سرعة تقريبا 70 خبطنا بالباص الي واقف
بس الحمد لله الباص كان كثير كبير
وكان واقف فوق مطب فخلا يرتفع
فكانت الضربة اغلبها بغطاء الصندوق
ما كنا حاطين حزامات امان للاسف
بس انا مسكتي للستيرنغ منعت عني الضرر صاحبي الي جنبي خبط راسو بالقزاز ما صار في اشي الحمد لله بس انكسر القزاز
والي ورا خبط بالكرسي تاعي كسر القواعد تاعونو
الحمد لله قمنا الثلاث بكل سلامة تفكيري الوحيد كلمة أبوي الي "اعتمد عحالك" ضلت تتردد فبالي اجت الشرطة وعملوا كروكا والناس الي التمت روحت ضليت انا وصحابي السيارة ما بتشتغل طبعا بس بما انو احنا قريبين عند دكانة غزال دحلناها دحول وصفيناها هناك ما خبرت أمي وطبعا كنت حاط ببالي أصلح السيارة قبل ما ابوي يرجع قلت بدي إياه يرجع وسيارتي فيهاش اشي وبخبروا بالقصة ثاني يوم صحيت من الصبح نسقت مع ونش وديتها عماركا اخذت سيارة ابوي وتحايلت عأمي رحت عواحد معلم تجليس ودهان وبعرف ابوي قلتلو القصة وقلتلو معاك بس أربع أيام وقد ما بدك بدفع بس كمان يومين تا ينزل راتبي بدي تخلص السيارة قبل ما يجي ابوي رحت جبتلو كل القطع وكنت كل يوم اروح عندو الصبح اشيك وين وصل وهو ما كان مقصر بمساء يوم الاربعاء ابن عمتي بسوريا ببعثلي مسج بالليل بدو رقم ابن عمة ابوي انا هون خف عقلي معقول ابوي عرف او حد خبرو إني ضربت السيارة ابن عمة ابوي بشتغل بقطع السيارات وخاصة نفس قطع سيارتي بلشت اخبط اخماس باسداس لا مو معقول طيب ليش بدهم الرقم بديش اسأل خليني اعطيهم ولا كأنو في اشي أصلا بكرة رح استلم السيارة وللأسف ما حكيت ان شاء الله وابوي بعد بيوم رح يجي. نمت ثاني يوم برن علي زوج خالتي الساعة 7 الصبح ايه غريب ليش برن هسا اطنش ولا ارد خليني ارد
الو...
الو مرحبا محمود...
هلا عمي...
شو بالبيت انتو...
اه بالبيت...
طيب انا في عندي شغل قريب منكم ومعاي خالتك بدي انزلها عندكم صحي أمك...
اهلا وسهلا عمي يلا هسا بصحيها سلام... يما يما
قومي خالتي جاي عنا...
خير ...
لا فش اشي بس عمي أبو سمير عندو شغل قريب وبدو ينزل خالتي عنا... قامت امي وقلتلي طيب قوم انتا روح جبنا فطور... يلا يما بس ييجو وضليت متمدد
اجت خالتي راحت امي تستقبلها
وفجأة اسمع صراخ وعياط
ايه خير شو في بسم الله الرحمن الرحيم نطيت من الفرشة وركضت عالصالون الاقي الكل ببكي خالتي امي اختي اخوي زوج خالتي ولاد خالتي ولكو شو فيه...... ايش في مالكم
ابوك
مالو ابوي أبوك مات
ابوك مات يا محمووووووووود واسمع هالكلمة واتجمد محلي تيجي خالتي تعبطني انا ولا حركة ولا كلمة بجوز ولا نفس كمان
امي وقعت عالارض ولاد خالاتي يمسكوها
خالتي شافتني بهالصدمة ضربتني كف قلتلي عيط محمود عيط
كل الي حكيتو إنا لله وإنا اليه راجعون ما عرفت شو اعمل
رحت عالغرفة مسكت القرآن
رديت حطيتو ورحت عند امي هديتها
انا بعدني بالصدمة عيوني ما دمعو بجوز كنت متخيل حلم او ربي صبرني بعرفش شو صار بعد دقيقتين خالي اجا فات علينا كان بعيط ودموعو نازلة من الشارع اول ما طل ركض علي وهو بعيط وعبطني هون انا ما قدرت امسك حالي دموعي ما وقفو راسي بدو ينفجر مش متخيل الي صار معقول...
كيف مات ابوي...
ليش مات...
بعدو صغير... 47 سنة
لا إله الا الله وإنا لله وإنا إليه راجعون بلشو يجو الناس حاولت امسك حالي عشان اشد من ازر امي المسكينة بس مع كل واحد عزيز يفوت علينا وما اكثرهم كنت أضعف اجو قرايبنا وصاروا يتفقوا كيف ترتيب العزاء برضو زي الحلم بعرفش كيف نمت هظيك الليلة ولاد خالاتي ما قصروا معي شدوا من ازري وانا وقفت مع امي.. الدورة كانت بابو ظبي وكان أبوي من الموظفين المجتهدين وعندو شهادات ودروع من المطار في النا عمة بدبي خلص ابوي الدورة بأربع أيام وقرر يروح عدبي يزور اختو الو أربع سنين مش شايفها
عزمتو وانبسطو مع بعض حتى صار يحكيلها عنا وقديش بحبنا وفخور فينا وودعها لأنو ثاني يوم رح يسافر وروح عالفندق وكانت اخر ليلة الو بالدنيا. رحمة الله عليه كان كل اشي بحياتي كنت فخور فيه كنت اعشقو بكل حالاتو بفرحو بغضبو بطيبة قلبة بعصبيتو بعفويتو
كان عزوتي وسندي وفرحي وكل اشي بحياتي وصدقوني يا اخوان مكانة الاب غالية ودايما الاب ما بتمنى حد يكون احسن منو الا ابنو ان شاء الله أكون الولد الصالح الي بدعي ربي لوالدي الله يرحمه ويغفرله اللهم أجعل قبره روضة من رياض الجنة ولا تجعله حفرة من حفر النار، اللهم مد له في قبره مد بصره، اللهم أنزل على قبره الضياء والنور والفسحة والسرور، اللهم أفسح له في قبره ونور له فيه برحمتك يا أرحم الرحمين. اللهم إن أبي في ذمتك وحبل جوارك، فقه فتنة القبر وعذاب النار وأنت أهل الوفاء والحمد لله، اللهم أغفرله وأرحمه إنك أنت الغفور الرحيم. اللهم إنه في ضيافتك، فهل جزاء الضيف إلا الإكرام والإحسان وأنت أهل الجود والكرم، اللهم أستقبله عندك خالياً من الذنوب والخطايا، وأستقبله بمحض إرادتك وعفوك وأنت راضٍ عنه غير غضبان عليه برحمتك يا أرحم الرحمين اللهم إغفر لوالدي وأرحمه وعافه وأعف عنه وأكرم نزله، ووسع مدخله وأغسله بالماء والثلج والبرد، ونقه من الخطايا كما ينقى الثوب الأبيض من الدنس، وأبدله داراً خيراً من داره، وأهلاً خيراً من أهله، وأدخله الجنة بغير حساب وأعذه من عذاب القبر. أخواني لا تنسوه من الدعاء ولا تنسو البر بوالديكم ربنا وصانا فيهم
ابنه البار محمود
أبا خالد
« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق