]]>
خواطر :
اسقيني كاس من رحيق ذكرى وجودك ... لا تتركيه يجف ،كلما جف الكأس ازداد الحنينُ...و لا يطفي شعلة الفؤاد سوى كأس الحنين...   (بلقسام حمدان العربي الإدريسي) . 

بابا حبيبي

بواسطة: عمرو هارون  |  بتاريخ: 2014-11-21 ، الوقت: 23:02:06
  • تقييم المقالة:

بابا حبيبي 

رحت فين ؟ طمني .. !

بقالك كتير مش بتكلمني 

هو انت لسه زعلان مني ؟!

 أصلك مبتسأ لش ؟

 

لسه يا بابا بعيد  .. مش هتزورني قريب ؟!!

طيب خليك مكانك .. أنا عارف عنوانك 

أجيبلك إيه معايا يا درش ؟

هو الدوا لسه مخلصش ؟!

إيه رأيك في بسبوسة ؟

وأعمل لك شاي مظبوط .

مع كيكة وشوية بسكوت

ولو حابب عسل وفطير

وانزل معاك اتمشي .

 متخافش ..      

مش همشيك كتير.

بس ياريت نتعشي

بقالي فترة مبكلش !

 

وحشتني وواحشني كلامك  ..

 فاكر لما كنت صغير

وكنت بحب أمشي أدامك

وتفضل عليا تدور !

ولما كنت بتسافر الصعيد , وتركب القطر

وتقولي خليك إنت بعيد..

تعالي بس وصلني , وقولي أخبارك في سطر ..

 بس ياريت متطولش !

 

طيب فاكر لما كنت ببوسك .. وتقولي خلاص كفاية

روح ذاكر , وركز في دروسك .. عشان تبقي شاطر

 حااجاتك لسه موجودة .. عبايتك , وعصايتك , وشنطتك , وصورتك , ودولابك ..

لسه حبك جوايا .. عايش مامتش .

 

فين بقي اللعب و الفوانيس ؟!  و فين الكيس ؟!

بتاع الشيبسي واللبان  , واللب الأبيض ,  والسوداني

فين العجلة اللي قلت لي هجيبهالك ؟! 

 متقوليش أصلي خايف عليك .. مش هجيبهالك !

طيب وعربيتك  ؟! اللي قلتلي هديهالك ..

عشان تبقي أدام صحابك .. واحد فييس ..

 وياريت متقولش .!! خدها مشْي أو اركب اتوبيس..

ده هيوصلك في ثواني !

 

لسه فاكر آخر سلامي  , وفاكر ابقى اسمع كلامي .

كنت بعاند وبهرب

بس كتير كنت بتعذب .

لما تقولي روح و جرب. بس امشي من أدامي

مسيرك في يوم تقرب.

 

ولما أرجعلك بآلامي  ..

وأقولك عندك حق  ..

 إنت صح وأنا لأ !!

تاخدني في حضنك وترق , وتمسحلي كل أحزاني.

 

أقولك على سر..

 أنا كتبت كتير عليك  .. بس كلامي مبيكملش !!

ألاقي نفسي ببكي ومستحملش

عارفك  هتقولي الرجل مبيعيطش !!

هقول لك يا بويا متقلقش  ..

محدش شاف دموعي  .. بخبيها ومبتظهرش

ولو حد شافني

 هقول له عينيا  مبتدمعش  !!

كل الحكاية  .. إني بس

بقالي يومين تلاتة

 مبنامش ..!!

 


... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق