]]>
خواطر :
الحياة فصول .. جلوسنا لدقائق , لا يعني إحتوائها تماما هي دقائق نتأملها ..لا غير.   (طيف امرأه) . شوهدت ذئاب على أطراف الوديان في فرائس تتحينُ ...مرت عليها البهائم وهي تتعجب... ردت الذئاب على البهائم ، لما العجبُ لولا الفرائسُ لما وُجدت الذئابُ...   (بلقسام حمدان العربي الإدريسي) . 

روايه طبيب نفسي حلقات منفصله متصله الجزء السادس

بواسطة: اسماء ابراهيم  |  بتاريخ: 2013-07-22 ، الوقت: 12:27:14
  • تقييم المقالة:
الحلقه السادسه

جلست و قد وضعت ساق علي ساق بثقه زائده و كأنها نجمه سينمائيه و لكن مسحه حزن في وجهها لا تستطيع ان تخفيها تعرف يا دكتور مشكلتي ايه انا حاسه اني عايشه في فيلم سينمائي مستمر 24 ساعه معايا علي طول من و انا صغيره مش عارفه اوقات بسأل نفسي ممكن يكون من كتر فرجتي علي التلفزيون و ارجع و اقول طيب ما الناس كلها بتتفرج اشمعني انا الي حالتي مستعصيه كده.

ايه المؤشرات الي خلتك تحسي بكده هل بتهربي من الواقع و تعيشي في احلام يقظه ؟ للاسف انا حالتي اصعب يعني هحكيلك بعض الامثله لما كنت صغيره و انا في الدراسه كنت بحط الكتاب قدامي و فعلا ببقي حابه اني اذاكر و اجتهد لكن كنت بحس اني مش عارفه انا بعمل ايه هما الي زي بيذاكروا ازاي كنت ببقي عاجزه عن الاجابه عن السؤال ده لحد ما كان بيجي يوم الامتحان انا كنت بشوف في التلفزيون البطله بيجبوها ماسكه كتاب و رايحه و جايه بيه و مامتها بتدعيلها و في الاخر تجيب مجموع كبير و تحقق حلم اهلها انا كنت بحط الكتاب قدامي و افضل اوقات كتير سرحانه و اروح امتحن و محلش كويس و ابقي متوقعه اني اجيب درجات حلوه

و الدرجات دي انتي متخيله انها هتجيلك منين و انتي اكتر واحده عارفه انتي حليتي ايه؟ كنت افضل ادعي و اقول ان ممكن ابواب السما تكون مفتوحه و دعوتي تستجاب و ورقتي تقع في ايد مصحح اصعب عليه و يديني درجات حلوه

اخذ يضحك و هو يردد يعني كل المواد ربنا هيكرمك و تقع في ايد ناس هتجاملك؟ شعرت ببعض التوتر و هي تستجمع هذه الذكريات لترد مش عارفه بقي يا دكتور اهو كان عقل عيال لحد ما في يوم كنت في الثانويه العامه و كانوا حاطين صورة للمدرسين و هما بيصححوا لقتهم كتير مش واحد حسيت اني اتخضيت اوي بس برده فضلت في المتاهه الي انا فيها.

ايه تاني كنتي بتعاني منه ؟ كنت علي طول مستنيه فرصه او ضربه حظ يعني مثلا الباب بيخبط و جايين يسلموني جايزه كبيره تحللي كل مشاكلي فمحتاجش للشغل و وجع القلب احط الفلوس في البنك و اعيش من ربحها و خلاص علي كده.

حتي لما كنت طفله صغيره مره رحت امثل مسرحيه في المدرسه و للاسف كنت واخده دور صغير اوي يا دوب هقول كلمتين ملهومش اي تلاتين لازمه تخيل انا وافقت ليه , لاني كنت متخيله ان في مخرج كبير هيكون اعد في الصفوف الاماميه و هينبهر بأدائي الفظيع و علي الرغم من صغر مساحة دوري لكني كنت افضل من ابطال الروايه و الكلام الي بنسمعه من النجوم لما بيبتدوا من الصفر بس طبعا مفيش اي حاجه من دي حصلت و عملت الدور الهايف ده و مر طبعا مرور الكرام.

في كل حاجه يا دكتور كنت بستني حاجه تغير مجري حياتي يعني فجأه اتنقل من شركتي و اروح مكان تاني باضعاف مرتبي و منصب اعلي مع اني لما اعدت مع نفسي و فكرت لقيت ان شغلي في شركتي الي باخد عنه ملاليم يا دوب هو الي علي ادي يعني لا انا فظيعه في اللغات و لا بفهم اوي في الكمبيوتر طيب ده هيحصل معايا ليه , تعرف انا كان نفسي اشتغل في شركة مالتيناشوينال و ابقي مسئوله عنها   و كنت بحلم اني اتحكم فيها و ابني نظام متكامل اكون انا الي حطاه و كان جايلي حالة احباط اني محققتش الحلم ده لكن لما فكرت كويس في لحظاتي القليله الي بكون فيها بعيده عن الوهم لقيت نفسي عمري ما مسكت كتاب واحده يساعدني  في المجال ده قريته او اعرف عنه اي حاجه طيب تيجي ازاي

انتي عارفه انتي عملتي ايه للاسف عشتي حياه مش حياتك خالص او بمعني تاني تقمصتي شخصيات تانيه و خططتلها و حلمتلها و بعدتي عن  نفسك و مفكرتيش مجرد التفكير انك ترسمي حياتك

طيب ده بالنسبه للحياه العمليه حياتك الشخصيه ايه اخبارها؟ للاسف المأساه متكامله معايا يا دكتور برغم اني اتقدملي ناس كتير كنت برفض لنفس السبب اني مستنيه الفارس الي هيخطفني علي حصان ابيض يعني برده بدون مقدمات واحد يشوفني و يموت فيا و يفضل ورايا و انا اتهرب منه و مش طيقاه و هو يحاول بكل الطرق لحد ما استسلم في الاخر و اوافق اني ارتبط بيه و يكون وسيم شبه احمد عز كده و يعيشني في قصر و كل يوم نكون في بلد شكل نلف العالم مع بعض و كل الي اعمله اني اروح النادي الف في التراك مع اصحابي و بس و طبعا دا محصلش في الحقيقه .

انتي عارفه مشكلتك ايه انا اسف اني اقولك ان انتي انسانه متواكله بمعني انتي مش عايزه تتعبي عايزه الحاجه تجيلك لحد عندك عشان كده حبه تعيشي في حلم علي طول حلم يكون سهل انا عايزه اجيب درجات كويسه ليه اذاكر احلم اني جبت درجات كويسه  انا عايزه اشتغل و انجح ليه اتعب نفسي احلم بالنجاح.

طيب و الحل هفضل كده انا حاسه اني في متاهه مقفوله عليا و الايام بتجري بتجري اوي يعني في حجات اكون كتباها في مذكره معينه ليا بعد فتره احس انها قصيره ارجع للحجات دي عشان اقراها تاني لاني بحب اقرا الي بكتبه بعد فتره و اشوف الدنيا كانت رايحه بيا علي فين الاقي عدي سنتين تلاته كده من غير ما حس من غير اي انجاز و انا محلك سر لما افوق و اخطط لنفسي و طبعا منفذش اي حاجه الاقي كل الي كان اقل مني عدوني و انا في مكاني

لازم تبتدي من نفسك محدش هيساعدك غيرها اولا ولتغمضي عنيكي و تاخدي نفس عميق و تقرري ان انتي تقاطعي الكاميرات الي بتابعك في كل مكان و مخلياكي نجمه سينامائيه زي منتي متخيله طبعا مش هتقدري تعملي ده في يوم و ليله هنبتدي كل يوم ساعه يعني اليوم الاول الساعه 9 صباحا انا فلانه و بشتغل في شركة كذا و اخواتي كذا هي دي حياتي ايه الي مطلوب مني اعمله في الوقت ده لو شغل انجزه بكل امانه لو حاجه مطلوبه مني في بيتي اراعي ربنا فيها لمده ساعه تاني يوم هتزودي الحمل علي نفسك ساعه كمان مضافه للساعه الي قبلها يبقي من 9 صباحا لحد 11 صباحا انتي متصله بالواقع بتاعك مفيش حاجه اسمها مستنيه فرصه او مجري حياتي هيتغير هتفضلي كده لحد ما تكملي يومك مع نفسك و طبعا انا هكون متابعك .

بس اهم حاجه الاراده و ان يكون جواكي عزيمه قويه و انتي تقدري تتغلبي علي اي حاجه , اتفقنا, ابتسمت و هي تردد اتفقنا  


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق