]]>
خواطر :
قالوا الصبرُ علاج للآلام... فزادت صبرُ السنين للجراح آلاما...   (بلقسام حمدان العربي الإدريسي) . 

التالتة تابتة .. بقلم .. عاطف سنارة

بواسطة: عاطف سنارة  |  بتاريخ: 2013-11-08 ، الوقت: 15:43:20
  • تقييم المقالة:

بدا لي بوجه عبوس وعينين مرهقتين زائغتين .. وجه سؤاله نحوي كطلقة خرطوش : هو في ايه.. ايه ال بيحصل بالظبط .. ؟

بهدوء قلت: تقصد ايه؟  قال: ايه ال بيحصل في البلد ولا انت كمان عامل نفسك مش واخد بالك ؟

تنحنحت وأقصيت عيني عن عينيه : مالها البلد ماهي زي الفل .. اصبر .. اصبروا شوية .. احنا في مرحلة انتقالية يا جماعة  ..

نفث في وجهي غضبه ورد بحنق: باكره الكلمة دي .. بقالنا تلات سنين في الانتقالية دي .. ياعم انا ذنبي ايه  اجيب الباميا ب14 جنيه وانبوبة البوتاجاز ب50 جنيه وفاتورة الكهربا زادت 3 اضعاف .. ولا في امن ولا نظام في اي حاجة ..

بهدوووووء قلت: يا صديقي ..نحن نحارب الارهاب وهذا أمر طبيعي في مثل هذة الظروف ..ان شاء الله هتبقي آخر حلاوة .. انا باقولك أهه وافتكر كلامي .

لا يزال في عنفوان غضبه:- ياعم وماله يحاربو الارهاب ويحاربو الكباب كمان .. وانا ذنبي ايه .. ؟  طيب ما يحاربو الفوضي والفساد والاستهبال .. وبعدين مين بيحارب الارهاب مش الشرطة والجيش .. طيب البهوات التانيين بيتفرجو ..ما يشوفو شغلهم ..

لم أجد ما أرد به فاستطرد هو : تفتكر ممكن نرجع زي الاول ؟؟

بتفائل  قلت له مبشرا : احسن بكتييييييييير

قال: لا انا عاوز بس نبقي زي الاول .. ولا يوم من ايامك يا بو علاء .. الامن كان مستتب وآخر حلاوة .. ولا يوم من ايامك يا حاج مرسي ..المانجة كانت ب5 جنيه  وبرده آخر حلاوة ..

- يا راجل افتكرلنا  ايام كويسة ..امال الناس ثارت عليهم ليه ؟

 - ناس خايبة وانا اولهم ..هي في حاجة اتعدلت ..دي مالت اكتر .. سمعت عن المراسل ال اتعذب ؟؟

 بهدوووووووء  قلت: دي حالات فردية ..مش ظاهرة .

- ما هو فردية جنب فردية بيعملو حاجة كبيرة ..مش خالد سعيد كانت حادثة فردية .. وبعدها كانت ثورة يناير ..تصدق انا  بضرب نفسي بالجزمة ..انا كل ما اثور آخد علي قفاية اكتر ..مش عارف في ايه ؟

  يا عزيزي كله هيبقي فل باذن الله ..-

كأنه لم يسمعني : - تقدر تقولي ليه ما بيطبقوش الحد الاقصي ؟ لمصلحة مين ..تقدر ؟

صمت وفكرت .. ولم أجده بجواري .. وبعد يومين قابلته ومعه علم ..:- انت رايح فين ؟

- خلاص التالتة تابتة .. نازل الشارع ..

 - نازل تعمل ايه؟

 اتظاهر ..جايز تصيب المرة دي .-

 تركني وانصرف .. ناديت عليه والابتسامة منفرجة بها شفتاي : انت معاك تصريح ؟

نظر الي نظرة العاقل الي المجنون .. : تصريح ايه ؟

- تصريح تظاهر ..

 ثم أعطيته ورقة ارشادية بقانون التظاهر .. وانا لا أتمالك نفسي من فرط الضحك الذي تملكني وأنا ابصر نظراته الي الورقة وإليّ..

للتواصل مع الكاتب عبر الفيس بوك : https://www.facebook.com/atef.mahmodsennara

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق