]]>
خواطر :
متعجرفة ، ساكنة جزيرة الأوهام ... حطت بها منذ زمان قافلة آتية من مدينة الظلام...الكائنة على أطرف جزر الخيال...   (بلقسام حمدان العربي الإدريسي) . 

اوبريت قهوة الصحبجية

بواسطة: ياسر شرف  |  بتاريخ: 2014-02-09 ، الوقت: 09:18:13
  • تقييم المقالة:
اوبريت قهوة الصحبجية =================

تتركز فكرة الاوبريت على التركيز على قهوة الصحبجية التى بها مجموعة اصحاب يجلسون سويا بصورة شبه يومية ليتبادلوا اطراف الحديث وليحكى كل منهم مواجعه وهمومه للاخرين بصورة زجلية شعبية وتركز على طائفة الصنايعية الحرفيين مع وجود بعض المثقفين فنجد الجزار والسباك والكهربائى والمبيض والنجار والسباك والحداد والسماك والمدرس والمحامى والدكتور وتجمعهم جميعا قعدة الانس والمزاج والتى لاتخلو من شرب الشيشة مع بعض المكيفات بالاضافة للمشاريب التقليدية مثل الشاى والقهوة والجنزبيل والقرفة والسحلب ..........الخ والبعض يلعب الطاولة والباقى يشربون مختلف المشاريب ويستمعون بعضهم لبعض ومن خلال هذه اللوحة الشعبية نتعرف على افكار هؤلاء الصحبجية بصورة زجلية نقدية كوميدية لاتخلو من خفة الدم والتغلغل فى قاع المجتمع بما فيه من سلبيات وايجا بيات ولنقتحم هذا العالم الشعبى الاصيل.

وتدخل الكاميرا لتصور مشهد عام من حى شعبى ثم تنتقل الى قهوة الصحبجية لتصور لنا هذا الاجتماع بين مختلف طبقات الشعب العاملة وتركز على اثنان يلعبان الطاولة وهما شعبان النجار  ومحمود الجزار .                     

ويشاهد هذه المبارة: 

سيد سوكة العجلاتى وهو يشرب الشيشة

عباس ماسورة السباك وهو يشرب الشيشة وشاى

حسين قفلة الكهربائى وهو يشرب الشيشة

انور الدهان المبيض وهو يشرب سجائر مع القهوة

متولى سندان الحداد وهو يشرب الشيشة مع السحلب

برعى الزفر  السماك وهو يشرب الشيشة

ابراهيم سناتر المدرس وهو يشرب سجائر مع الشاى

عبده نفقة المحامى وهو يشرب الشيشة

اسماعيل فياجرا دكتور وهو يشرب الشيشة

مرسى كمرة المهندس وهو يشرب شيشة

على بطيخة فكهانى وهو يشرب الشيشة

شكرى بخاخة مكوجى وهو يشرب الشاى

وشهرة شعبان النجار شعبان الدقماق

وشهرة محمود الجزار محمود الضانى

وتبدا الكاميرا فى التسجيل بالصوت والصورة ما يدور بينهم على التوالى حيث يبدا كل منهم فى الحديث عن نفسه وتجربته الشخصية بصورة زجلية هزلية كوميدية تدخلنا الى عالم الشعبية المصرية ويبدا كل منهم فى حديثه فى البداية عن حالته العاطفية ثم المادية ثم السياسية قبل وبعد الثورة واماله من خلال كادره الحرفى والوظيفى وتتركز الكاميرا بداية على حديث محمود الضانى الجزار وهو يحكى تجربته العاطفية ويقول:

دبحتى قلبى بسكينة وانتى اللى فيهم يا سكينة

غزال بيمشى بغصن البان يدق كعبه فى قلبى جنان

بتلو غالى ومشفى وبلية ضانى وتشفى

عيون دى ساهية ودباحة ورموش بتفرش فى الساحة

يا قناصة حمرا بكلاوى فى زبدة بلدى وانا الغاوى

يافشة عايمة بعود بمبار محشى بلحم والعقل احتار

ياكرشة بيضا ولبانى اكلها وادعك فى سنانى

ياموزة حلوة وانتركوت اول ما اشوفك قلبى ينط

بفتيك ومقلى فى زبدية مخدوم وخالى من اللية

ولسان ومخ وحلويات وطحال وفشة مع البهارات

كندوز مشفى وكوارع وعود ده فارع بقمر طالع

سلختى قلبى وروحى كمان ودبحتى قلبى بكل حنان

يا فخدة بقرى وملفوفة بختم احمر وفسوخة

يا كبدة بلدى بكلاوى يا فتة معمولة بعكاوى

يا ناعمة خالص اه يا نيفة يا عرق تريانكو لطيفة

انا الغطا وانتى الحلة وحبنا ده كباب حلة

يا سجق قلبى ومحشى اهات فلفل مشطشط بالبهارات

يا كفتة جملى بلحمة ورز دقيتى قلبى بصباع رز

يا عيون دى بقرى وجوهرة سلختى روحى يا سكرة

حبك بيشوى ريش قلبى كباب وكفتة وايه ذنبى

لسانك مشغت كم حتة عايزين نشفى ولو حتة

بس اعذرينى يا دهن حياتى الكار بيحكم فى مغازلاتى

================================

ثم ينتقل محمود الضانى للحديث عن احواله المادية والاجتماعية بعد الثورة ويقول:

قالوا لنا ثورة علي الطغيان حتزيد في لحمة وخير وسلام

وعملوها شلة من الثوار واسعار بقت ده كباب فى النار

وكل يوم يعنى اعتصمات ووقوف ده حال لينا بالذات

وناس كتيرة تشوف لحمة تاخذ تصويرة وكده زحمة

وقالوا لنا عيش وبحرية يعنى عدالة اجتماعية

والناس طباعها بتتغير ولاحد طايق يتغير

وقناعات كتيرة سقطت بغباء وظهروا منها كل الاعداء

ياريت كفاية فى مظاهرات وبالعمل نبقى باشوات

وتزول ما بينا سحابة صيف ونعود ونبنى اساس البيت

اعداء كتير جوه وبره لازم نشيلهم بالمره

وبرده الفقير يعنى انسان لازم نساعده فى كل مكان

وتعود لمصر محبتها ونعيش سوا تحت رايتها

شهداء وماتوا فى سلخانة وقالوا القصاص يعنى امانة

عايزينها ثورة فى الانتاج ثورة عمل تبنى لقدام

ونعيد فى نهضة زى زمان يعنى التاريخ وكمان اهرام

ومصر حضن يضمنا بنيل وشمس لاهلنا

با اغلى اسم فى الوجود ورمز دايم للخلود

وعشان ولادنا واحفادنا لازم نطور فى بلدنا

  - ثم تتجه الكاميرا الى شعبان الدقماق النجار لتسجل له بالصوت والصورة تجربته العاطفية والاجتماعية ويقول عن محبوبته: ربطتى عقلى بقلاووظ صلب ودقيتى قلبى بشاكوش حب يا عود وزان تمشى بحركات والكعب يخبط فى محطات يا قرص ملفوف بأبلكاش مدقوق فى قلبى ونقول عاش يا لوح حبيبى بمفصلات يفتح ويقفل كل الحارات شبكتى قلبى بمسمار شك وقفلتى بابه بصمولة ومفك يا كنبة بلدى بمخدات قاعدة فى عقلى على عجلات روحى تهفهف وانا وياك بفتحة سنتى من الشباك صالون ومدهب بالمكياج فوتيه وكرسى والكسوة قماش دولاب حياتى رفوفه حرير بنظرة منك ينط يطير لاكيه وقشرة كده مدهون يقول ده عودك مافيهوش دهون يا مراية ناعمة بالشيفونيرة بنات كتير حاسة بالغيرة ياسرير بملة وكومدينو وجمال وخفة شايفينه يا بامبو زان وغصن البان تمشى تحير فى السكان ماهوجنى قلبى شيكولاتة تدخل وتقعد بقلاطة يارابطة روحى بمفكات فى عروة صينى على عجلات انتى اللى فيهم يا فتكات وشاكوش مكسر قلبى أهات يالوح مغرى فى عقلى كبير محفوظ وثابت بالمسامير يا قرص بلدى وطبلية بقاعدة واصلة لكلاويا مسمار بارومة وكمان قلاووظ يخرم فى قلبى والدنيا حظوظ شباك وباب يفتح بكالون فى عرق حبى واقوم من نوم يا مانجة شجرة بفروع اخشاب عملتى فتحة فى خرم الباب

 

ثم تنتقل الكاميرا لشعبان الدقدماق للحديث عن احواله المادية والاجتماعية بعد الثورة ويقول:

قالوا لنا ثورة علي الطغيان يعنى الخشب اشكال والوان

وعملوها شلة من الثوار واثاث بقى اسعاره كده نار

والناس تفاصل فى المسمار وتقول انى كمان منشار

وكل يوم يعنى اعتصمات ووقوف ده حال لينا بالذات

وناس كتيرة تشوف لحمة تاخذ تصويرة وكده زحمة

وقالوا لنا عيش وبحرية يعنى عدالة اجتماعية

عايزين عدالة على طبلية والفقرا تاكل ملوخية

والناس طباعها بتتغير ولاحد طايق يتغير

وقناعات كتيرة سقطت بغباء وظهروا منها كل الاعداء

ياريت كفاية فى مظاهرات وبالعمل نبقى باشوات

وتزول ما بينا سحابة صيف ونعود ونبنى اساس البيت

اعداء كتير جوه وبره لازم نشيلهم بالمره

وبرده الفقير يعنى انسان لازم نساعده فى كل مكان

وتعود لمصر محبتها ونعيش سوا تحت رايتها

شهداء وماتوا فى سلخانة وقالوا القصاص يعنى امانة

عايزينها ثورة فى الانتاج ثورة عمل تبنى لقدام

ونعيد فى نهضة زى زمان يعنى التاريخ وكمان اهرام

ومصر حضن يضمنا بنيل وشمس لاهلنا

با اغلى اسم فى الوجود ورمز دايم للخلود

وعشان ولادنا واحفادنا لازم نطور فى بلدنا

- ثم تتجه الكاميرا الى عباس ماسورة السباك لتسجل له بالصوت والصورة تجربته العاطفية والاجتماعية ويقول عن محبوبته:

اول ماشفتك يا سماحة وقعت فجاة فى بلاعة

بلاعة بالحب بتجرى طفحت ونطرت على صدرى

وشدتينى برمش جفونك وطلعتينى بسهم عيونك

واسهر اصلح حنفياتى واحط جلدة لمخداتى

ياعود ماسورة تلاتة لنيا توصل لقلبى وللكلية

ياكومبينيشن لصداع حبى اشده ينطر على جنبى

سلكتى عقلى بسلاكة وشديتى قلبى بفتاكة

يا بانيو مليان حنية يغسل همومى وبلاويا

فتحتى روحى بحنفية تفتح تبل الجلابية

ياحوض بوصلة موصولة لقلبى بيزيد فى سخونة

يامجارى حبى البحرية تطفح فى عقلى وكلاويا

بلطتى سريرى ومخداتى سيراميك بحبك ياحياتى

حبك ده دورة ومقفولة فى مجارى قلبى بصمولة

ولوبتمشى بحنية تفتح فى عقلى الحنفية

طيفك ده وصلة يونيفرسال سخان  يولع مابيرحم

دلعك فى قلبى عمود شنيور يخرم بشدة طوال اليوم

عودك مقلووظ فيه بارومة لو نجرده تبقى فاتورة

وفرشتى عقلى بحنية وكانه قاعدة صحية

حبك فى قلبى ده طريحة بيغيروا منه السريحة

يقفل بمحبس ليه اكرة ويفتح شوية من بكره

ياحوض حياتى الصحية تمليه مداعبة وحنية

ياماسورة متر وكم سنتى وصلت لقلبى بالسنتى

وربطتى برده بتشعيرة قفلت بشدة من الغيرة

يا لا ارحمى صواميل قلبى وريحى محبس حبى

يا دش سخن يدفينى بخلاط محبة مش صينى

ولو نويتى تدينى زمبة راح اسد قلبى بستوبا

  - ثم تتجه الكاميرا الى برعى الزفر السماك لتسجل له بالصوت والصورة تجربته العاطفية والاجتماعية ويقول عن محبوبته:

شويتى قلبى يا فتحية يا سمكة بلطى بحنية

حبك مغذى لقلبك كتير فوسفور وزيت وكمان بروتين

سحرنى عودك من الخياشيم احمر طبيعى وشكله جميل

بذيل زعانف يا حورية شبكتى قلبى ياجنية

يابورى مشوى وصيادية فى قلبى معمولة ده صينية

مكاريل حياتى وكمان مقلى فى زيت دموعى اللى بيغلى

سردين ومقلى ومخلل فى بحر حبى بيتحلل

ياكابوريا مشوى ومسلوقة اكلها عايزينها شبكة وخطوبة

يا جمبرى مقلى ومشوى وفوسفور ينور على اهلى

ابيض منور كمان سبيط من لحسة منه افوت فى الحيط

يابياض بقشرة واستاكوزا فى بقى احلى من الموزة

مكرونة بلدى وملفوفة تمشى بخفة ومحروسة

فيليه وناعم كذا حتة نفسى ادوقه ولو حتة

عيون تخبى وتدارى ويقولوا زى الكاليمارى

انشوجة طعمة وحرشة كمان تزيد حلاوة مع الايام

قرموط بيلعب فى المية وانا نفس اشرب من المية

وقار وموسى بعيون حلوين بسهم يضرب بالسكين

مقلى ومشوى وسنجارى ابيض مشطشط للغاوى

شبكتى قلبى يابساريا وقليتى عقلى على ايه ناويا

يا سمكة حلوة بتبلبط فى بحر حبى وبتزقلط

ياكفتة طعمة فى جمبرى تبلتى روحى باالاوى

  - ثم تتجه الكاميرا الى حسين قفلة الكهربائى لتسجل له بالصوت والصورة تجربته العاطفية والاجتماعية ويقول عن محبوبته:

يا نجفة أيدة وبتنور نورتى عقلى المتحير

قمرة ونورك ده طبيعى دخلتى روحى ومعاميعى

يا عمود منور فى حارتنا كهربتى فيشتى فى حتتنا

ولوقفلة تحصل فى الفيشة بياخدوا منك تشعيرة

ولو فولت عالى على التيار منك منظم ليل ونهار

اول ما شفت غصن البان جسمى ده كهرب العمدان

يا شاحنة روحى وحياتى بفولت عالى وكمان واطى

عودك ده سلك بتشعيرة يوصل لقلبى على السيرة

ووسطك ده لمبة كده قلاووظ بتأيد حياتى والدنيا حظوظ

ورجلك دى لمبة كده مسمار تدخل فى قلبى تولع نار

يا موفرة لكل الحارة نورك بيوصل يا سمارة

كشاف فى ضلمة بيهدينا ويبعت فى امننا ده سكينة

لحمتى قلبى بشريط لحام ومن ساعتها عمرى ماانام

يا بواط مشعر فى حياتى بسلك دوبل لاتصالاتى

يا مشترك فى ربيع عمرى بكهربا تسرى فى دمى

يا باريزة واصلة للفيشة بسلك تشعيرته خفيفة

مصدر لقوة ميكانيكية وكمان لطاقة كهربائية

والاجهزة تشحن منك يا كهربا وولعة فى سنك

تلاجة غسالة تلفزيون سخان بيشحن طول اليوم

بمفتاح ايطالى وبتشينو يدوم ويطول فى سنينه

يا كهربة لوحة قلبى ملمسة بقفلة فى جنبى

اسمك منور باللمبات يا نجفة يا زينة الحفلات    

- ثم تتجه الكاميرا الى متولى سندان الحداد  لتسجل له بالصوت والصورة تجربته العاطفية والاجتماعية ويقول عن محبوبته:

بعيون شداد حبيت ده وداد ورموشها شبكة وانا حداد

ملكة جمال وبغصن البان تمشى فى قلبى بدراع سندان

دقتى قلبى بمطرقة وشاكوش وشغل يعنى حلق حوش

وكويتى روحى بفحم الكوك يولع فى حضنى وانا محروس

يا عامود حديد بيلين باوان بنار وولعة على السندان

يا قضيب فى قطر على محطات ينفخ فى عقلى انين واهات

وبشعر تاج ويا فيونكات يطير يهفهف على فلنكات

ابواب حديد وكمان فتحات فى توب محبة لاجمل ستات

شبابيك تطير ببساط الريح تفتح لقلبى ديك بيصيح

يا سلاح معادن ومقصات فى روحى ساكن بدون ايجارات

سكاكين كذالك وكمان اسياخ تثبت فى جنبى واكون مرتاح

يابراده ناعمة ومبشورة فى طيف خيالى اصل وصورة

ياسياخ دى كفتة وكمان طرب تدخل فى قلبى من غير ضرب

ياقوام ده ولعة ولا يهمك الفحم محطوط على سنك

حبك ده ليا مية وزاد يفرش فى قلبى كل وداد

ياوسط ملفوف ومخرم بحزام فى روحى وبيخرم

مسمار بارومة وصليبة محفور فى عقلى ياحبيبة

بس اعذرينى ياقمرة جنان الكار بيحكم عالانسان

- ثم تتجه الكاميرا الىانور الدهان المبيضلتسجل له بالصوت والصورة تجربته العاطفية والاجتماعية ويقول عن محبوبته:

 

يادهان حياتى يابلاستيك وسطك ده احلى من الاستيك

يازيت وبوية ونفط كمان احلى وافضل من سليتال

ياعود وممشوق باالرولة حبك فى قلبى دهانه فلة

قلبك لاكيه ابيض طيب ساكن فى قلبى وقريب

غزال ومرسوم بالفرشة يمشى بدلال من غير فرشة

يا جمال ديكورك فى عنيا كرانيش ورود غالية عليا

يا عامود بتاج شعره محنى يطير بعقلى ويغنى

يا شقة غالية بتشطيب لوكس مدهونة بوية وقلبى يطب

دهنتى عقلى اشكال والوان احمر واصفر وبنى كمان

طيفك يمر من الشباك يزرع فى قلبى لهيب اشواق

يا مرمة واقفة على محارة وزينة بنات كل الحارة

حبك ممعجن حيط قلبى زبداج وجير وانا ايه ذنبى

يا دهان بلاستيك وبيلمع فى ركن عقلى اللى بيسمع

يا رولا بيضا وملفوفة مافيش جمالك يا عروسة

يا فرشة مبلولة فى الجردل ترسم حياتى للاجمل

يا زيت ببوية وحنية منقوش فى قلبى وعنيا

يا علبة بيضا وكاتانيلا تغسل همومى فى فانيلا

يا دهان فى قلبى على سلم اطلع له من غير مااسلم

يا زيت حياتى يا سنية يوتن بيدهن حنية

 

ثم تتجه الكاميرا الى سيد سوكة العجلاتى لتسجل له بالصوت والصورة تجربته العاطفية والاجتماعية ويقول عن محبوبته:

يا عجلة دايرة فى حياتى وبسكليتة لحفلاتى

شبكتى قلبى بجنزير صلب وربطتى عقلى بصمولة صلب

يا عود ومنفوخ فى ضلوعى بنور وايد فى شموعى

يا جادون بيحدف بزوايا فى روحى حب على هوايا

يا مفك لافف بصمولة بعيون دى ساحرة وقمورة

يا شاكوش يدق فى جوانبى دلال وخفة وايه ذنبى

نفختى قلبى بمنفاخ حب وخرمتى عقلى بمسمار صلب

يا كاوتش منفوخ فى حياتى يفيد بشدة العجلاتى

يا كرسى خلفى وامامى فى بسكليتة وعاجبانى

بدال لعجلة واسبانى يطلع لفوق ينزل تانى

يا بسكليتة بتلات عجلات وانتى اللى فيهم يا فتاكات

سباق ورالى كمان دولى اشوفه وانظر من حولى

يا عود مقلووظ  فى بسكليتة يسوقها قلبى بحتة حتة

رياضة حلوة للرجلين وسواقة سهلة تسر العين

يا جرس منبه فى حياتى يرن حب للعجلاتى

منفاخ حياتى بالعجلات ينفخ فى قلبى حنين واهات

وسبقتى حتى الموتوسيكلات بجمال وخفة العجلات

قوام وملفوف كله تمام يلف عقلى حنان وحنان

يا جناح فى عجلة وطيارة يفرش فى قلبى بحرارة   

 

- ثم تتجه الكاميرا الى على بطيخة فكهانى لتسجل له بالصوت والصورة تجربته العاطفية والاجتماعية ويقول عن محبوبته: يا مانجة طارحة على شجرة عصرتى قلبى على شجرة يا بلدى طعمة وزبدية وزارعه روحى بحنية يا فص عقل الفكهانى تعالى جنبى من تانى يا فراولة حمرا على خدودك طارحة وغايرة من عودك يا عصير بيروى العطشان رويتى روحى هيام وحنان يا عنب بناتى وفيومى حافظه فى قلبى وهدومى يا برتقالة بلدى وسكرى بخده اصفر عنبرى توبك ده قشرة ومربى على قلبى ناصية بمحطة يا مشمش بناكله كده باوان بنواه دى حموى من البستان تطلى مرة بضليلة والقلب يفرح يا حليلة يا رطب وعالى عالنخلة اطلع واقابله بالزفة يا قصب مسكر عوده خطير وخده هو خد الجميل يا تين بشوكه وحلاوته يشك قلبى من جنبه يا عيون جميلة وخدود تفاح لو كلته مرة انام وارتاح يا كيوى يدى على جوافة عودك جميل كله نحافة رمان واحمر بفصوصه احب اكله واشوفه يا موز بقشره ومقشر صباع لقلبى وانا مقشفر بطيخة حمرا على خدودها رطب وطارحة على عودها يا خوخ وبلدى وكمان اناناس الضحكة منها بتشفى الناس يا قفص بفاكهة وتسعيرة ابيعه واقعد عالسيرة يا سباط فى قلبى ومدلدل يزيد فى حبى ويفلفل يا ناعمة خالص يا فراولة عودك ده احلى من المانجة يا بلدى حلوة وطبيعية وفاكهة طازة يا تحية كوكتيل حياتى من البستان اشرب واكله اشكال والوان

 

- ثم تتجه الكاميرا الى شكرى بخاخة مكوجى لتسجل له بالصوت والصورة تجربته العاطفية والاجتماعية ويقول عن محبوبته: يا مكوة سخنة فى حياتى تكوى فى روحى وجلبياتى يا مكوة رجل وبتولع معاميع فى قلبى وبتخلع يا دراى كلين كل عيوبى تغسل تنضف فى جيوبى يا ميه حلوة فى بخاخة تبخ عقلى بصراحة عودك ده بوصة يا عروسة بيكوى مصر المحروسة ملفوف وفارش على قماشة يلسع فى قلبى ان عاش غزال فى وسطه حبل غسيل ينشر فى عقلى بالبرسيل زينة بنات كل الحارة تفرد فى روحى بحرارة يا لابسة بمبى وبيهفهف على حبل قلبى اللى بمنشف يا وابور بيغلى بنار حبى يشعل فى عقلى وفى كمى شبكتى قلبى بمشابك على حبل منشر فى غيابك يا نفحة ماشية معدية تسرق فى قلبى وعنيا يا مغسلة لكل اهاتى تشطف حياتى ودمعاتى يا بخار فى قلبى كده مضغوط يفرد ويكوى بالمظبوط يا طرحة بلدى بعباية تطير وتسكن فى هوايا يا غسيل حياتى بجلابية مكوى ومنشور فى عنيا يا توب وابيض من قلبى حطى الغسيل وتعالى جنبى عطرك فى روحى بخاخة ينفخ حياتى بصراحة يا مكوة بلدى بوابور جاز فردتى قلبى ببخار غاز وانتى اللى فيهم يا سنية وكاوية روحى بحنية

- ثم تتجه الكاميرا الى مرسى كمرة المهندس لتسجل له بالصوت والصورة تجربته العاطفية والاجتماعية ويقول عن محبوبته:

ياعود بصبة وخرسانة مصبوب بذمة وامانة

يا اساس ومحفور حنية فى قلبى جوا وعنيا

يا كوبرى موصول ده بعمرى يوصل لقلبى ولفمى

يا فيلا دوبلكس وفاخرة تشطيبها يخلص على سهوة

ياديكور حياتى العملية الوانه حلوة  وطبيعية

ياجدار فى قلبى على محارة يدق دقة بحرارة

ياهندسة زواياها مظبوطة رابطة فى عقلى بصمولة

يا سياخ حديد فى اساس حبى موصول بكمرة كده فى جنبى

وسطك ده مصدر ديناميكا يمسح فى عقلى باستيكة

وبكهربا واستاتيكا يهز يعنى البولوتيكا

يا مغناطيس يجذب روحى ودوا لعقلى وجروحى

بدروم وارض فى عمارة وسطوح فى عقلى بطيارة

يا رابطة قلبى بسقالة تطلع وتنزل ويايا

توبك بفولت وفى العالى يطير يكهرب احوالى

وخطوتك قدرة وطاقة تدق روحى بقلاطة

يا سد عالى لنهر النيل بخصر ملفوف مصرى اصيل

يا ضغط عالى ومتوصل لحرف قلبى المتاثر

يا نور مشع على خدودك يعكس ويلمع على عودك

شبكة طرق صحراوية وفجاة تبقى زراعية

سفلتى قلبى وعنيا بدلال وخفة وحنية

يا موتور مصانع حريمية تنتج انوثة فى الكلية

مصدر لطاقة كهربائية وكل المشاعر الانسانية

- ثم تتجه الكاميرا الى ابراهيم سناتر المدرسلتسجل له بالصوت والصورة تجربته العاطفية والاجتماعية ويقول عن محبوبته:

 

يا حصة اولى فى حياتى اديها حبى واهاتى

يادرس عربى فى سبورة بعيون دى حلوة وسنيورة

رفعتى كان واخوتها وكمان عيلتها وعماتها

ونصبتى ان واخواتها وكمان عيلتها وخالاتها

وجريتى قلبى بجسارة وانتى اللى فيهم يا سمارة

يا مضاف لروحى بالكسرة مجرور لحبك على محطة

والحال دلال كده موصوفة تاكيد لحبى يا عروسة

يا مبتدا فى حياة عمرى خبرك بضمة فى دراع كمى

يا جملة تامة واسمية فى عقلى وبصورة فعلية

واتوه فى عودك وحسابك والجبر موجود فى جوابك

يا هندسة بمنقلة كده مرسومة بدايرة حلوة فى الصورة

برجلتى عقلى وعنيا بزاوية حادة ومنفرجة

حبك مثلث لحياتى ومستطيل ده فى واجباتى

وغصن بان فى الفيزيا يغلى فى روحى بالكيميا

يا معادلة حلوة ومظبوطة فى برج عالى ومحطوطة

تضاريس تبان فى الجغرافيا فى قلبى محفورة على ناصية

يا تاريخ حياتى كتاب مفتوح وبنظرة منك اطب وادوخ

اسمك ده شفرة بكل لغات اقوله يفتح باب لاهات

والرسم مرسوم على عودك تفاح وطارح فى خدودك

رسمتى صورة فى خيالى الوانها حلوة بتحلى لى

يا نشاط رياضى ومتأسس فى جسمى يشحن ويخسس

يا كورس موصوف لحياتى اذاكره دايما ويوماتى

وادى التلامذة فى مجموعة دروس فى  سنتر موضوعة

ولما طيفك بيعدى انسى الفلوس وكمان اسمى

يعنى خسارة ومادية مكسبها حب وحنية

جدول ده حبى ودراسى يطفيه حنينى ومطافى

 

- ثم تتجه الكاميرا الى عبده نفقة المحامىلتسجل له بالصوت والصورة تجربته العاطفية والاجتماعية ويقول عن محبوبته:

 

ياقضية حلوة بتحلى لى مرسومة فى قلبى وخيالى

يارول قضايا ومستنى فى روحى ليه يبعد عنى

يا قاضى محكمة الاسرة تحكم فى قلبى عالسفرة

ياحاجب  بتوبه عيون حبى يطير يهفهف من جنبى

يامذكرة حبى لقاضى وياالتماس واكون راضى

يا جنايات قضايا قانونية دبحتى قلبى بحنية

جنح وبرده مستعجل يحاكموا عقلى المستعجل

مظلوم فى حبى ومستأنف ودليلى شعرى المتحدف

يا هيئة عليا ومستشارين الرحمة لعيون محرومين

يانقابة عامة للمحامين دفوع بتنصف قلب حنين

يا مرافعة خاصة لحياتى سحرك نسانى التزامانى

ولو بعدتى عنى او خفتى حيحيلوا اوراقى للمفتى

عودك مقسم للغاية تقولش رول محشى قضايا

تسجيل لحبى فى عقارى نسانى اهلى وخلانى

وعقود صحيحة وشرعية ونفسى اسيب العزوبية

قاض الغرام قاسى عليا سحر لى قلبى وعنيا

يا حرز اختامه قوية عايزين عدالة شرعية

حرزتى قلبى بشمع احمر على حرز قلبك المتعطر

وشبكتى روحى بكلبشات بأدلة دامغة ومستندات

 

- ثم تتجه الكاميرا الى  اسماعيل فياجرا دكتورلتسجل له بالصوت والصورة تجربته العاطفية والاجتماعية ويقول عن محبوبته:

 

يا ضغط قلبي العالي يا نبض حبي الغالي

ياعيادة واصلة للعيان موقعها قلبي الولاهان

يا حبوب فياجرا وبتنشط محطوطة جنبي وبتشطشط

مضاد حياتي الحيوية وخيالها محفور في عنيا

محلول بيسري في وريدي مفعوله حبي وحنيني

يا ترمومتر قياسي  حبي بيزيد في عقلي وفي جنبي

يا قطرة محطوطة في عنيا اشوفها جنة حواليا

يا كورتيزون كل حياتي ينفخ يزيد كل اهاتي

يا كريم ومرهم لجروحي يزيد في عطرك وتفوحي

عودك سرنجة ومحفورة في عضلي راسم اجمل صورة

فيتامين حياتي الغذائية عيونه بحر وحنية

شراب محطوط في ازازة طعمه يزغزع بلذاذة

سكر في دمي و عروقي بلون خدودك وخدودي

جلوكوز حياتي الصحية يزيد ويكبر في عنيا

خرطوم محبة لشرايينى واصل بصورته لجبيني

عملية خطرة وجراحية تنقذ حياتي العاطفية

دقات تدق في سماعة بخطوة حلوة ودباحة

ياانسولين دمي المسكين وصلك بيشفي كل عليل

يا قطن طبى وشاش كتان مربوط فى قلبى الولهان

شريان وتاجى على جبينك يجرى ويشرب من نيلك

تابلت وموصوف للقولون ينفخ يسيح اى دهون

كوليسترول عالى فى حبى يزيد فى قلبى وفى صدرى

عيونك  بحر ومستشفى ادخل فيه برده واستشفى

يا دوا ومكتوب لحياتى يشفى حنينى واهاتى

ياروشتة موضوعة لقلبى فيزيتتها حبى ومن دمى

 

مع تحيات الفقير الى الله ياسر شرف- كبير محررين مترجمين بقطاع الاخبار- الاذاعة والتلفزيون YSHARAF37@GMAIL.COM- 01005285578

 

 

 

 

   

 

 

 

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق