]]>
خواطر :
الحياة الدنيا مثلها امرأة ، تراها من بعيد جمالا براقا لتكتشف أن كل شيء فيها مصطنع ... من رموش العين إلى احمرار الخدين والشفتين إلى طاقم الأسنان الناصع البياض...   (بلقسام حمدان العربي الإدريسي) . 

.. " عم غزيّل شكله مقيّل " ..

بواسطة: عمرو ابراهيم سيد أحمد مليجي  |  بتاريخ: 2013-09-21 ، الوقت: 18:06:51
  • تقييم المقالة:

 

.. " عم غزيّل شكله مقيّل " ..
...................................

قومي يا بلدي وصحي النوم

دا انا حلمان لك حلم خطير

حلمان إنك ..  

غصبن عنك  ..

بس الحلم ملوش تفسير

وان الحاضر كله مخاطر

وانت تقولي الحِمْل كبير 

طب ليه ساكته ، وليه مغصوبة ،

ولا عنيكي بقت معصوبة ،

ولا مخاضك امره عسير ؟

..

انا هحكيلك عـ الـ انا شفته

بس انا خايف مـ الـ عرفته

..

كنت امبارح عـ المشاية

قاعد سارح وانتي معايا

شفت الزارع والمزروع

ذي القالع والمقلوع

شفت الموت بيسقي الفل

حتى الشجرة من غير ظل

..

وفـ ركناية شبه البيت

جنب الغيط

فلاح نايم عـ المحصول

مش معقول..

عم غزيّل شكله مقيّل

والمحصول مش قمح وفول

..

رحت اندهلو مش بيرد

أصل بحالته شكله يخض

..

طب ما تكمل ساكت ليه

عم غزيّل يطلع ايه

..

طب بالراحة استني شويه

اصل عيوني جت فـ عنيه

..

عم غزيل شكله اتحول


ولا ميت راجل يقضو عليه

..

جنبو سنابل ، طارحه قنابل

وابن غزيل شبه العيل

حاطط فرفر بين رجليه

واما سألته عـ الـ انا شفته

رد عظمته..

قال لي الحاله مش بـ اديه  
..

طب ما تقول لي الحاله دي ايه

ولا سعادتك عمده يا بيه 
..

الموضوع مش حالة تخصه

ولّا رغيف يقسملك نصه

الموضوع يا امايه ونيس

شاف البلوه فـ التهييس

حلف بصوته ، لو فيها موته

مش راح يسكت عـ التدليس

شاف الناس ذي الجملين

واحد نافر ، شكله معافر

عايز يبرك عـ الحدّين

سكت شوية وقال يا معين

شاف التاني قاعد يشكي

بص فـ عينك ، قال لك فينك

ليه محتاره بين الاتنين

د احنا ولادك مش جاحدين
..

وبكام فكره ، فيهم بكره

جاب لنا بشرى ترجّع ذكرى

وربط الهايج من رجليه

بس ديول الجمل الهايج

عامله نتايج

تحرق مركب باللي عليه

..

طب وغزيّل قيّل ليه ؟

اوعى تقول الخوف فـ عنيه

..

يمكن يمكن ..

لق مش ممكن !!

ريم وحسام وسِرب حمام  ..

قاعدين يجروا فـ الأحلام

وام حسام بتقول يا حسام

اجري وصحي ابوك مـ النوم

يظهر ابوك عمّال بيزوم
..

واما صحيت ، عـ التخبيط

قمت انا وانتي مـ التتويت

رحنا لعالِم علمه كبير

شيخنا ، ابو سالم ، فـ التفسير

قال لنا هاجس بس نذير

وان الحلم مالوش تفسير

..

قلت اتكلم عـ الـ فـ نفسي

يمكن احاسب نفسي بنفسي

انا ما انا عايش وسط الناس

مش احساس

هيه حقيقه ومش وسواس

وكمان عيني مش قوّاله

شايفه الحالة

ناس شغالة ، وناس محتالة

وناس مشغوله بالتفكير

وانا مش هتعب مـ التكبير

قلت اهي كلمه أقولها عشانك

لو عن نفسي أموت علشانك

بس الحكمة فـ التفسير

..

قمتي بكيتي شوية بحرقة

إن ولادك عايشة الفُرقة


وانا بدعيلك بالتيسير
..

ردّيتي انتي وقلتي يا ولدي

بص يا سندي ..

حلمك سعدي

لو يوم تزرع ورد هتجني

زرع مورّد ذي الفل

واما هتزرع شوك راح نحصد

خيبة قوية بطعم الغل

قول يا مجير ، مـ التفسير

واعمل انك مش منكوب

او مرعوب

وارضى يا ولدي بالمكتوب

واعمل خير من غير تبذير

بس حذاري مـ التقصير

بس حذاري مـ التقصير

............................

.. " عمرو المليجي " ..

مصــــــر 17/9/2013

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق