]]>
خواطر :
ما الحياة الدنيا إلا أمواج في مد و جزر مستمر... أرحام تدفع و تراب يبلع...   (بلقسام حمدان العربي الإدريسي) . 

جمهورية الموز و القضاة

بواسطة: Mhmd Abd Elkreem  |  بتاريخ: 2014-03-12 ، الوقت: 00:08:57
  • تقييم المقالة:

حجم الدعم و معدل الصرف الحكومي وصل في أواخر عهد مبارك لـ 10 - 15 دولار للفرد سنوياً شامل التموين و الصرف التعليمي و دعم المحروقات الخ ... و التقسيمة دي تقسيمة بمعدل المتوسط ( يعني من غير مراعاة حجم الدعم المصروف على غير مستحقيه ) ... و أعتقد إنه قل نسبياً إلى حد كبير بعد تقلبات الفترة الإنتقالية الإقتصادية و الإدارة الفاشلة لحكومات مجلس طنطاوي العسكري ... و ظل كما هو عليه حالياً ...

70 % من حجم الدعم بيوصل لغير مستحقيه ... من غير المستحقين دول مصانع السماد و الاسمنت اللي بتستهلك حوالي تلتين الطاقة المدعومة ... ميزانية الدعم 157 مليار جنيه .... أو 157 مليار ج ل 60 مليون مواطن ... يعني 25 مليون مواطن بيستفيدوا بـ 109 مليار دعم ...و حوالي 45 مليون مواطن بيستفيدوا بـ 48 مليار ج ..... و  الـ 45 مليون دول هما مستحقي الدعم ... يعني حوالي من 10 لـ 20 ج للفرد ..؟؟؟!! .... يعني مستحق الدعم بيتصرف عليه سنوياً من 10 لـ 20 ج ... و مفيش إمكانية لتنظيم الموضوع ده إلا بخلع البيروقراطية ( الحاكمة ) ...
يعني الدولة متجيش تشتغلنا هيا و وزير دفاعها و تحسسنا إن البلد واقفة بسبب الدعم اللي بيتصرف ع المواطن ... و اللي من أقل معدلات الدعم المصروفة على مواطن في العالم .........

////////  

 

مبدئياً لو قرارات لجنة الإنتخابات الرئاسية إدارية فلا يجوز تحصينها و يجوز الطعن عليها بالإلغاء من المتضرر و تحصينها مخالف للمادة 97 من دستور 98%  نعم .. اللجنة قضائية و قرارها إداري مش قضائي .... و بصراحة حاجة تدعوا للإستغراب إن الجماعة يخالفوا نص صريح ( مادة 97 ) في أعظم دستور في العالم 2 .... و بعدين لو كانت القوات المسلحة محروقة و مستعجلة أوي كدة على إكتساح عبد الفتاح السيسي كان ممكن تشطب ع المادة 97 أو تعدلها .. ماهي قدرة بقى ..   ///// وزير المالية يطلع يقول إن مفيش سيولة في الخزانة العامة و إن العجز هينط لـ 12 % من حجم العجز الحالي ...  تطلع وزارة الداخلية بتصريح عن نيتها شراء 50 الف قطعة سلاح .. و تزود بدل العلاج و المكافأت ... إيه الموضوع بقى ... البنك المركزي بقى بيطبع دولارات للداخلية ... ولا العجز على التموين و الصحة و الطاقة و الحد الأدنى للأجور بس ... أما لزيادات الداخلية و القوات المسلحة و المستشارين و القضاة فيبقى فيه فائض في الخزانة العامة لإستيراد المستلزمات و زيادة الأجور و البدلات ؟؟  

 

//////   دلوقتي إعلان بييجي فيه جمال شيحة بيدعو فيه المواطنيين للتبرع لمعهد أبحاث أمراض الكبد ... أمال فين الجهاز بتاع إبراهيم عبعاطي اللي تشوار بالإريال على المريض الفيرس يطلع من جسمه على طول و يحوله لسندوتش كفتة يتغذى عليه ؟؟! .. ده بعد الإعجاز العلمي بتاع إبراهيم عبعاطي و الهيئة الهندسية للقوات المسلحة المفروض نقفل مستشفيات مصر كلها بمراكز الأبحاث بوزارة الصحة و كلية الطب و الدكاترة والعيال بتوع علوم بيولوجي يشوفولهم حاجة تانية يشتغلوها بقى ...  

 

/////// قرايبي و أصحابي و معارفي اللي أيدوا عبد الفتاح السيسي و دستور لجنة الخمسين بشكل أعمى و كانوا متفقين مع موجة تخوين  القوى الثورية و بيرددوا ألفاظ زي الطابور الخامس و نشطاء أمريكا و الماسونية العالمية و الهري ده ... بقوا دلوقتي بينتقدوا السلطة الحاكمة ... مش عشان قتلى رابعة و النهضة و مظاهرات تحالف دعم الشرعية و طلاب ضد الانقلاب و سلميتنا أقوى من البتاع و عباقرة الجزيرة مباشر مصر اللي زي حمزة زوبع و القدوسي .............. عشان باسم يوسف و إفيهاته على أركان السلطة الحاكمة و التضييق الشبه دوري و اللي واضح طبعاً إن وراه أمن الدولة و بلطجية الداخلية ( اللي زي مدام إيمان و متظاهري المسرح ) و عربجية القنوات الخاصة .... ربنا يحميك و يحافظ عليك يا باسم يا يوسف  

 

 

/////   دلوقتي لو الفريق مشير فيلد مارشال إترشح هيواجه صعوبات إقتصادية و إضطرابات إجتماعية موروثة و ضخمة و هيحتاج لحلها ؛ مع ندرة الحلول و الموارد و السيولة اللي ممكن يستخدمها لتذليل العقبات و الصعوبات دي ...
و لما بنيجي نقول إن المؤسسة العسكرية إستفادت بشكل كامل من 25 يناير و مخاوف التوريث و إحلال زمرة جمال مبارك محل قيادات العسكري بعد تصفية الشركات القابضة و بقايا قطاع ناصر العام ... فالحل المطروح الوحيد اللي ممكن يتبناه الجحش ( مع إتجاه الدولة للإستجابة أحياناً لبعض الأصوات النقابية و العمالية المطالبة بإعادة بعض الشركات للقطاع العام ) هوا تصفية القطاع الخاص المحلي بشكل كامل مقابل بعض التعويضات المرضية لرجال الأعمال المصريين و ضمه للإدارة المباشرة للحكومة مع الحفاظ على رأس المال الخارجي و المستثمرين الأجانب ( أو التضييق على رجال اعمال مبارك لتصفية أعمالهم في مصر بإصدار قانون للضرايب التصاعدية أو رفع الدعم عن المحروقات اللازمة لتشغيل المصانع ) ... و الحل ده ممكن يبقى منقذ للدولة من زن العمال ولو لفترة بسيطة من الزمن ... و في نفس الوقت هيكون ضربة لرجال أعمال مبارك اللي تسببوا في تهديد النظام السياسي بغشوميتهم و إنتهازيتهم و سرقاتهم اللي إتلطت فيها القوات المسلحة و إضطرت لتصدر المشهد بعد إزاحة مبارك و اللي ترتب عليه فضح قادة الجيش قدام المهتمين بالمجال العام بشكل خاص ... و ده طرح محتمل فقط ...
   

 

////// حصل 3906 مستشار على 512 مليون جنيه فى عامين بالجهات تحت الرقابة ( تقرير المركزي للمحاسبات ) ...
ادوا فرصة لمصر بقى ووقفوا الإضرابات ... البلد مفيهاش فلوس أهي .. :)


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق