]]>
خواطر :
متعجرفة ، ساكنة جزيرة الأوهام ... حطت بها منذ زمان قافلة آتية من مدينة الظلام...الكائنة على أطرف جزر الخيال...   (بلقسام حمدان العربي الإدريسي) . 

مش أمينة ...

بواسطة: تسنيم محمد عادل  |  بتاريخ: 2013-10-07 ، الوقت: 12:50:28
  • تقييم المقالة:

 

لو انتى واثقة من نفسك , ونفسك عاجباكى بجد خليكى زى ما انتى وقولى بكل ثقة أنا كده ومفيش غيركده  فى وش أى بنى آدم عايز يشكلك على مزاجه وعايز يرمى كينونتك وقناعاتك على جنب ... اللى مش عجبه ميقربش وخليه يبعد بعيد , ولو عايز يقرب خليه يقرب بس ياريت يفضل فاكر انه لما حب يقرب وقرر يقرب وفعلا قرب , قرب وانتى على وضعك ده اللى بقى متضرر منه بعد كده , فياريت هذا الكائن الهلامى ميفتكرش انه هيخترع الذرة وهيغير مصير حياتك وهيعرف يفرمت شخصيتك ويصطبها على مزاجه وكأنك كنتى مستنية سيادته عشان يعمل نقطة التحول الفظيعة فى حياتك , ويبقى  حضرته صاحب الفضل فى التغيير المطلق اللى هيحصل فى حياتك ..., ساعتها أقفى بالفم المليان و قولى لا وألف لا لحضرته , قولى له يوفر مجهوداته لغيرك لحد يكون محتاج وصايته وخنقته وأوامره ونواهيه , قولى بكل فخر أنا كده ومفيش غير كده عندى مفيش حل تانى ...عارفة تقولى كده ليه مش غرور ولا غطرسة ولا عشان انتى كمان محصلتيش لأ عشان صعب قوى انك تفصص شخص وتنقيه زى ما بتنقى الرز بالظبط  تاخد الحلو منه وترمى الوحش على جنب ياما تاخد الشيلة على بعضها ياما بلاش.

أصل مينفعش فجأة تلاقى الراجل من دول طلع من الفيلم العربى اللى بالألوان ودخل على فيلم قديم أبيض و أسود  و يلبس شخصية سى سيد وعايز حضرتك تكونى أمينة بس مش أى أمينة لأ أمينة مع بعض تغيرات العصر يعنى برضه على مزاجه يعنى تبقى أمينة فى الطاعة العمياء لكن تبقى مودرن وتنزلى تشتغلى معلش أصل الباشا محتاج مرتبك وساعتها يبقى الخروج للشغل ضرورة , لكن خروجة مع صحابك ولا زيارة مهمة ولا مناسبة لازم تحضريها يبقى لأ مفيش خروج من البيت.

و لا الأدهى بقى بعد الشر بعد الشر عنك ان يبقى ليكى طموحات وتطلعات لأ لأ ازاى يعنى يبقى عند حضرتك هدف عايزة تحققيه انتى نسيتى ان انتى أمينة... لكن طبعا لو هتحققى هدف لحضرته يبقى انتى تمام جدا يعنى لو نفسك فى شقة ولا عربية وطبعا يكونوا من فلوسك فساعتها متبقيش أمينة لأ يبقى هو ده الطبيعى وظروف الحياة بتطلب ان الست والراجل يساعدوا بعض ولو معملتيش كده تبقى مش طبيعية وأكن ده حق من حقوقه عليكى وفرض كمان.

وتبقى كارثة بقى لو عند حضرتك شخصية وطبعا  الرجالة بيستعيذوا بالله من الست اللى عندها شخصية زى ما بيستعيذوا من الشيطان بالظبط ...!!! أصل لما تذكر الست يبقى لازم تبقى عديمة الشخصية عشان الراجل يحس انه راجل , طيب لما حضرتك راجل وعندك شخصية وشايف نفسك مسيطر كده خايف ليه من شخصية الست بتاعتك ؟!!

من الأخر كده سى سيد كان سى سيد عشان أمينة وافقت تبقى أمينة ومفكرتش تتمرد على حياة سى سيد , يعنى هى اللى قررت بمحض ارادتها انها تاخد الدور ده وده عشان ترضى سى سيد , لكن للأسف عمر سى سيد ما بص ان امينة هدفها ترضيه حتى لو على حساب رضاها هى , وعمره ما فكر ان سكوتها مش ضعف منها لكنه قوة دفينة وحب لحياتها معاه , سى سيد خاف من قوتها وعشان كده قرر يلغى شخصيتها وسمى ده رجولة , بس أنا وانتى وغيرنا كتير مينفعش نرضى بالفيلم ده ومينفعش يبقى لينا دور فيه ... خليكى فاكرة وواثقة انك "مش أمينة "

أه على فكرة اللى بيرد  دلوقتى وبيقول ان الكلام ده خيالى وان مفيش راجل هيقبل بيه وان الراجل راجل والست هى اللى لازم تتنازل بقولهم لأ ريحوا نفسكوا ووفروا كلامكم المحبط اللى من عينتكم ده لنفسكم ... لأن بكل بساطة لو انت راجل وتفكيرك عقيم فروح حل عقد سيادتك بعيد عنى أو اتعقد اكتر مع واحدة شبهك ولو انتى ست موافقة على راجل تفكيره عقيم يبقى تستاهلى كمان كل اللى يجرالك ومترجعيش تشتكى ... وأكيد كل واحدة بتفكر صح هتلاقى الراجل الصح اللى شبها , اللى  بجد يستاهل يتصنف انه راجل ولو ملقتهوش فده مش معناه انه مش موجود لكن معناه انهم لسه متقبلوش. 

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق