]]>
خواطر :
متعجرفة ، ساكنة جزيرة الأوهام ... حطت بها منذ زمان قافلة آتية من مدينة الظلام...الكائنة على أطرف جزر الخيال...   (بلقسام حمدان العربي الإدريسي) . 

سيدي طه المختار

بواسطة: تاجموعتي نورالدين  |  بتاريخ: 2014-09-15 ، الوقت: 23:24:27
  • تقييم المقالة:

                             سيدي طه المختار

 

 

سيدي طه  المختارْ  ..................  زادْ  قدركْ عْدادْ

سيدي طه  المختارْ  .................. جادْ  فهْمكْ  وفادْ

سيدي طه  المختارْ                   يا  سرْ الله الستّارْ

سيدي طه  المختارْ                   يا  سرْ الله الغفّارْ

 

فضْلكْ همّهْ وْ شانْ                         توّجْ   مْنارْ   لدْيانْ

قوْلكْ صْدقْ  وْ بانْ                         سيّجْ  غْيارْ  لعْديانْ

صبركْ فرّجْ وْ حانْ                         بهّجْ  فكارْ   وْعيانْ

فعلكْ  زيّنْ  وْ زانْ                         بلّجْ   مْرارْ   لدْرانْ

 

 سيدي طه المختار                    يا سر الله الستار

سيدي طه المختار                     يا سر الله  الغفار

 

طاعتك مْزيهْ بهْراتْ                        ليها  الركبانْ شهداتْ

ساعتك هْدية تّوْحاتْ                        فيها  لكوانْ  سبْحاتْ

حْكمْتكْ بْرية  تّقراتْ                        فيها   لجْنانْ  لوحاتْ

رايتكْ بَاهْيهْ صعداتْ                       فيها   ألْوانْ    نفْحاتْ

 

سيدي طه المختار                    يا سر الله الستار

سيدي طه المختار                    يا سر الله  الغفار 

 

 

بقلم : ذ تاجموعتي نورالدين .

 

     

                   الحاج فروج , الهابط فالدروج .

الورقة التقنية :

يقوم بتشخيص هذه المسرحية الهزلية ..  15 ممثلا :

الحاج فروج { دور محوري } وعائلته المتكونة من :

سعاد : الزوجة           مليكة : البنت           العربي :  الولد

قنداش { دور محوري } وعائلته المتكونة من :

خدوج: الزوجة           حليمة : البنت               حماد : الولد

حميدة : نادلة بالمقهى                    كرديسة : زبون بالمقهى

أحلام : مخبرة شرطية                 عنصران من الأمن الخفي

طامو : الجارة                                         المرأة الملثمة .

 

المسرحية تدور في قالب كوميدي , حيث تثير إشكالية

تغلغل فكر الدجل والشعوذة , في بعض الأوساط الاجتماعية مما يدفع متعاطيه في البحث عن حيل للنصب على

الناس بل ويدفع في البحث عن متواطئين ومتآمرين لتأكيد إنجاح فرص النصب والاحتيال على المغفلين .

كما ان المسرحية تسلط الضوء على أن هذا السلوك قد يتبناه حتى بعض المثقفين اللذين لا يتورعون في الأخذ

بأسبابه.

من هنا ولأهمية هذه المواضيع كان من الضروري إيجاد صيغ كلامية منطقية ؛ منها ما يناسب تلك الثقة

العمياء عند ولوج عالم الشعوذة والدجل عند بعض الناس ومنها ما يناسب السخرية في بعض العلاقات التي

أصبحت مترهلة عند البعض الآخر داخل المجتمع  .

                                             المؤلف تاج نورالدين .                 

 

        

 

                                            الحاج فروج .. الهابط فالدروج .

           

               المشهد الأول من الفصل الأول .

مقهى تبوريدا حيث خليط من النماذج البشرية .. مزاجها الشعبي يجعل من اسمها التجاري اسم على مسمى .. وبجانب هذه المقهى يوجد دكان تحت اسم { هنا الحاجة مقضية } وهو اسم اختاره الحاج فروج لغاية في نفس يعقوب وخصوصا عندما وضع آلة للكتابة عند مدخل الدكان وكأنه خاص بمحل لكاتب عمومي و الحقيقة هي غير ذلك’ وبينما هذا الأخير كان يتهيأ للجلوس بالمقهى المذكورة بالقرب من دكانه ينادي على

النادلة حميدة قائلا :

- يا الله ْ.. أحميدة أبنتي كِيفْ العادة .

حميدة

- أنت تآمرْ وأنا نْغامرْ أسيدْ الحاج .. يا الله أقويدرْ عدّلْ واحد الشيشة بالنغمة د المشماشْ

ومعها اتاي دايزو لكلامْ

الحاج فروج وهو يمهْمهْ :

- أنت تآمرْ وأنا نْغامرْ.. إيه يا الشعر عْلى النبوري ..ولكن عندها الحق .. قالو زوّقْ باش تبيعْ .. 

الوقت تبدلاتْ و على ناسْها جهلات ..لّي حْنى الراسْ سلفاتو الفتاتْ .. ولِهزْ الراس قسماتو اشتاتْ .

في هذه الأثناء الشاب الملقب بكريدسة وهو أحد المولعين بلعبة التيرسي يرفع رأسه المنكب على خليط من

الورق المرقم ليخاطب النادلة حميدة وهي تضع فوق طاولته فنجان قهوته السوداء .

كريديسة:

شكرا أختي حميدة .. أنا مزاوكْ راه البارح .. قالت لي واحد الشوافة .. ما يمكن نربح أنا فالتيرسي

غير من شي رقم تعطيه لي مْهورة .. مجدوبة بحالكْ.

حميدة وهي ضاحكة:

بيني وبينكْ أكريدسة .. والله ما تلقى غير مكْ لّي مهورة و مجدوبة .. و سير لعندها تلقى ليك حل  أما أنا الله

حنين كريم وفهاذ الشي الله يجيب.

كريدسة :

أنا مزاوك أحميدة .. الوالدة سخطات علي من النهار لي بعت لها الحمار علاش كتمشي السوق .

حميدة مستهزئة:

بعتي لها الحمار و باغي تربح العود .. و شتي انت وخا يكون الربح جاي .. غير يشوفك .. يدير دومدور .

كريدسة :

أنا امزاوك خليك مهورة .. وقول شي رقم كيف ما كان .

حميدة وهي ذاهبة:

سبعطاش فاصلة خمسة .

كريديسة:

مك .. يا مك .. هذا طوكار تابعو جحش .. بانت المعنى .. إذا رقم سبعطاش تابعو رقم خمسة .. مك .. يا مك ..

بقاو غير جوج أرقام خرين و الكواطري يحصل .. والله منطلق من حميدة هاذ الصباح .. أحميدة أنا مزاوك

شحال كتلبسي فرجليك ؟

حميدة وهي ساخرة:

ستة وأربعين .

كريدسة وهو يهم بالوقوف  :

مكْ يامكْ .. بانت المعنى .. رقم ستة تابعو رقم ربعة

والحصيلة هي .. سبعطاش .. خمسة .. ستة .. ربعة ..

مك يامك .. اليوم نخلص لكرديات لعليا و الكروات قبل ما يخويوني .. أحميدة غادي نمشي نقطع وارجع

وهاذ القهوة الكحلة رديها لي نص .. نص .

ثم يخرج الشاب راقصا وهو يغني:

على وحدة ونص .. ارقص يا كدع .. على وحدة ونص .

في هذه الأثناء ومن جهة الدكان تقترب امرأة ملثمة .. لتخاطب الحاج فروج بحذر شديد قائلة  :

- صباح الخير يا من لا يشق له غبارْ  ولا يلحقْ به نفارْ .

الحاج فروج:

أدرجْ ألا لة .. واش احنا فسوق عكاظ .. فاين وصل الشغالْ

الملثمة :

راني متبعا التعليماتْ .. غير وكان .. راس الضبع ما زال ما جابو العشاب .. عاطيه العربون ونوبتي رقم 13.

الحاج فروج غاضبا:

شكون قالك راس الضبع .. راه ما بقى يكل والو ملّي ولّى كلشي ضبع .. أنا قلت ليك راس الفكرون لي راضع

من بزولت خالتو .. راه موجود بكثرة عند العشابة .. غير قولي لهم فكرون الطايوان يا الله غْلي منْ لقدّامْ ...  

وسيري صمْكي عْبي السلامْ .

الملثمة وهي ذاهبة:

من فمك لله .. يا لمعلم فروج .

في هذه الأثناء يدخل السيد قنداش .. البائع المتجول والذي بدأت علاقته بالحاج فروج تعرف تطورا ملموسا

بينهما .. لدرجة أن  قنداش لا يكون مرتاح البال .. إلا بعد الذهاب لرؤية صديقه الحاج فروج .. وبالفعل وبعد

التحية والسلام .. بادره قائلا :       

قنداش :

اخباير الدنيا .. ولات غير علامة الساعة ألحاج فروج ..

ما كاين غير هذا قتلْ .. هذا صلخْ .. هذا    فلويا حصلْ ..

هذا  تزوجْ  يلاه  فالتبريزة جْهلْ.. هذا مقاول فالضالة لولا سلْ

هذا  خرجْ  .. فالرجوعْ على دارو ما  عقلْ ..

هذا  تبعاهْ  مراتو  ..   بالقفة  تركلْ ..

هذا شد معملْ .. داير مع النقابة .... حديث  و مغزلْ ..

هذا شداه  صريصرة  ديال الضريبة .. حيت   خلعاه   بقفلْ .

الحاج فروج :

 ونْسيتِ  هذا طلعْ  ما هبطْ ..   هذا ضربو الزلطْ ..

هذا على  باه    سخطْ  ..  هذي بخْرات بزعافر القطْ..

ولا حول  و لا قوة إلا بالله ..

نقولك حاجة أسي قنداش ما بقات تلذ عليا حتى اخبار من

غير ذاك عاجل خبر .. وانت عارف الحاجة الطرية هي تلقى فيها

البنه  و المعنى ..  الله الله  ..   على زمان  كيف  كان ؟

الرجل كالس فدارو بحال هارون الرشيد.. تيسمع الدقة جاتو

في الباب ..     أشكون من لحبابْ لي تيدق فالبابْ ؟

أحل هذو عزْ لصحابْ .. أشريفْ .. أولدْ النبي ..

جبنا ليك      هديهْ ِ   ..       عروسة       مهديهْ

لعيون        شهديهْ    ..      لحروف      هنديهْ

إيوا    كِجاك  هاذ   عاجل خبرْ           أسي قنداشْ

قنداش :

هذا  خبر عْجلْ .. ضربو ثور حتى جْهلْ ..                            

راه لعندو السعد .. ما عمرو  يملْ ..

ما شي بحالي ألحاج فروج هذي يومين جابلي الولد

من المدرسة ورقة فيها ..عاجلا الاتصال بإدارة المدرسة

عيطتْ أجي ألولد .. ياك ما درتي شي مصيبة ؟

راوغني بالفن .. وقالي الموضوع فيه أبابا وقلا شي كْريما.. ضربتلو بوسا .. وقلت هذهما كعبات ولاد الرضى

..مشيتْ المدرسة مصبن محددْ .. حتى جيل غسلت بيه راسي ولشاط مسحت بيه سباطي..

دخلت الإدارة والورقة فيدي .. منين عرفوني .. فاجؤوني : رحنا مبغناش نعيطو للضابطة القضائية حتى نسمعو

منك لخبار .. على هذشي  لتيقول  ولدك .. أشنو هو هاذ تعواد   أسيادي  راكم خلعتوني ؟

جاوبوني أسيدي ولدك .. تيخلع التلاميذ بأنه هو جاكشان وتيخلع  المعلمة .. بأنه هو الشيشان ..

إوا يا الحاج فروج ..عرفت ما كاينا لا كريما و لا هم يحزنون .. فسرت لهم راه

أسيادي كل صباح وعشية تنصح ولدي بالقراية باش يولي شي .. شانْ

بمعنى يولي همة أو شان ودبا راني غادي نعبيه  لطبيب  الطرشان.

الحاج فروج ضاحكا :

أكيف والو هاذ لحريرة قدام ديالي  ..

هذي عام قبل ما نتعرف عليك..  كنت ڭالس ما بيا ما عليا

تنعاين لمرا.. ادخل من الحمام.. ونا نسمع دقة فالباب ..

حليت لقيت بنت ثلاثين عام ..   واش انت الحاج فروج؟  إيه

أشحبْ الخاطرْ؟ قالت لي اعتق .. مراتك راها طاحت فالحمام

دارت بيا الدنيا.. درت جلابة على عنقي وخرجت بفرده وحدا

ونا      تنعيط  أولي وحدي  ..    خصني شي فردي..

كيف نديرْ   نصارعْ هذي      كيف نديرْ    قاوم ْ      هذي ؟

خلات خمسة فعنقي وحدي     كيف ندير   قاومْ        هذي ؟

ما   يقدني معاهمْ  ..لا شعير ْولا بغريرْ ..

ما    بقالي  معاهم .. غير    الغيطة  و البنديرْ ..

وأنا  فداك الحالة .. جيت نقطع الشانطي .. تتوقف عليه سيارة القوات المساعدة ..

واحد   جوج   ثلاثة ..    كنت   مع  ربعة    دهداوة

قلك  دايينا  لدار العجزة  .. ندوزو  أحسن       إجازة ..

أسيادي   راني مواطن صالح.. الحاج فروج مول تصابيح

ما جاوبني غير هداوي ..

مرحبا بالحاج       فروج        ..         أليوم  راه  نتفوك

باش تبغي   نطيبوكْ.. بكرعة ولا بكرموسْ

أما الثاني قالي  اعْيا من مكالت مُوكا ..   ودبا باغي دوز بيا كوكا ..

وما كيغفرلي الله منهم ومن عطرهم حتى لدار العجزة ..

تما لقيت سي عباس .. ساومني فشي فلوس سلفتهلو ..

دارني بهم شونطاج .. وقاليا خبع الجلابة .. رها دلعيلات

قولت ليه راني غلطت وهزتها ..لأن لمرا عندي فيها الطيرة

موصياني .. يلى بغيت الشمل يبقى مجموع .. جلالبنا

يكونو  فلون  واحد ..

ومني رجعت أسي قنداش لداري .. ما لقيت حتى خبر

فالضراوة .. و فالضرافة.. وفالمضاوة .. بحال ديالي ..

لقيت لمرا  صح من ظالم  .. كتغوت و تقول

خليت راجلي حاضي الدار ..      جا أكبر ماضي شفار

خلانا على دص فالدار      ..      خلى غير قط  و فنار

إوا  تيقنت أسي قنداش أن  لجات و دقت فالباب ..

دارتلي ..  خبر عاجلْ  ..   لزلط ٍ  آ جلْ .

قنداش:

أولاد لحرام  ترّيكْتْ زورو ..   إوا بْدتي تأثث دارك من زيرو

الحاج فروج :

والله ما أثثها  غير بنقاوة .. ما بقالي  منها  غير شي كوكاوة

قنداش :

و فكرتني ألحاج فروج بهاذ كوكاوة البارح  أنا داخل لجامع

لقيت واحد تيصلي تحية المسجد ..  حرفت عليه خفت نقطع ليه

صلاتو  وهو يقولي  وغير دوز .. و مني سالينا الفرض

جيت و سولتو علاش قالي غير دوز..

جاوبني ألحاج فروج  .. و قالي هذا دخول فالدين الضيق ..

أنا أسيدي كنت تنطلب على ربي شطموبيل و خا تكون إردوز

الحاج فروج

حتى أنا فكرتني فواحد .. لو كان يجري يسبق عويطة فسبكْ

شفتو فالجامع تيصلي ڭالس .. جيت لعندو شخبارك أفلان

ياك لباس شتك كتصلي ڭالس ..

جاوبني أسدي راني اجتهدت ولقيت جوج فتاوي ناسبوني ..

لولا  ..  خرجوني من الخدمة وأنا  دبا عطيها     لكلاس

ثانيه ..   رجلي طابو مع طامو .. رزماتني حتى كلساتني .

قنداش

وهذي هيا   لا حيلة مع الله ..

فكرتني ألحاج فروج .. بغيتك ساعدني فواحد الموضوع

شاطني ومهوسني  ..هذي جوج أسابيع .

الحاج  فروج

ياك ما    عاود ثاني  شي   عاجل خبر ؟

قنداش

راه باديني غير شي فيلم هندي.. غير الله يخرج الطرحة بخير

أسدي الحاج ..أنا تنسقي شي حبيقاتْ عندي فالدار و انا نلقى

خنيشة مستورة مزيان مع جنب الحبق .. حلتها و أنا نتخلع ..

أسدي طلعت راس فكرون  ..عينيه    فيا       مبلزين ..

مباشرة  مشيت عند لمرا  نصمك .. و أنا لحمي مشوك ..

واش بغيا   معيا  تخوض؟ ولا عاود ثاني كتسبب باش تبيضْ    

حلفاتْ ألحاج بمكة و المدينة ..  ودوز فيها   أكبر سفينة ..

ما شافتْ لا فكرون و لا قمرون   ..   و لاهم يحزنون ..

حليمة بنتي الكبيرة لي متبعة الحقوق .. ما شكيت  فيها ..

الولد الصغير .. عندي  تيخلط  بين الشيشان و جكشان ..

طلبت من لمرا تكتم السر .. حتى يبان مول الفعلة..

يقدر يكون من لحباب   ..         يقدر يكون من الجيران

أشنو اظهر لك  ألحاج  من  هاذ الوسواس الخناس ؟

الحاج فروج :

هذا موضوع أسي قنداش عندي فيه  ..حكمة و ميزانْ

الخطة لي عنعطيكْ ..تْطلّع البرهانْ لي تشوفو العيانْ.. ولابد تمشي لعند العشاب.. يعطيك راس حنش لمعدلْ

بالجدول .. وبالفن بدلو  براس الفكرون .. وما تجيب لمرا  حتى اخبار ..وڭلس فالدار أسبوع  راك ولابد غادي

تسمع كلمة السر وهي  أشاي الله   ألرجالة  ..  راني عليه   عوالة .. غير تسمع هاذ الجملة ..عرف أن مول   

الموال .. هو صاحب الفعلة .

قنداش :

إذا مول العملة وحدة من العيلات ؟

الحاج فروج :

كفى من الأسئلة  .. و قوم طبق الخطة ..

قبل ما يردك الفكرون  ..معلق كالعرجون ..

ورجع لعندي تبوس الراس .. مني يبان البرهان .

 

 

 

 

 

 

                               

              

 

                            الفصل الثاني

السيد قنداش يدخل بيته و هو يحمل بعض ماربه وقد نجح في استبدال ما طلب منه الحاج فروج .

 

خدوج زوجة قنداش

مرحبا براجلي لحبيب .. كيف كان السوق اليوم ؟

قنداش :

فرع لي راسي اليوم السوقْ .. كل خيمة و لا فيها براح و بوقْ وكلهم يعيطو.. هنا  لمديح عزيز  ..  

هنا لمليح و لويز .. وحتى جاري لفقيه جرهوم .. دار بوق  و بدا   يعيط :

لي بغا سرّو  يْفوحْ.. يْشدْ النوبة وفيدو لفتوحْ

الاختيار فلكتابة مطروح.ْ. إما على البيضْ و لا على اللوحْ

خدوج :

حتى انتَ  دير شي  بوق ..  وبدا تنادي هذي  عطرية العطارْ

البنة لكل دارْ  .. غير جيب شواريكْ ودي قنطارْ

قنداش :

لواه  نْجيب الغيوان .. يديرولي منْبتَ الأحرارْ

قولي ليا  بعدا ألمرا أشمن خبار لعلى بالك وبالي؟

خدوج :

نكاتيف أعوناتي  راني حاضيا الشاردة و الواردة .. ودبا لتسمعت لي غير نسى الموضوع ما يكون غير

ولدك حماد القى داك لعجب فالدرب.. و دخلو ودارو فالحبق.

قنداش :

عندي كفاش  نقلقلو فاين هو عيطلي عليه؟

حماد :

نعم أبابا    جبتلي شي صيدي  ديال جاكشان.

قنداش :

نجيبلك  طارزان وشاروخان قول ليا  بعدا شنو تتعرف على الفكرون.

حماد :

الفكرون هو ولد عم الحلزون وهو الكائن الوحيد أبابا

لتيكره الشفار.

قنداش :

وعلاش اولد قنداش ؟

حماد :

حيث ديما هاز دارو على ظهرو .. والسبب أبابا فالنهار لول

خرج جد لفكارن من دارو .. تيقلب على مراتو .. منين ارجع

لقى لعريفة خملات ليه الدار .. و من داك نهار وهو هاز

دارو على ظهرو .

قنداش :

مناين جبتي هاذ المعلومات اولد قنداش ؟

حماد :

حلف ما تضربني أبابا .

قنداش :

غير تكلم بلا تكذبْ عليا و عليك الأمان .

حماد :

بعض نوبات أنا وصاحبي هشام .. تنهربو من المدرسة

حيث ما كتعجبناش واحد الحصة .. إوا أبابا كنمشيو عند

واحد الحلايقي عندو من الأخبار العجب العجاب .

قنداش

صافي انت لي عتعجلي بو حبل ْ.. أنا ندور في الاسواق

نبيع العطرية .. و انت اسمع الأزلية عند لحلايقية .

خدوج:

راه  واعدني ما عاود .. ودابا الله يسماح أسي  قنداش.

قنداش :

ألمرا داكشي لعلى  بالك .. راه بدا يولي بوزتيف  وبديت

نشوف ونحس بالتخرويض عندي فهاذ الدار .

 

في هذه الاثناء تدخل ابنته الجامعية بلباس أنيق .

حليمة :

بونجور بابا .. شتك هاذ الأيام كالس فالدار بالمرصادْ

قنداش :

وأنا ألا لا  حليمة مني بديت نكلس فالدار .. شفتك فالصبح بتبديلة و فالعشية بتبديلة.. هذي خصها شرمولة 

وهاذي نغيزة فالموضة .. هذا  الشيبي مع الشهبي .. هذا البني مع البنفسجي ..هذا الازعر .. ما يجي غي مع

الاسمر ..و هذا الزبطي ما يوالم غير قلب حموصة .. واش أعبادالله عندي البنت .. ولا تاتا الغمازة ؟

حليمة :

الله يهديك أبابا بنتك .. راها جامعية ومثقفة .. وْزايدونْ راه الألوانْ مرايا كتعكسْ سعادة الإنسانْ

وكتخلي الأمانْ يعانق الألحانْ .. خصّكْ أبابا ما تدّهاشْ على المظهر الخارجي .. سولني شويا على

شنو عندي فالاعماق .

قنداش:

يا سلام على الكلام .. أبصاب وكان معمري مع مك ما تبرزت .. أسمع ألا لا راه وخا باك ..

عندو غير الثقافة ديال بوكماخ راني مسئوول عليك من جميع النواحي برا وبحرا وحتى جوا

والمحاضرة ديال الألوان .. وفرها لهذاك لغادي يكون فعنقك .

خدوج:

أسدي شفتك داير راسك فراس البنت.. يكما غير أنا مسكينة

سلكتني بالأبيض والكحل بغيتي حتى هي مسكينة تحرمها من حزام لا لا فاطم الزهراء .

قنداش :

صفي هذي هي الوضعية ديال بوزتيف ..

لخواض طلع دينو   ..     و غفلون مبلز فيا عينو

نخرج  نشري التنفيحة .. نطير عليا هاذ جريحة .

حماد :

قبل ما تخرج أبابا هاذ الليلة لي فاتتْ راني حلمت واحد الحلمة

فيقاتني و أنا مخلوع بغيتك تفسرها لي عفاك أبابا .

قنداش و هو يهم بالخروج :

ما يكون غير جكشان خلعك واش أنا هو بن سيرين يا وجه السردين ؟

حليمة بعد أن خرج قنداش :

خير و سلامة أخيي حماد .. أنا مثقفة شويا غير عودلي

المنامة  يمكن نفيدك فيها .

 

حماد :

احلمت أنا داخل لدار وهذا واحد الحنش تابعني بحال جكشان.

بمجرد ما أن قال هذا الكلام حتى طارت عليه أمه و أخته ..

 وهما يعانقانه في فرح و سرور .

خدوج :

احلمت حنش هذاك راه فال الخير و الخمير على اختك حليمة.

حليمة :

راني اخيي غير نشد المنحة نشري ليك ساعة يدوية او

دراجة هوائية من النوع الرفيع .

حماد:

إوا شنو تشريولي يلى حلمت شي تمساح ؟

حليمة :

أنا فعار الله من التمساح .. ابقى تحلم لي غير الحنش

و دبا أماما ديري طليلة على داك الحبق راه لحمي تشوك

و قلى السعد اظهر و بان  .. سيري تأكدي من البرهان .

 

 

في هذه الأثناء تكتشف الأم عن الكيس فتجد أن هناك رأس أفعى وهي لا تعلم أن زوجها هو الذي

قام باستبداله فتصادفه و هو يدخل  فتكون المفاجأة التالية.

حليمة وهي مندهشة :

أشا يالله  أرجال البلاد  فرح معنا أبا با راه السعد جاني منْ لبعيدْ جوالْ

وقول معنا شايلاه أرجالة راني عليه عوالة .

 

 

قنداش

هكذا نتوما دايرين عليا قفيفة  أ لفكارن .. ونا فدار غفلون

انت حلفي بمكة و المدينة و دوز فيك سفينة ما شفتي ما ريتي

و انتي أتاته غمّازة  ..داير لي محاضرة فالالوان .. مصمكني بالألحان .

خدوج:

أسي قنداش خليك مثبتْ .. و كون مرزنْ ..

هذي فرحة خصك تأروزيها لينا .. بكوكا و أورانجينا

راه ربي غدي يسهل على بنتك و حتى علينا .

حليمة

إيه أبابا .. راها شرمولة  ..مشي غير فالألوان

راها حتى فالمثلة ديال ..  أعبدي تسبب و أنا عينك .

خدوج

باش نحطوك فالصورة بلا كذوب بلا غموض أسدي هذي

شهراين .. كان غدي يتقدم  لالا حليمة شاب ولا كل الشبان

ثقافة  همة و شان .. حداقة و لباقة و رجحان ..

و لكن بنت خالتها لي معها فالجامعة دخلات فالامواج

و ما خلات لا فقي ولا شباك ..واش نخليوها دير فينا ما بغات

و حنا أسي قنداش غير عيلات..  ومكتفهم المرا غير المرا

واش نبقاو ساكتين  ..    حتى يمشي على بنتنا  التران ؟

حليمة

إيه أبابا حتى حنا تنعرفو للجاوي و حصلبان .. ورّاوْنا لجواد

واحد الفقيه تيجمد الما  فالركابي؛  كلامو ميزان جاب البرهانْ

افتى علينا نجيبو للدار راس ديال فكرون ؛و اكتب على جبهتو جدول و زمم وقال ..هذيك المنعوتة  .. شغالها

يتقلب يولي عليها منحوسة ومني  يولي راس الفكرون راس حنش راه العروس عندي فالجيب .. يجي عندي

قبل الشمس ما تغيب

خدوج

ويلى تسمعت لي أسي قنداش هذا فقيه يصلاح حتى لخدمتك

راه فقيه شديد ..  يجيبلك السر من بعيد .

قنداش

راكم جيبتولي التمام ألعيلات  وشكون هو هاذ العجب العجاب؟

الأم و البنت بصوت واحد:

هذا      ..                   سميتو     ..     ألحاج فروج

 

قنداش في ذهول كبير:         

الحاج فروج   ..            أمي على  ..    خبر عاجل .

 

 

 

 

 

 

 

 

 

 

 

 

 

 

 

 

 

 

 

 

 

 

 

 

                       

                        الفصل الثالث

                                              

 

بينما كان الحاج فروج بالمقهى يدخن وكعادته " الشيشة "

بطريقته البهلوانية دخل عليه قنداش مباغتا .

قنداش

الله يلعن لي ما يخاف و لا يحشم ..

مصيفطلي راس الفكرون مع العيلات وأنا ندي حسي مسي

راس حنش.. و مخليني ڭالس فالدار حاضي لعجاج و لغبار .

الحاج فروج

و باش نعرف عيلاتك ونا ما عمري تشرفت معرفتهم ؟

و زايدون جاوني ملثمين بحال زورو ..

و غير قلت لي لقيت الفكرون .. عرفتهم كليان ديالي

و باش ما نخليش الوسواس يكبر .. صفطتك براس حنش

باش يفرح لي يفرح  ..و يفهم لي يفهم .

قنداش

و هي البرْطية عندك  زينةألفروج مدورْها بهوتْ جمعها فتوحْ

الحاج فروج

خوك من نهار لسرقولو الدار.. عطيتها لبخور و العود

لكلام   موزون بالقافية  .. المعاني شغال الحرايفية ..

و ما  طالب غير السلامة و العافية .

قنداش

و مراتك عارفه هاذ الحرفة لطيفة ديالك؟

الحاج فروج

مراتي  هي الري هي شوار.. غير عطاتني الفكرة نهار لول

زدت عليها تحسينات .. و زوقتها بتقليعات .. كتناسب

الدمغيات ديال بعض العيلات .. في جميع الاوقات والحالات.

قنداش

و قيلا حتى أنا نقلب ذاك الخيمة ديال العطرية .. وندورها

بخور و عود مع شي بوقْ .. بحال جاري لفقيه جرهوم .

الحاج فروج

و لا بد خصك أسي قنداش دبلوم فهاذ العلوم من شي حرايفي

بحالي .. باش ما عمرك طيحْ فالمحظورْ ..

و مني انت صاحبي و حبيبي و دوزتها عليك .. راني حالا

غادي نحطك في المحك و التجربة.

قنداش

أنا مزاوك غير حطني بلا تقرقيب .. راه راسي خفيف

و حتى الميزان راني عارف ليه الصرف.

الحاج فروج

اسمع  أسي قنداش.. راه عندي في لحظات موعد مع شابة

باينه بوكو فلوس ..

درت معها من زممْ..  من تمتمْ حتى تجيب لي ورقة فيها

لكتابة ديال عشيقها .. باش نردو تيهترف عليها غير بأطيب الأشعار وألذ الألحان....

ها هي  ..   ها هي دخلا ..   اسمع و تعلم  ..   يلا سولتك

جاوبني غير بالفصحى .. راك يلا نجحت  راني دابا

نطبع ليك على الدبلوم .

 

 

 

الشابة

السلام عليكم راني ألمعلم جاهزه..  و ها الورقة عليها كتابتو

الحاج فروج

مرحبا    مرحبا  .. السعد يكون  ..     و لغيار فيك يهون

الساروت   يحضروه  جنون     ..    الدلو فيدك  مرهون

الشابة

هاذ الڭلسة ألمعلم   بغيتها راسي  راسك شكون هاذ السيد ؟

ألحاج فروج

راه  عندك سعد كبير و زهر عظيم مني لقيتي هاذ المبروك

هو ألا لا حامل الأسرار..  تربى فالغار  

معطيلو لكتابة على جلد الفارْ ..

كيشوف فالظلامْ بلا     فنارْ..

على يدو يحصل  الشفارْ ..   و على يدو يربح  القمارْ

تيقنع    بقالب   السكارْ ..    و الطريف ديال  سمسارْ

عرفها  براسك   يا عجيب الأخبارْ.

قنداش

أنا  هو سي قنداشْ ..  مي قنديشة  .. و بويا  عرباشْ

كنمحي  تشاشْ ..  و نشطح مع لحناشْ ..

كتابتي بحال المنقاشْ ..    دايرا  عجب فالاوراشْ

ولا بغيتي ترشقو لقنداشْ   ..    لخلاص يكون كاشْ .

الشابة

انا متشرفا بيك أسي قنداش ودبا الله يخليكم ليا غير تعاونو

على داك المسخو ط كنت غي القمورة و دبا وليت غالهضورة

كنت بحال شي شفلورة .. بغى يردني  موكا مهجورة ..

كنت بحال شي بندورة ..  و دبا بغى يردني صبورة  ..

بغيتو يحفي عليا السباط  .. طالع نازل فيه الهباط ..

بغيتو جيني يرغب بالزطاط .. وفالليل يجيني هايم  كالوطواط

الحاج فروج

راك غاديه تشوفي العجب العجاب؛ الباطل خرج من الصواب

والحق خرج من السراب  ..و نيتك تحكم حتى فالضباب .

قنداش :

وتشوفي سرك يطلعْ و نجمك يسطعْ ولقرع واكلو الضبع

يجيك  الزغيبي طالب لوصالْ .. ما قاد مومو على فصالْ

يدق بابك طالب يد الحلالْ .. ويحلف انت هي لهلالْ

منك بعادو ولى محال ..  ما بقى قاد على هبال

الحاج فروج :

تبغي ألالا طرز النطعة  .. و لا غير طرز الكصعة ؟

تبغي ألالا  قبة كناوه  ..    ولا  غير حبة  حلاوه؟

الشابة :

أسيادي راني فهمت راسي .. ديرهوم كولهوم

ها خط يدو  ها الفلوس  و ديرو خدمة متقونة راني به مجنونة

الحاج فروج

باسم الله أسي قنداش أنا نفتي و انت زمم معسول الكلام

لالا أحلام بنت إلهام.

قنداش

عندك شي قلام ألالا أحلام ؟

الشابة :

يهاذ الخدمة ما فيها لا قصبة و لا مداد؟

 

 

قنداش

ألالا أحلام جنونا  .. راهم ولاد اليوم ..

قاريين  فبولتكنيك  دايرين سطاج بالسكانير و التكنيك

القصبة ولات تجيب  غيرالهليك.. و لمداد تيجيب الكوليك

الحاج فروج

اكتب أولد الغار

هاذي لالا أحلام بنت إلهام  يا سي بركام .. بكل احترام

فرش ليها الوئام .. و زيد بها القدام .. راها ليك هزا لعلام

ناسها يبوسو  لقدام  .. حسادها يضربهوم جدام ..

غرابها يولي حمام .. حمان ولد سهام جيها زربا تمام ..

دير بركتك أسي قنداش .

قنداش :

يلى قالت لالا أحلام لسي حمان  .. الرا ..     يطيح  فالروا

و يلى قالت لسي حمان         الشا   ..          يطيح  فالهوا

تبريزة تكون همة و   نخوا   ..     شهر العسل فضاية عوا

الولدة تكون شباكيا    حلوا       لولاد عرام.. و توام   نشوا

 

كملات الورقة ألالا أحلام

وهاذي تعريقة ..  خصك تزيدي لها ..   شي تمريقة ..

باش تزيان الحديقة    و تسهال الطريقة.

 

الشابة تخرج من محفظتها راديو الاستعلامات ويقف

اثنان من الشرطة حول الطاولة .

الشابة :

بركه عليكم من البهوت .. و مكلت السحوت ..

قراو الورقة لي فيها خط اليد و الطابع يا تريكت البرغوث.

قنداش

الضابطة القضائية في شخص عميد الشرطة ..

              يطلبك للحضور عاجلا .

 

الحاج فروج و قنداش بصوت واحد :

 

     كلانا  الحوت         في عاجل خبر.

 

 

 

 

 

 

 

 

 

 

 

 

 

 

 

 

 

                       الفصل الرابع و الأخير .

 

  بعد مرور ستة أشهر .. يخرج الحاج فروج من السجن .. وقد تاب نهائيا من فكرة النصب والاحتيال .. ليتأقلم من جديد                     

مع واقعه .. وحياته .. وليفكر بعمق في الكسب الحلال .. يعيل

به أسرته .. وليكون في مستوى تطلعات ابنته الجامعية مليكة

وابنه العربي

                      

 وبينما كان الحاج فروج يهم بالدخول إلى بيته يفاجأ بابنته

ترقص أمام المرآة و تغني- لس فاكر - - - قلبي.

 

الحاج فروج مندهشا

أسعدي  أفرحي -   أشكا ديري    ألالا سوليكة ؟

 

مليكة

ولي خلعتني أبابا- و زيدون انا ما موليكة ما سوليكة انا مليكة

ويلى جا -على خاطرك بدا تناديني ملاك - كاسم فني حيث ما

بقى والو وبنتك تولي فنانة .

 

الحاج فروجمتعجبا

فنانة - و دبعاد  لفتيله -عشقات العافيا.. و كملات بيا الباهيا.

مليكة

ولي أبابا – ما قالت ليك والو ماما ؟

الحاج فروج

مماك صايمها هذي أسبوع غير فسر لي أنت الفنانة-الظنانة

مليكة

راهم قبلوني زعما- ستار أكاديمي باش نقدم لهم واحد البروفة

يلى نجحت فيها  راني أبابا عدي ندخل سلك النجومية من

الأبواب الرخامية – وراك تبدا تشوفني تنقدم أغاني وتوشيات

تلفزيونية – ويمكن حتى فوازير هوليودية مخيطة بشطحات

فنطازية

غير تهنا أبابا راك ولدت و اعرفت شنو تولد 

رها بنتك في الفن جنية

قدامها سخونة بالسر محمية

راسك نرفعولك

وجهك نحمرولك

جيبك نعمرولك

 

الحاج فروج

 شنو أسمعت  ..استار هاك أعمي ؟

مليكة

لا أبابا .. سميتو ستار أكاديمي .

 

الحاج فروجوهو يهم بإخراج حزامه الجلدي:

 

أعرفت شنو  يجيك مليح الالا مليكة   

- غدي نصقل مواهبك .. بطريقة جدية

- و نزودك بلسعات جلدية

- وما نطلق منك غير لا  ارغبتني بالهندية

 

مليكة

- اسمع أبابا     خليني معاك مرضية .

- أما اللسعات الجلدية راه مستحيل توقف فطريقي للنجومية

- وخلي الحوار بيني و بينك ياخذ الطرق السلمية.

 

الحاج فروج متراجعا

-اسمع ابنتي الله يرضي عليك

 

-       الفن عندو ناسو .. وانت ماشي قد قياسو .

 

   - واش لي  قرع  تيحسن  راسو

   - راه  الابداع   خصو يكون عندك فايض كاسو

 

 

مليكة وهي ذاهبة إلى غرفتها غاضبة:

 

- هذي تعدات اللسعات الجلدية

- هذي اللسعات الكهربائية  بالصفعات الكلامية

- وتقول أبابا شي نهار  نحس معاك بلمسات سحرية

   ترميها لي بالحنية .

 

 

 

في هذه الأثناء تدخل الزوجة  سعاد بعد تفهمها غضب ابنتها.

سعاد

- أسدي الله يخليك بعد من سوق بنتي

-       رها بالمغنى موهوبة

 

-       في الرقص مجذوبة

 

-       خليها تقبض فهاذ الفن النوبة

 

-ما شي بعيد تكون فيه اعجوبة

 

 

 

الحاج فروج

 

وهي في الحقيقة      حجيب خصو محجوبة .

 

-واش غير أنت وتاك الطر  البنت خصها الدربوكة

 

 

 

سعاد

 

والله يجيبك على خير

 

-       ما يواتيها غير ستار اكادمي وأجرك على الله

 

-       البيانو فيه منقوش

 

-       واللحن بلفشوش

 

-       الكاميرات غير مزلعين  فلحيوط مدفونين

 

حاضيين الشاردة والواردة والفالطا بالكبوط

 

 

 

الحاج فروج

 

الله الله   غير مشات دار الطاعة

 

خرجت البلاعة دايرا .. علامة الساعة.

 

-       الالا حاولي تفهميني راه الفن والإبداع مشاو بجوج

 

مني تسلط عليهم هاجوج و ماجوج .

 

 

 

سعاد

 

ولي بنتي فعار الله من هاجوج و ماجوج

 

وزايدون البقاء للأصلح  وبنتنا عندها النصيب الأرجح

 

الحاج فروج

 

الله يخليك راني طبت بدل علي هاذ الموضوع .. و يمكن

 

من بعد نفكر لها فواحد البديل يكون مشروع .

 

 

 

 

في هذه الأثناء يدخل الطفل العربي وفي يده يحمل ورقة

أتى بها من المدرسة وبعد أن قبل يد والده استطرد قائلا

العربي

با با ابابا  عندي واحد الطلب يلى جا على خاطركم

 

الحاج فروج

عنداك حتى أنت تقولي بغي تمشي لستار هاك اجمي

 

العربي

لا أبابا لن أعصي لك   أمرا    وستجدني إن شاء  الله من الصابرين   غير وكان خصكم تصبروا معيا شويه وتخرجوا

من الدار وما ترجعوا حتى لعشيه .

 

الحاج فروج

الله أكبر و علاش  أولدي باغي تردنا لاجئين .. على بيتنا مغتربين؟

 

العربي

بكل جرأة وتواضع  صحابي طوعوني نقوم بحفلة ترفيهية

 

 

الحاج فروج

طوعوك  ..الله يطوعك فشي خربة .. تهردك غير جربة

حفلة ترفيهية يا وجه الكربة ..

اجي بعدا شنو هاذك الورقة  لي فيدك يا المنذبة ؟

 

العربي

هذي ورقة من المدرسة 

قالوا لينا ولابد يطالع عليها أولياء أموركم .

مليكة    بعد نادت عليها أمها لتستوضح حرفيا ما جاء بالورقة

 

جمعية الآباء تدق ناقوس الخطر

حرصا على سلامة أبنائنا وأبنائكم فإننا نهيب بكم للحضور

الى مقر المدرسة يوم السبت على الساعة الرابعة وذلك للتواصل معكم من جهة ومن جهة أخرى لمناقشة آفة المخدرات عامة وحبوب الهلوسة خاصة ولذلك وجب

التنبيه و التحذير والسلام عليكم .

 

العربي

بابا- أبابا شنو هي حبوب الهلوسة ؟

الحاج فروج

حبوب الهلوسة .. هي خراب البيت والمدرسة ..

لي بلعها.. رداتو إما جفافة ..     و  لا  مكنسة ..    

ولي  ولفها  طمرتو  ..   بالبغلي و  الملاسة ..

عندك تقرب لها .. راها حالفه بكتاب التعاسة .

 

سعاد

عندك أولدي.. راك دوز حياتي  ..  عليك      عساسة 

ما يقدني معاك ..لا دمالج ولا مضمة.. ولا خوصصة 

وما تلقى لا طبيب.. ولا فقيه يفيدك.. فحتى   بلاصة

ويلى غرقت فيها-..ما تنقدك لا سفينة.. ولا غواصة  

مليكة

العام لي كنت في الباكالوريا واحد التلميذ أبابا كان يقول

لينا انا فالهلوسة تفتحت لي باب الخيال والفلسفة.. ومن جا

الامتحان ضربها بسقطة و قال لينا انا ما عندي ما عز من

الصفر حيث لقيتو شرجب .. منو تنطلل .. وأنا مقرقب .

 

الحاج فروج

عنداكم اوليداتي رها  ولات هي الآفة المتنقلة

- يديها بلا عداد   شابطا  في لحصل من لعباد

- ذاك الصغيرة من الحبات عاملا من المصيبة  قبات

 

وأنت أولدي العربي راه ولا بد نلبي الدعوة ديال جمعية

الآباء و خصني نساهم معهم في التعليق والتحليل - حيت

يلى بقينا ساكتين صامتين- راه الغول يولي    مغول

- يدوس بقدامو علينا حتى نصبحو    كعصف ماكول

 

العربي

دبعاد فهمت  وعييت ابابا  عليها واحد من صحابي لي طوعوني تيقولي                   عندي ليك فنيدة جنية

                              تردك سبع وخا أنت غيرقنية

 

في هذه الأثناء يدخل شابان أنيقان أحدهما أعمى بعد أن طلبا

الاستئذان بالدخول

الحاج فروج

أشكون أنتما وشنو   حب الخاطر؟

الشاب حميد

نحن لجنة الإقناع  جينا إليكم من عند ستار أكاديمي بعد ما

وصلتها رسالة من بنتكم الموهوبة ولي كتشرح فيها أن الأب

ديالها يمكن يكون حجرة عثرة .. في مشوارها الفني ..

لهذا المراد ديالنا.. نفتحو معاك الحوار .. النتيجة هي الإقناع

بعدما نشربو معاك العصير ولا كاس النعناع .

الحاج فروج

 هاي .. هاي  .. لجنة الإقناع والفن بالمقلاع ..

قل لي بعدا هذا لي معاك ..تيميل عليا كتافو- وداير عليا

نظارات الشيكي حاسب لي راسو هو روكي ..شكون يكون؟

 

الشاب حميد

أسدي هذا ما تيشوف ما تيسمع ..طه حسين مصمك.. إنما هو

ولا فخر إحدى التحف النادرة في ستار أكاديمي ..يلى شفتيه

تيميل هذك الإلهام فيه تيحيل ..تيخدم مسكين غير بجوج ضربات ..الأولى كتهضرو غير بالشعر والألحان.. والثانية

تيهمد و يرتاح فيها.. والدليل ها أنت شوف واسمع العجب ..

 

الشاب الضريربعد أن ضربه حميد على كتفه:

حبيبتي جاء المطر         لنهرب وراء الشجر

نقطف  منه الثمر           نسقطه      بالحجر

حبيبتي انا النمرود         انا عنترة   انا    عيرود

اسألي عني القرود         كيف أنط في   القرمود

 

حميدبعد الضربة الثانية

شفتي الإبداع كيف خارج بحال الشلال .. خص غير بنتك

تطلق فيه الموال .. أما يلى قبلتيه تسمع المليح دلال .

الحاج فروج

أسدي وقلى نجرب حتى أنا شحال هذي ما بست ما قبلت .

 

الضريربعد أن قبله الحاج

حبيبتي أنا ليك    في اللحن صرصار

حبيبتي أنا ليك    في الندب   طرطار

 

إن أردت بطلا    فانا  هو      زورو

إن أردت طيرا   فانا هو    الزرزور

 

الحاج فروج

ودبا ما بقاش غير كعور واعطي لعور.. ولات دبا كعور

ولعور يصمك لمهور حتى يفور ..

وانت أسي حميد أشنو عندك من الفن نغسلو به هاذ لوذن؟

 

حميد قبل أن يبدأ بالغناء .

عندي  واحد الفن بالتكنيك- باش تغسل وذنيك وتهرد رجليك..

  هاذ أغنية .. بعنوان    بركم ... بركم وأنا   

 

 

 

 

حميد دائما

ها أنت شفت حنت يدينا-والبركة د رجلينا- الفن يجمعنا

في السفينه- ولي غراق ما يبقى فينه- بنتك ألحاج كانت

غير فرنانة- ودبا إنشاء الله غتولي زربا فنانة-

الحاج فروج

تبارك الله عليكم            فنانة فيد زرمانة  

حميد

الحاج راه التلفزيون عدي يبث مواهب بنتك الخلاقة وتصبح

نجمة عملاقة - دايرا أحسن علاقة – غير بالرشاقة -

الحاج فروج

أسيدي خرجوا عليا بغيتوا تخرجوا على بنتي – وزايدون

انا هذي شهور ماشاهدت التلفزيون عاطيها غير للراديو

تنقول مع راسي اللهم في الوذنين ولا في العينين

 

 

سعادبعد خروج اللجنة

وليني أنت قنباع ما خليتيش لجنة الإقناع تشرب و لو غير

كاس د النعناع

 

الحاج فروج

امراتي- اولداتي- مني تبارك الله عندي الفن و الهوى فهاذ

الدار –نطلع للسطح نحصل لمرا كتشطح- نهبط نلقى البنت

قبالة المرايا كتهلل و تصبح-ندور لكولوار نلقى الولد

بالهيب هوب تينبح- ودبا راها طاحت عليا واحد الفكرة تتفرح..

وباش نحطكوم في الصورة راني غدي نمشي للبنك نخرج

فلوسي ونعمل مشروع كلنا شركاء فيه- منها شملي ما يتفرق

ومنها فريخاتي ما يطيرواعليا- ومنها حتى الموهبة لي فيكم

عندها صلة بالمشروع لي هو عندو علاقة بالفن.

 

سعاد

الله الله عليك يا رجلي لحبيب و قلى هاذ المرة ما تخيب-

غير وضح لينا هاذ السر - راه لي فينا فن غريب -خصنا

نحتاطو غير من القرصنة والتهريب .   

 

 

 

الحاج فروج

الالا وبكل اختصار- هاذ السر هو      مشروع ستار نكافتي-

عدي يكون عندو- إلمام بالفن والطرب الشعبي- وإحاطة بالمشاهير

بحال أصالة و نانسي والزغبي- إنما هاذ المشروع ما نبداو فيه .. حتى نذخلو عليه تحسينات و شرمولة-تلقطها لوذن بكل

 

سهولة-أنت سخن الطرح بالطر مهبولة- مليكة في الموال

محلولة- والولد يحضي الشكارة ويضرب على قلبو لبساطل

والبقولة.

 

سعاد

وأكثر من هذا انا بتخالل لعروسة مرهونة- وفي التكشيطة

يدي متقونة.

 

مليكة

لعليا أبابا نحمي ليك السوق بمولاي التهامي .. وراه عندي

من قول في القوافي و المرامي .

الحاج فروج

والآن من عجبكم المشروع و ما عندكم لا مانع ولا ممنوع

نتوكلو على الله بالشروع في الموضوع ..

يا الله امليكة- جيبي اقلام ورقة- وأنت اخدوج وقفي قبالتي

و رد عليا هاذ التحسينات و التقليعات- حيث هما السر

وشرمولة ديال ستار نكافتي-      

 

مليكة

يا الله     ثلاثة- جوج – واحد-      أكشن .

الحاج فروج :وهو يغني خدوج ومليكة يردان عليه :

 

العروسة        مرهونة           غير بليغة  مدفونة

العروسة        مرهونة           في الحب  مجنونة

العروسة     يا   الهمة          غير كباب وهركمة

 

 

ها الثمر   ها البلوط        ها   الحنان فلقطوط

سعاد

وبلاش هاذ البلوط ولقطوط

الحاج فروج

يا البهلة- البلوط عليه الطلب د القرود- أما القطوط 

برجيت باردو   دارولها الشهرة بالخيوط -   وها المعنى بان.

 

ها البطيخ   ها البرقوق     ها   بوعويدة     مسلوق

سعاد

ويلي بلا  بطيخ

الحاج فروج

يا البهلة – البطيخ كناكلوه شنوف ..والشنوف بحال الهلال

والهلال جاي من القمر الخلاب ..          وها المعنى  بان .

 

ها الورد  ها القسبور             ها الرجيم  ها  السبور

 

سعاد

وبلاش هاذ القسبور

الحاج فروج

يا البهلة – القسبور هو العمود الفقري د الحريرة و العيلات

ما عندهم الدقة بالمطرقة غير فالحريرة-   ها المعنى بان

 

ها  غريبة  ها   سلو          ها البير   حداه   دلو

 

 

سعاد

ولي .. ولي .. شنو معانت البير و الدلو ؟

 

الحاج فروج

سر العيلات موجود غير في الببر – النهار لي يبغيو يطلعوه

خصهم و لابد من الدلو المربوط- يا انا لي حداك ما شي دلو

 

العروسة   تدور           الشيطان    مقهور

العروسة بالفور            سكسو      تيفور 

سعاد

ولاش هاذ سكسو تيفور ؟

الحاج فروج

الالا – راها  لمرا الحرشة هي لي  عندها جوابها على

طرف لسانها  تيخرج بحال الزوبيا د العافيا- ها المعنى بان

 

هز عينيك وشوف    الزين         حروفو غير الكرنين

هز عينيك وشوف الغروب         لا     تفكر فالهروب

 

سعاد

اوا هنا لا بد يتخلع العروس

الحاج فروج

أخلاص الالا .. راه حنا الرجال واعيين وعارفين

دخول الحمام ماشي بحال خروجو ..

 

يا الله ردوا عليا – هاذ الكلمات خاصين بلالا العروسة

وهي بالتخالل

العروسة  يا   الوطنية       والله ما أنت       حرطانية

العروسة  يا الرباطية        والله ما أنت       سراطية

العروسة  يا البضاوية       والله ماانت       خوايضية

العروسة  يا   الفاسية        والله ما أنت        رواسية

 

العروسة  يا السوسية        والله ما أنت        سباسية

العروسة  يا   الجبلية        والله ما أنت         مجلية

العروسة  يا الوجدية         والله ما أنت           جنية

العروسة  يا المراكشية      والله ما أنت       خبايشية   

 

في هذه الأثناء يصمت الجميع لان الجارة تدق على الباب

وهي تنادي على سعاد لفتح الباب لأمر مهم .

 

سعادبصوت منخفض :

الحاج هذي جارتنا طامو .. راها بوق فالبلاد ..مشهورة

عند لعباد .. بالتحرميات  ..روضات راجلها غير بالجباد

ندخلوها تخدم معنا فمجال الإشهار .

 

طامو

السلام عليكم – أسمعت الدنا – وحلاوة المغنى – الله يخليكم

ديما رباعي أمنا – وباش ما نطولش عليكم حيث انا مزروبة

راه راجلي دار واحد المشروع وبصفتكم جيرانا كيطلب منكم

تعاونوه وتشجعوه  وهذي هي – لكارت فزيت -

 

 

الحاج فروج

مبارك ومسعود عليكم – قرا الالا طامو  شنو فلكارت فزيت

 

 

طامو

          من أراد النشاط         والتنشيط حتى يشيط

  عندنا نكافة بالترجمان        والمغنى مطيح الثمان

  التخالل    من   عندنا             الواجب من عندكم

        دامت لكم الأفراح       بعد الله عليكم الأحزان

ودبا بالسلامة حيث ما زال ندور ثلاثة د الحومات

بهاذ لكارت فزيت .

 

الحاج فروج  :   مخاطبا ابنته بعد أن خرجت طامو

مليكة بنتي .. وقلى نخرجو لها نيشان ..

 جمعي شنطتك وحتى شنطتي – نمشيو

 

لعند ستار هاك أجمي أنت غني شويكار وانا نغني شكوكو.


« المقالة السابقة

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق