]]>
خواطر :
الحياة الدنيا مثلها امرأة ، تراها من بعيد جمالا براقا لتكتشف أن كل شيء فيها مصطنع ... من رموش العين إلى احمرار الخدين والشفتين إلى طاقم الأسنان الناصع البياض...   (بلقسام حمدان العربي الإدريسي) . 

.. " أمل كدّاب " ..

بواسطة: عمرو ابراهيم سيد أحمد مليجي  |  بتاريخ: 2013-10-21 ، الوقت: 23:26:29
  • تقييم المقالة:

.. " أمل كدّاب " ..
.......................

 

أنا مِنِّك

ورغم الحب متجرّد

من الصحبه ، من الاصحاب

ودا مِنِّك ..

وغصْبن عني هتمرّد

على الدنيا ، على الاحباب

ولا إنِّك

تسيبي الدنيا ترميني

في وسط النار

واعيش جزار

ولو تبكي على حالك

وتحكي الصوره موالك

انا ناوي

اسيب الدمع فـ عيوني

واطاوع

في الهوى ظنوني

ومش ناوي ، ولا غاوي

أعيش العمر متشرّد

وعيشه خراب

ولا ناوي

اكون القاضي والجلاد

ولا عنتر ، ولا شداد

لكن غاوي

أخاصم

فـ الأنا خوفي

وتبقى الكلمة من جوفي

فسامحيني.. 

على عيني ..

انا مش حاتم الطائي

ولا بيرم ، ولا الحداد

ودا مِنِّك ..

فغصبن عني هتمرّد      

وغصبن عني هستورد

"  امل كداب  "

مراتي بالغضب حامل         

سراب في سراب

ولما اتْهادِي واتْجامل

تقول لي حساب

ولما اسرح لي كام ليلة

عشان الرزق والعيلة

تقول هرّاب

ولما افتحلي كام طاقه

وازوَّر صورة فـ بطاقة

تقول نصّاب

ودا مِنّك ..

فغصبن عني هتمرّد      

وغصبن عني هستورد

"  امل كداب  "

انا محتاج لكام بسمه

فـ وش مراتي وعيالي

ويوم الجمعه اتعشى

فـي وسط اعمامي واخوالي

وارُوح السيما والمسرح

واصلي براحتي واتفسح

وانا شايف حمام طايف

ومش خايف

على حالو ولا حالي

من الدبابه والآلي

ولا خايف على بكره

ولا أولادي والاحفاد

أقوم السبت من بدري

اشوف الناس تقوم تجري

ارُوح اسأل يقولوا حْداد

ودا مِنِّك ..

فغصْبن عني هتمرّد      

وغصْبن عني هستورد

"  امل كداب  "

انا كداب !!

انا هرْجع على دينك

وهدْعي ربنا يعينك

تعيدي اللقطه من تاني

وجوه الصوره حطّاني

ولو حتى اكون بوّاب

ولو حتى اكون بوّاب

.............................
.. " عمرو المليجي " ..
مصر 22/10/2013

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق