]]>
خواطر :
الحياة الدنيا مثلها امرأة ، تراها من بعيد جمالا براقا لتكتشف أن كل شيء فيها مصطنع ... من رموش العين إلى احمرار الخدين والشفتين إلى طاقم الأسنان الناصع البياض...   (بلقسام حمدان العربي الإدريسي) . 

قصيدة شهر رمضان

بواسطة: ياسر شرف  |  بتاريخ: 2014-06-08 ، الوقت: 21:30:05
  • تقييم المقالة:

قصيدة شهر رمضان

==============

حلو يا حلو رمضان يفتح محله حلو يا حلو رمضان كريم يا حلو

تواشيح فوازير قران اذكار كله موجود يا حلو

اشتقنا لك يوم ورا يوم شهر محبة والزكاة والصوم

روايحك هالة بالنفحات في سبحة خير مليانة بركات

شهر وواحد طوال العام لما يزورنا نبقي تمام

وعلي المغرب نستني اذان ونفطر طبعا ده في رمضان

ومن ازمان نفس العنوان مغرب تراويح والفجر اذان

يجي ويمر زي الهمسات شهر الخير شهر البركات

شهر المحبة والذكريات بيفكرنا بكل ما فات

كنا زمان نستني اذان على طبلية ويا جيران

مدفع بيضرب علي افطار وكله يهيص للافطار

فراخ مشوية ورز معمر ولحمة بشوربة ورومي محمر

وفول طعمية مع بتنجان ويا الكشري والدقة كمان

ومخلل حامى وطاجن  بامية والمحشى صوابع والبطة الغالية

وخشاف وفواكه مع قمرالدين بسبوسة هريسة مع جوزة الطيب

تمر ده هندى مع الخروب والكركديه مع عرقسوس

اشرب واروى ريقك يا صايم وانت يا تيتو وحد الدايم

كلنا نتلم احباب وجيران حتى الاقباط  شاركونا كمان

وكله يتبادل اطباق اليوم والروح الحلوة تفضل على طول

ولاجوع وعطش فى صيام اليوم دى ملايكة بتسقينا على طول

كله يصوم حتى الاطفال دى عادة برضه فرضها الرحمن

وصيام عن اكل ولغو كمان قران وذكر وقيام الليل

وعم عكاشة يلف كنافة يحشيها بندق تبقى بغاشة

وعلى الفطار موائد رحمن وبتنتشر ده فى كل مكان

كله بياكل من فضل الله لا فقير يجوع ولا ناس تنساه

ويا ريت ده يفضل طوال العام والرحمة تفضل هى العنوان

وفوانيس بتدور وتنور نور ده فى ايد اطفال تضحك بسرور

حلو يا حلو رمضان كريم يا حلو

افتح  الشيش وادينا بقشيش رمضان كريم يا حلو

والنقشبندى بتواشيحه يهز وجدانا بمديحه

واصوات شيوخ تشجى الاسماع رفعت شعيشع فى المذياع

والبمب يطرقع فى كل مكان تعبيرعن فرحة وكسر صيام

ومدفع يطلع يضرب وبفرحة ناكل ونشرب

وعلى صوت الراديو نسمع فوازير وحلو ياحلو الخير ده كتير

والف ليلة وليلة وشهرزاد  تجذب فى عقولنا زى المعتاد

وفوازير تشغلنا فى التليفزيون وتواشيح دينية ده بطول اليوم

اضواء المسرح وفطوطة ونيلى  وشريهان تبهرنا والباقى شاغلنى

والشيشة تكركر ويا الدخان على القهوة وفى كل مكان

احياء شعبية زى الجمالية وحسين وغورية والسيدة زينب

وصلاة تراويح يعقبها مديح وقران وذكر وقيام الليل

والناس فرحانة تنزل تتفرج على كل محل جوه تتسوق

ونستنى كمان ده فى ليلة القدر نسهر ما ننام وبندعى الفجر

نتمنى ننول كل الامال ومصرنا تبقى فى خير وسلام

ولو كنت غاوى تنزل فيشاوى تشوف وتسمع كلام قهاوى 

نجيب وصفوة كل الادباء كانوا بيسهروا هنا بالذات

وعلى السحور نسهر ونقول لازم نخلص طبق الفول

وعم زناتى ده مسحراتى يدق الطبلة ليلاتى يوماتى

اصحى يا عبده قومى يا نادية وانت يا حنكش ليلتكم نادية

اصحى اتسحر طبق الفول مع طعمية وشاى معمول

ويفوت بسرعة ده رمضان والعيد روايحه تهل كمان

فى زقاق فى حارة فى كل مكان احباب جيران نتلم كمان

وفى الصاجات اشكال والوان من كعك عيد خبرة فنان

ونشيل صاجات وعلى الافران نروح نسوى الكعك هناك

ونعود نوزع على الجيران احباب قرايب او سكان

ده كعك بلدى وبعجوة بلدى وخميرة بلدى وسمن بلدى

ونقول ده نفحة من اهل الخير وكل عام وانتم بخير

ويدونا برضه اطباق نفحات والروح جميلة مع البركات

رمضان ده شهر كريم وعظيم حاربنا فيه تلاتة وسبعين

فى الجنة شهدا كتيرعايشين وبالنصر برضه مافيش المستحيل

ورجعنا سينا من الاستعمار لمصر بجنودها الابطال

يارب دايما من نصر لنصر والعزة هى الرمز لمصر

مع تحيات الفقير الى الله ياسر شرف- كبير محررين مترجمين بقطاع الاخبار- الاذاعة والتلفزيون

YSHARAF37@GMAIL.COM- 01005285578

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق