]]>
خواطر :
اسقيني كاس من رحيق ذكرى وجودك ... لا تتركيه يجف ،كلما جف الكأس ازداد الحنينُ...و لا يطفي شعلة الفؤاد سوى كأس الحنين...   (بلقسام حمدان العربي الإدريسي) . 

اوبريت قطار محافظات مصر

بواسطة: ياسر شرف  |  بتاريخ: 2014-02-09 ، الوقت: 09:16:31
  • تقييم المقالة:
اوبريت قطار محافظات مصر ================

مصر يا امى يا ام الدنيا حضنك دافى لكل الدنيا

نيلك دمى وشمسك ظلى وعطر ترابك احلى كولونيا

وطينك هو معجون قلبى مزروع فيه احلامى وفنى

وشعرك احمر كده متحنى يطير ويهفهف على بيت عمى

شجرك يكبر وزرعك اخضر يعنى دى جنة الرضوان

اصل حضارة عقول جبارة قادت الدنيا بكل مهارة

ارض بتولد بالملايين ويعيش فيها جيل ورا جيل

تاريخ اجدادنا وفخر ولادنا هو ميراثنا فى وادى النيل

قلب عروبة للاوطان وملجأ امن لكل جيران

مغرب عربى وكل الشام والسعودية وليبيا كمان

يجيوا تحضنهم بكل حنان ويعيشوا فيها بخير وسلام

وتاريخ شاهد وكمان محفور دليل وعلامة لكل عصور

جامعة وحاضنة للاديان والاسلام هو العنوان

نفسى الف وفى محطات واهدى تحية لمحافظات

شارع حارة وكل شقوق مركز قرية وكل نجوع

اهل بلدنا الجدعان طينة وفيها اشكال والوان

وروحت مسافر بهمة قوية لعروس بحر الاسكندرية

والبحر ريحته حلوة تهفهف والبورى طعمه بيشعشع

وبحرى بحرى دول بالذات ولازم نزور زنقة ستات

يعنى زيزنيا والازاريطة سان ستيفانو وكمان سموحة

والمنشية وكوم الشقافة مكس وحضرة وراس التين

والورديان ومحرم بك وجليم وبرده جناكليس

ابو قير وعجمى والمندرة قبارى شاطبى وسيدى جابر

والمرسى برده ابو العباس وسيدى بشر اجدع ناس

=============================================

ونعود بسرعة للعاصمة والعاصمة القاهرة

شوارعها كبيرة كمان وحارات ميادين كتيرة مع الزنقات

انوار تولع كده بالليل تسطع تنور نهر النيل

مليانة برده متناقضات يكفى تزور العشوائيات

ابراج كبيرة مع العمارات عشش ومسكونة بالحشرات

تبدا فى يومك هنا مسرور يضيع فى لحظة مع المرور

وساعات تلاقى اعتصمات او حتى تهليل مع مظاهرات

والحركة بركة وكله كلام واراء سياسة وفتوى كمان

والاختلاف هو العنوان لو نتحد حنفوز ياسلام

الفاظ غريبة فى مواصلات وتصير دى لهجة فى اتصلات

اديك فى الجركن تركن اديك كتكوت تطلع وتفوت

لهجة غريبة وكله قلش وافكار مريبة هزل وجد

وشباب مشوش بالحركات موهوم ونفسه فى بطولات

اجناس  كتيرة بكل لغات جاية لمصر ليه بالذات

تفكير ومغلوط كله ظنون خلانى ابقى كده مجنون

ولقبها هو قاهرة المعز و جمالها دايما يزيد ويلز

الطيبة فيها والجدعنة وعروبة برده وفتونة

نفس الف فى حواريها وابوس شبابها واهاليها

جاردن سيتى ويا زمالك بولاق وماسبيرو وكذلك

والسيدة وكمان الحسين جمالية شبرا وباب اللوق

دويقة منشية مقطم وقطامية وباب النصر

وعباسية باب الشعرية والجيش والظاهر والحسينية

فجالة غمرة وكمان رمسيس تحرير ودقى وابو الريش

حلوان معادى ومعصرة مصر القديمة السكرة

والمرج مطرية عين شمس والالف مسكن وعزبة النخل

بساتين وزواية وشرابية باب الوزير واليكنية

دار السلام والدراسة والقلعة موسكى وعتبة كمان

كوبرى وحدايق القبة زيتون وروكسى قصر القبة

مصر الجديدة والميريلاند قصر البارون ومدينة نصر

الوايلى نزهة احمد عصمت حى الخليفة والصليبة

============================

ونعود وبرده للجيزة احياء مراكز كده عزيزة

محافظة مشهورة بالذات بالبدرشين والاهرامات

تاريخها محفور وبكل لغات فى افريقيا وجميع القارات

خوفو وخفرع منقرع فراعنة بانية للهرم

وفيها عاشوا وشيدوا اعظم حضارة فى القدم

ومنها خرجوا واتخرجوا عظماء عباقرة للزمن

سياح بيجوا مبهورين بأثارها لالاف السنين

فخر الحضارة لينا بالذات لمصر كلها والاحفاد

والامريكان يركبوا فى جمال ويلفوا بيها يمين وشمال

على هضبة عالية للاهرام ويصوروا عظمة اجداد

وطلاينة يركبوا فى كاريتة ويزوروا من خمسة لستة

ويشاهدوا فيها شروق الشمس ويقعدوا لغروب الشمس

وفرنجة يركبوا على حصان ويلفوا بيها على الاهرام

ويقولوا احنا كمان فرسان دلوقتى وانتوا كنتوا زمان

ويدخلوا برده الالمان ويزوروا من جوه الاهرام

خوفو وخفرع بالتفصيل ومنقرع وبصبر جميل

ويحللوا ذرات فى تراب فى قبر موصول بالسرداب

ويستنتجوا بعض النظريات تكون حقيقة او حتى سراب

ويدخلوا ممنوع اللمس متحف ده مركب خوفو والشمس

ويصوروا مركب احلام ويحتاروا ازاى عملوها زمان

ويشاهدوا تمثال ابو الهول ويصوروا فيه بجنون

كيت كات ووراق وامبابة منيب هرم عمرانية

فيصل خشب والطالبية مدكور كمان المريوطية

منشاة القناطر وكمان اوسيم كرداسة نمرس حوامدية

وبدرشين  مركز عياط والصف اطفيح والواحات

==========================

ونعود نزور القليوبية بيت الكرم والعمودية

وبنبعت الف تحية لمحافظة القليوبية

وحدودها جيزة وقاهرة والفاكهة فيها عامرة

بنوا فيها سدود وقناطر تفوق الخيال ويا الخاطر

بنها وقليوب وقناطر شبرا وخانكة وكفر شكر

شبين قناطر وكمان طوخ قها وعبور قليوبية

 

ونعود نزور البحيرة مراكزها حلوة وجميلة

وحنينا رمانا فى حيرة لمراكز البحيرة

وفيها فرع لنهر النيل رشيد بشكل يسحر وكمان شيك

ايتاى بارود ابو حمص رشيد حوش عيسى وشبراخيت

دلنجات وادكو و كفر الدوار وكوم حمادة ودمنهور

والمحمودية وابو المطامير و الرحمانية وادي النطرون

 ==========================

ونعود نزور الدقهلية مراكزها حلوة وغنية

وتزور وتقول مين هى فى جمال الدقهلية

وكفاية فيها المنصورة بجمال وخفة احسن صورة

عاصرت دى حملة فرنسية وقهرت لويس والصليبية

ويشهد عليهم دار لقمان وسط البلد معروف بزمان

جمالية ودكرنس ميت سلسلبيل منزلة اجا وبلقاس

شربين وطلخا سنبلاين نبروه وجمصة وميت غمر

منصورة مطرية كردي تمي الامديد وبني عبيد

============================

ونعود نزور  محافظة دمياط واللى مازارها عمره ما ظاط

ولو عايز احلى بلاط حتجيبه من دمياط

يصنعوا فى اثاث وموبيليا بمهارة وصنعة قوية

مصيف جميل وفى رأس البر فى الصيف يجوها ومافيش حر

وكفر سعد وفارسكور والزرقا روضة دمياط وسرو وعزبة البرج

 

ونعود نزور الغربية بهمة عالية وقوية

واللى يزور الغربية حيلاقى مراكزها عفية

مصانع دى غزل فى محلة عالمية وانتاجها فتنا

اقطان وصوف وكمان كتان دقة ومهارة وشياكة جنان

كفر الزيات كده والسنطة بسيون وزفتى وسمنود

محلة كبرى وطنطا قطور الخبرة فيها تلف تدور

==============================

 ونعود نزور الاسماعيلية والحانها يعنى السمسمية

وعروسة يااسماعيلية جوهرة وكمان ساحلية

اجمل مدينة كده فى القناة والعقل منها شت وتاه

برازيل دى مصر وافريقيا والكورة فيها تزيد حته

تل الكبير فايد ابو صير وقنطرة والقصاصين

===============================

ونعود نزور كفر الشيخ مراكزها تضرب شرم الشيخ

وجميلة يا كفر الشيخ ومراكزك اجمل طيف

بحيرة البرلس كلها اسماك مزارع كتيرة هنا وهناك

دسوق وفوه والبرلس بيلا الحامول وكمان قلين

الرياض مطوبس وسيدى سالم

============================

ونعود نزور مرسى مطروح مصيف وبحره كده مفتوح

وكمان مرسى مطروح اماكنها ترد الروح

علمين ومزروعة باالالغام فى حرب عالمية للالمان

سلوم وحدودنا مع ليبيا ولاحد يقدر يغلبنا

حمام علمين برده الضبعة نجيلة برانى والسلوم

================================

ونعود ونزور المنوفية اصل الشهامة الشعبية

ويا عينى على المنوفية شهرة ومعروفة عالمية

رؤساء وقادة اولادها عاشوا وماتوا فى ترابها

والجيش تقول نبض حياتها رمزه ده محفور على بابها

شبين الكوم باجور وقويسنا منوف وتلا مركز شهدا

اشمون سادات بركة السبع

============================

ونعود نزور ده شمال سينا ودى ارضنا رجعت لينا

ولو زورنا شمال سينا مراكزها حلوة جميلة

شاطئ النخيل معروف وجميل وده فى العريش وبشمس اصيل

الشيخ زويد وبير العبد رفح العريش والحسنة كمان

ونعود نزور بور سعيد بلد المقاومة وليها عيد

ويا حلاوة بورسعيد زيارتها ده يوم العيد

تاريخها معروف بالابطال اللى تصدوا للاحتلال

حى شرق عرب والمناخ وحى الزهور وبور فؤاد

============================

ونعود نزور الشرقية بلد الكرم والوطنية

ولما نزور الشرقية تشوف قرانا المصرية

مشهورة دايما بمزروعاتها وفواكها برده وخضرواتها

ابو حماد وابو كبير و الحسينية زقازيق بلبيس الابراهيمية

ديرب نجم فاقوس ههيا مشتول كفر صقر منيا القمح

================================

ونعود نزور ده جنوب سينا ودى ارضنا غالية علينا

ونقول جميلة جنوب سينا دهب نويبع ابو زنيمة

وفيها كلم موسى ربه فى الطور وكتر من حمده

ويجى لها دايما اهل الدين يزوروا دير سانت كاترين

ابو رديس ونوبيع دهب وراس سدر وطور سينا

وسانت كاترين وشرم الشيخ

====================================

ونعود نزور برده السويس بالسمسمية وعم عويس

محافظتنا حلوة وهى سويس لا تقول سوريا ولا بلبيس

ابطال وماتوا على ترابها يحموا القناة ويأمنوا بابها

حى عتاقة والاربعين وحى جناين وبور توفيق

====================================

ونعود نزور اسوان يا سلام بسد عالى وبحيرة جنان

هى حدودنا الجنوبية ويا حضارة نوبية

وكانت حدودها النوبة بحضارة باهرة ومعروفة

وفيها جامع للاغا خان وسط جزيرة ولا الاحلام

معابدها فيلة وكلابشة وابو سمبل محفور على رابية

تاريخ بيشهد لكل الناس فراعنة نوبة ياابو العباس

ادفو وكوم امبو ودارو كمان

ناصر سباعى بصيلية ابو سمبل كلابشة رديسية

==========================

ونروح نزور اسيوط مظبوط والصبر فيها مالوش حدود

واسيوط دى محافظة جميلة ونجوعها صغيرة اصيلة

صعايدة رجالة وجدعان واللى يعاشرهم يعيش فى امان

ديروط قوصية  كمان ابنوب ومنفلوط ابوتيج بداري

============================

ونعود نزور بنى سويف اصل الكرم وحبيبة الضيف

والمجد يزيد ويضيف لمراكز بنى سويف

تاريخ وحضارة تطول وتدوم ومبنى فيها هرم ميدوم

الواسطى ناصر اهناسيا ببا والفشن وكمان افوا

===============================

ونعود نزور كده الفيوم وفيها بحيرة قارون

والبط يطير ويعوم من اطسا للفيوم

مشهورة بوادى الريان وحفريات وادى الحيتان

وبط وفراخ فيومى وبيض وزبدة والرومى

ابشواى واطسا والفيوم سنورس وطامية يوسف الصديق

===============================

ونعود نزور الوادى الجديد واللى يزوره يبقى سعيد

وكمان الوادى الجديد واحاته جميلة اكيد

معابد مقابر فى الواحات ونخيل بتمر فى كل جهات

دى خارجة داخلة وفرافرة وواحات كتيرة وفيها وفرة

ونعود نزور كده المنيا عروسة الصعيد وحبايبنا

واللى حيزور المنيا مراكزها تلم الدنيا

تاريخ فراعنة وحضارة مقابرها منقوشة بمهارة

مغاغة بنى مزار وسمالوط مطاى وملوى ودير مواس

العدوة ابو قرقاص والمنيا

==============================

ونعود نزور قنا بالذات بلد الصعايدة والبطولات

ولما نزور قنا بلد الصعيد والجدعنة

تاريخ ومحفور على لوحات داخل المقابر فى نقادة بالذات

ابو تشت فرشوط نجع حمادى دشنا وقفط ونقادة

============================

ونعود نزور البحر الاحمر محافظة واعدة ومدنها تكتر

والبحر الاحمر ساحلية مراكزها حلوة غنية

وساحر بطبيعة تغطس تعوم فى اجمل بيئة

مرسى علم غردقة وقصير وراس غارب سفاجا شلاتين

===============================

ونعود نزور الحلوة سوهاج اصل الرجولة ومصباح وهاج

ولو نزور قريبتنا سوهاج تلقى الكرم والصوت بدعاء

اثارها تشهد على ماضيها والفخر فيها وماليها

اخميم وجرجا والبلينا دار السلام وطهطا والمنشأة

===================================

 

ونعود نزور كده الاقصر معابدها كرنك واقصر

واللى يزور مرة الاقصر تطول سعادته ولاتقصر

اصل الحضارة وتاريخ محفور ونقوشها تشهد بفخر ونور

تلت اثار كل العالم وسياح يجوا لها من العالم

البر شرقى فيه معابد والبر غربى فيه مقابر

ممنون ورامسيوم وحتشبسوت واسرات كتيرة بتاريخ محفوظ

وادى الملوك ويا ملكات وكنج توت منقوش بالذات

دير المدينة وكمان هابو والعظمة فيه وعلى اعتابه

يجوها دايما اثريين وينقبوا ويلاقوا كتير

زى ما جاها كارنرفون ومول ده كارتر بالمليون

وكشفوا لنا كنوز توت عنخ امون اصغر صبى وكمان فرعون

ومقبرة نفرتارى زوجة رمسيس التانى نقوشها حلوة وتحلى لى

قرنة وطود وارمنت اسنا بياضية وزيتية

  مع تحيات الفقير الى الله ياسر شرف- كبير محررين مترجمين بقطاع الاخبار- الاذاعة والتلفزيون YSHARAF37@GMAIL.COM- 01005285578

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق