]]>
خواطر :
مولاي ، لا مولى سواك في الأعلى ... إني ببابك منتظر نسمات رحمة...تُنجيني من أوحال الدنيا وحسن الرحيل ...   (بلقسام حمدان العربي الإدريسي) . 

يعنى ايه أمل ..؟؟!

بواسطة: تسنيم محمد عادل  |  بتاريخ: 2013-08-29 ، الوقت: 11:18:11
  • تقييم المقالة:

يعنى الدنيا تقفل فى وشك وانت شايفها مفتوحة وليها ألف باب وباب  , يعنى تخرج من نقرة تقع فى دحدرة وانت بتضحك ومستنى الطريق يتمهد , يعنى تعافر فى دنيتك وتشق طريق كل شوية بيتسد ومتزهقش .

يعنى تفضل تسعى وتجرى ورا حاجات كتير ومع ذلك متبقاش نصيبك,يعنى يبقى نفسك فى حاجة قوى واول ماتقرب خلاص منك فجأة تطير , فتدور على غيرها وتحلم بيها من جديد ومتوقفش سعى ولا جرى وراء أحلامك اللى واثق انها فى يوم هتبقى حقيقة.

 يعنى تحسن النية وتعامل الناس بكل ود وحب وتلاقى قسوة وجفا , فتفضل تحب ومتبطلش حب عشان متأكد ان لسه فى الدنيا ناس تستحق الحب ده .

يعنى تصحى الصبح وتقابل يومك بابتسامة عريضة ورغم كده كل الأحداث تكشر فى وشك , فتضحك أكتر فى وش الحزن وتاخده كمان بالحضن رغم ان الدمعة نازلة من عينك .

يعنى المستقبل دايما يكون مجهول ورغم الخوف من المجهول إلا إنك راسم ومخطط انك تعيش أحلى حياة .

 الأمل يعنى رغم كل الصعوبات تفضل تتعب عشان تعيش وتحقق هدفك , يعنى مش مجرد كلام بتردده بدون عمل ولا وهم عايش جواك ومعشش فى خيالك, أبدا ده الأمل أقوى دافع للصبر , وأنسب وسيلة لتحقيق أى حلم مهما كان مستحيل وهو الضمان الوحيد للوصول ليه .

يعنى حاجات كتير قوى تحاول تحبطك بس انت مببتأثرش , يعنى تحلم دايما لبكرة حتى لو مش ضامن انك تعيش ثانية قدام , يعنى تكون متفائل على طول الخط مهما كانت الأحداث حواليك كئيبة , يعنى تبقى واثق ان ربنا يبعد عنك الكويس من وجهة نظرك عشان يهديك الأحسن على الاطلاق .

يعنى كلام كتير اتقال ولسه هيتقال عن احساس ممتع و جميل انه يتعاش ...المهم انك تعيشه , واتأكد انه مش صعب تلاقى الأمل دور بس عليه جواك , وعيش حياتك بأمل وتفاؤل أحسن بكتير من انك تموت من الخوف واليأس.

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق