]]>
خواطر :
الحياة الدنيا مثلها امرأة ، تراها من بعيد جمالا براقا لتكتشف أن كل شيء فيها مصطنع ... من رموش العين إلى احمرار الخدين والشفتين إلى طاقم الأسنان الناصع البياض...   (بلقسام حمدان العربي الإدريسي) . 

اوبريت انجازات حكومة الفساد

بواسطة: ياسر شرف  |  بتاريخ: 2014-04-18 ، الوقت: 22:39:37
  • تقييم المقالة:
 اوبريت انجازات حكومة الفساد =================

تتركز الكاميرا على مؤتمر ملتقى انجازات حكومة الفساد وبصفة خاصة على المنصه التى تتيح لكل مسئول ذكر انجازات فساده فى محيط عمله والتباهى بذلك وهذا من محض الخيال ولكنه يعبر عن الواقع فى صورة زجلية هزلية ساخرة لتجسيم مدى حجم هذه الانجازات الاعجازية وتعطى الكلمة للمسئول عن التعليم وتتركز الكاميرا عليه ويقول:

يااللى اتحرمتوا من التعليم الفرصة لسه قدامكوا

 لازم  حتدفعوا  بالملايين  ودروس كتيرة  تعلمكم

مصاريف كتيرة فى مدارس ودروس فى سنتر للفارس

الفصل فيه سبعين ثمانين والفهم فيه بقى زفت وطين

عشان كده كلكوا شاهدين الدرس هو الحل اكيد

والفايدة تبقى للطرفين والكادر يسند برده الزير

ونرفع فى مستوى للتعليم بفلوس كتيرة وبالتبذير

والمدرسة بتفيد كانتين ياكلوا ويشربوا بنى ادمين

ودروس كتيرة خصوصية بتفيد وتملا فى عنيا

حلول كتيرة بانجازات والفضل ده ليا بالذات

تحديث وتطوير بالملايين وبفعل برده اكيد شاهدين

لازم يمدوا لى فى الخدمة انجاز بهمة  اكيد  خدمة

وبدل ما يكتبوا بالطباشير تابلت ده صحى للملايين

وبدل ما يقعدوا كسلانين يقفوا قيام كده منتبهين

وبدل الوجبة الصحية يمارسوا رياضة بجدية

ويدفعوا مصاريف ده كتير من اجل اصلاح التعليم

ونزيد فى قيمة الخصوصية للاجل الحياه الوردية

لو شبعوا يعنى المدرسين يبقى عيالكم اكيد فاهمين

وتكتروا اكل من الفول كاد المعلم ان يكون رسول

وتبطلوا شكوى بالذات قال يعنى هم سبب ازمات

لو فى حقيقى مال سايب يبقى السبب طالب خايب

ده هو برده مربى اصيل وخرجوا منه جيل وراجيل

يبقى العدالة الاجتماعية لونرفعه برده شوية

 

-ثم تنتقل الكاميرا على مسئول الصحة ليلقى كلمته ويقول:

وظيفتنا هى قتل الداء والصحة فلة واجمل تاج

امراض كتيرة الفيروسات لا يهمنا احنا العضلات

لو زرتوا مرة مستشفيات فى قرى ونجوع كل محافظات

فيروس حيهرب بالاشارات ويخاف يموت من كتر اهات

دى سياسة واعية وطبية تطفيش بشدة وجدية

فشل ده كلوى وفيروس سى لازم نحاربه منه فيه

نظافة عالية وكمان تعقيم لكل حتة تحت السرير

بلا لكلكة وكمان حكايات السرهو قلة امكانيات

حنجيب منين ده كتير ملايات ومرتبة لسرير بالذات

الحل هو الارض اكيد مريض عليها بيبقى سعيد

ومخكوا مايروحش بعيد دى اخر نضافة مع التعقيم

احنا الدكاترة العملية لازم نحدد فى العملية

مريض بيعمل عملية بدل لوز بنشيل كلية

احنا اللى ادرى بظروفنا ولاحد يقدر يكشفنا

وبنج نكرم اى مريض لو عاش ده ممكن مرضه يزيد

تعداد وزايد للسكان لو نظبطه حنعيش فى امان

تطهير معالجة طبية فى اى وحدة صحية

عايزينها حكمة علاجية لازم تزيد الميزانية

مستشفى ميرى وحكومية احسن كمان من الخصوصية

لو كنت بتعانى مرارة بنشيلها فورا بالفارة

كليه وفشة مع القولون وكبدة بلدى فى طبق اليوم

شرايين وشايلة كوليسترول نغسل ننظف اى دهون

 ولو جرح ظاهرده فى رجليك تلقى الملايكة كتير حواليك

واللى يموت نعتبره شهيد حسنات ياخدها ويبقى سعيد

علاج وشافى من الدكتور والكل يجى عليه الدور

ولو حاخدمك تبقى صديقى والحب عندى اكلينيكي

 

-ثم تنتقل الكاميرا على مسئول الكهرباء ويقول:

لا كهربا ولا قطع فى نور شركتنا شركة هنا وسرور

تحط مرة فى الفيشة تبقى الحياة احلى معيشة

تلاجة مكوة غسالة عداد بيحسب بندالة

اسعارنا غالية وفى العالى وحوافزنا حلوة بتحلى لى

تحصيلنا فيه قسم نضافة تدفغ بخفة ولطافة

واذا كنت عاوز توصيلة ادفع وخدلك تعسيلة

عايزين نوفر فى الطاقة نقطع نوصل ببساطة

ويوصفونا بالتبذير عواميد فى نور على طول والعين

دى خدمة دايمة لمستهلك ونور حياته بيستهلك

ولما نقطع فى التيار نرده اقوى يقولوا دمار

يعنى لا ضلمة بتنفع جار ولاحتى فى رجوع التيار

ايه يعنى اجهزة كهربائية تبوظ وتعطل يا عنيا

ما تجيبوا كله جديد فى جديد وتبقى حياتكوا عيد ورا عيد

وتنفعوا الشركات اللى هى تبيع الات كهربائية

وبيسألوا ليه التيار بينقطع ليل ويا نهار

توفير لطاقة كهربائية وتجديد لقوة وحيوية

وتناموا بدرى ومن تانى تصحوا وتشتغلوا يوماتى

كشاف ينور فى بيوتكوا احسن ما حد بيكشفكوا

ومولد الطاقة بيجيب نور ويزيدكوا قدرة وهنا وسرور

يااما تبنوا من تانى محطة بالسد العالى

لكن فى تحصيل الفواتير لازم بتدفعوا بالتساهيل

لازم ده نرجع لطبيعة شمس وقمر طاقة عظيمة

وبلاها طاقة كهربائية وكفاية قدرة ربانية

نسهر نصلى زى زمان تسبيح وحمد للرحمن

 

-ثم تنتقل الكاميرا على مسئول المواد التموينية ويقول:

زيوت بقول او طعمية ومواد كتير تموينية

اسعارها حلوة ورخيصة ومتاحة دايما يا نفيسة

ومايهمناش الصلاحية تواريخ وتتغير هى

لحوم وفاسدة ومعروفة بمعالجة تستاهل بوسة

خلى الفقير ياكل لحمة بأسعار قليلة ومتساهلة

وحتى لو كان لحم حمار ربك بيستر يا ستار

دقيق وعدس ومكرونة وفول مدمس ويا صابونة

تسويس وممكن كده نداريه والبركة تطرح فى اللى شاريه

ودقيق ده يعنى رغيف العيش واكشاك يبيعه برده الجيش

مخبوز بردة وبرادة حديد واللى بيأكله صحته بتزيد

والوزن ناقص حبة شوية وياريت بيظهر حواليا

ده الخبز مدعوم للانسان مش للمعيز او للاغنام

بنزين مدعم ويا سولار مش بتلاقيه والعقل احتار

وانبوبة مدعومة بالبوتاجاز مش بتلاقيها لكل الناس

لازم نقنن فى التدعيم والسعر يبقى متاح للغير

والخضروات ويا الفاكهة اسعارها تنبع من ذاتها

ويقولوا زيت العربيات للقلى وكمان لاعتبارات

حرام عليكوا برده يا ناس ده زيت ذرة وميزانه حساس

يمكن فى غش وتجارى لكن المفتش اكيد دارى

وبيعملوا برده محاضر وتاجرنا غايب مش حاضر

كله بيلزمه تسوية والدفع يبقى بحنية

والصوم عقيدة روحية وفوايده ميه على ميه

صوموا تصحوا يا بنى ادمين عن اللحوم وليوم الدين

 

 

-ثم تنتقل الكاميرا على مسئول الداخلية ويقول:

الامن ده من تدبيرى رائد مقدم ده زميلى

والشرطة برده فى خدمة شعب يمشى فى حاله وبدون كعب

مجرم حرامى بنبقى وراه مرشد يفيدنا بنبقى معاه

تهريب نراقب فى مخدرات نقبض بشدة على العصابات

احراز كتيرة طرب فى حشيش لو رتبة تاخد كده بقشيش

وبانج وترامادول او افيون اللى يجيبها اكيد ملعون

لو قتل يحصل فى قضية لازم نتابعه بجدية

ونقبض على القاتل فى الحال بفتنة لينا وكتر سؤال

ومرشدينا فى كل مكان بيخبرونا فى كل الاحوال

والجانى يخضع لاستجواب بالعافية بالذوق يدى جواب

ويقولوا ده اسمه ارهاب لكن ضرورى لجناة وكلاب

تلفيق وتعذيب بشرية وظباطنا ياخدوا الترقية

وياما فى الحبس كتير مظاليم يقولوا احنا معتقلين

اهدافنا وحدة قومية بدون مشاكل امنية

اعداء كتيرة بره وجوه نكسر ايديهم ده بالقوة

مظاهرات كتيرة وفئوية عايزها فتنة طائفية

بالمية بس نفرقهم وغازات مسيلة تشرقهم

ويضروبنا بالخراطيش وذخيرة حية معانا مفيش

ويقولوا برده حقوق انسان فى كل حارة واى زمان

ده امن قومى لبلدنا وميراث بطولة لاحفادنا

جريمة جنحة جنائية تعمل مشاكل امنية

وزحام مرور ده فى كل مكان فى اى وقت وفى اى مكان

كله يخالف فى الاشارات بسيارات اوموتوسيكلات

ومهما كان تحرير غرامات برده بيكسروا فى الاشارات

ويساعدوا برده الامناء برشوة حلوة بكل ذكاء

وفيها ايه لو نتعاون مخبر وشرطى ومعاون

 

-ثم تنتقل الكاميرا على مسئول الاقتصاد ويقول:

الاقتصاد يعنى محطات تزيد تمول كل نشاط

تغيير فى عملة للى شاريه بيزيد فى ربحه ونشارك فيه

فرص كتيرة لاستثمار واراضى شاسعة للتجار

رخص مصانع ممنوحة اسمنت وحديد فى سموحة

وكل مايزيد الشطار فى الدفع يبقى الاستثمار

مزاد يخلى العقل احتار وهو ده الاحتكار

الفكرة برده فى التمويل وده الفرق بينه واى عميل

يرش رشة كده جريئة واهدافنا برده كده بريئة

وفى النهاية ده احلى حصاد يفيد ويخدم الاقتصاد

بين الدول كله مصالح وبرؤية واحدة بنتصالح

يعنى مكانى وانا مسئول بيجيب كباب وبلاش الفول

ودى فترة واحدة اقدرها وفرصة لى استثمرها

وفيها ايه لو نتشارك بدل مانفضل نتعارك

ده قانون ومعروف دايما فوق والصفوة هم حيتان السوق

اصحاب مصانع شغالة ويزيدوا دايما فى عمالة

يعنى يحلوا فى بطالة وفلوسهم دايرة ودوارة

طب ليه دى غيرة ويانا ده راس مال يبقى امانة

لازم نشجع الاستثمار بثورة اصحابها احرار

لكن حتبقى فى طبقات غنى وفقير وللاعتبارات

يعنى دى نخبة وكمان قواد بتزيد وتثرى الاقتصاد

عايزين نبارك لجهودهم ونضم ايدنا لمعروفهم

شركات كبيرة ومساهمة وبنوك تغير الازمة

 

وتنتقل الكاميرا الى مسئول الشباب والرياضة ويقول:

شبابنا واعى كده مسئول بيحب ياكل دايما فول

كرة القدم كده شعبية فى كل المراكز الرياضية

وفى شوارعنا برضه وحوارينا بيلعبوا بالتقسيمة

ماهى المراكز الرياضية محدودة جدا يا عنيا

ولو قلنا لازم نبنيها لازم تزيد الميزانية

وبرضه عندنا كذا لعبات بتجيب كؤوس وميداليات

والفضل برضه اكيد ليا راعى الالعاب الرياضية

حوافز كتيرة لينا مادية وللاعيبة معنوية

اتحادات كبيرة ورياضية وسفريات كتيرة من الميزانية

مصالح ولازم نقضيها وشركات رياضة بترعيها

كتير بنكسب فى مسابقات والفضل برضه لاتحادات

اصل القيادة الواعية اكيد اصل التفوق بالتحديد

محاسيبنا لازم نراعيها تعين عقود لكل شريحة

شبابنا هو شباب القلب واعدائنا هم ولاد الكلب

وعلم بلدنا بيرفرف فى كل حتة ويهفهف

كرة القدم دى تسلية لشبابنا بدل السياسية

التراس رياضى بيشجع بكل شدة ويطرقع

العاب قوى ويا سباحة كاراتيه وجودو بفلاحة

احنا الامل وهم الاشبال تشكيل فى لجنة ونصبح عال

القوة هى رأس المال بتزيد بشدة مع الاجيال

ولو فى شيكات تتمضى بالذات يقولوا برضه علينا فساد

اعداء نجاح وكلاب حساد والغيرة منا بتبقى الفساد

 

وتنتقل الكاميرا لتتركز على مسئول البترول ويقول:

مواردنا حلوة وطبيعية من الابار البترولية

وعندنا اكتفاء ذاتى يخلص بسرعة يا حياتى

بنزين سولار او زفت وقار ومعامل تكرر ليل ونهار

ويقولوا ثروة قومية ده يدوب رواتبنا الشهرية

الخير ده لينا ومتقسم ولا حد غيرنا حنقسم

ويحسدونا ليل ونهار دخولنا عالية مجهود جبار

حقول جديدة تطلع غاز وبرضه يعنى مافيش بوتاجاز

ويقولوا ليه يعنى التصدير دى فايدة ليا ورزق كتير

مصالح كتيرة بنقضيها عايزة المجاملة بنراعيها

ويقولوا يعنى اسمه فساد لكن دى غيرة من الاعداء

بترول ده يعنى استثمار ودخل لينا بيورو ودولار

بنزين ده قلة ويا سولار طوابير عليها ليل ونهار

والطاقة كاملة وحيوية وسط المشاكل اليومية

تشغيل مصانع يعنى وقود والدفع لازم ويا عقود

والازمة دايما ازمة غاز يطير ويهرب من البوتاجاز

خبرا بيحفروا بريمة جنسيات كتيرة وشغيلة

مصالحنا هى مصالحهم وبترولنا دايما يفرحهم

هى السياسة خدنا وهات وسولار ضرورى لمحطات

جهد وضرورى للاقتصاد والفايدة دايما للاحفاد

دى حياتنا دايما وردية تدينا طاقة وحيوية

   مع تحيات الفقير الى الله ياسر شرف- كبير محررين مترجمين بقطاع الاخبار- الاذاعة والتلفزيون YSHARAF37@GMAIL.COM- 01005285578

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق