]]>
خواطر :
انساك ! ده كلام ؟... اهو ده اللي مش ممكن ابدا...   (بلقسام حمدان العربي الإدريسي) . 

طبيب نفسي حلقات منفصله متصله الحلقه الثانيه

بواسطة: اسماء ابراهيم  |  بتاريخ: 2013-06-24 ، الوقت: 08:23:48
  • تقييم المقالة:
الحلقه الثانيه

طول عمري يا دكتور كان  نفسي ابقي ممثل مشهور و صوري ماليه كل مكان و ليا معجبات بيغمي عليهم اول ما يشوفوني و معايا فلوس كتير اوي,  ياه هي دي الحياه الي كنت بتمناها كنت بحاول حاولت كتير اوي بس مفيش فايده بعد ما اتخرجت من الجامعه كل الي كنت بعمله اني بلف علي مكاتب الإنتاج احاول الاقي فرصه و الي سندني شويه ورثي من والدي الله يرحمه لأني اتفرغت تماما لموضوع التمثيل ده و مكنتش بشتغل و ملياش دخل ثابت لحد ما السنين جريت بيا و لقيت نفسي كبرت و شعري ابيض كنت بصبغه للاسف حتي الشعر الي ابيض مفضلش علي حاله و طار بقيت اصلع في ممثل لسه في بدايه حياته و اصلع لما اضطريت اركب باروكه كان شكلي مضحك اوي بس قلت ايه المشكله ما في فنانين كتير معرفناهمش الا لما كبروا و مش كده و بس دول بقم نجوم و بيشتغلوا كتير اوي كنت بصبر نفسي بكده.

طيب طول الفتره دي ممارستش مهنه التمثيل؟ لا كانت بتجيلي حجات صغيره يعني مشهد من هنا اتكلم فيه كلمه علي مشهد من هناك اتحرك قدام الكاميرا.

و بعدين, فضلت علي الحال ده سنين تعبت من كتر عدها و كل سنه كنت بمني نفسي بحاجه تحصل اتفاءل بيها و اقول ان شاء الله دي سنه الخير عليا لحد ما اتصل بيا واحد صاحبي بيشتغل ريجسير اصل من كتر لف علي المكاتب بقيت مصاحب كل ريجيسيرات مصر و معايا ارقام تليفوناتهم , المهم اتصل بيا يبشرني أني خلاص اتفتحتلي طاقه القدر و هعمل دور في مسلسل تلفزيوني هيتعرض في رمضان هو مش دور كبير أوي بس معقول يعني مش مشهد لا مشاهد كتير و فيه مساحة تمثيل مش بطاله اقدر ابين فيها موهبتي دا غير كمان أني هكون مع نجوم و هيتعرض في رمضان و انت عارف يا دكتور مسلسلات رمضان ليها مكانه معينه عند الناس, كان لا يزال يستمع الطبيب الي مريضه باهتمام حتي عندما جاءت المرحله الفاصله في حياته أنتبه اليه جيدا و هو يقول له طيب كويس اوي و اظن دي الفرصه الي طول عمرك كنت بتحلم بيها و كده مشكلتك هتتحل ليقاطعه مريضه و هو يقول للاسف يا دكتور انا كمان كنت فاكر كده اخيرا بعد طول صبري ربنا عوضني و هرتاح من الهم الي انا شايله طول حياتي أني احرجت عيلتي و اخواتي الي كلهم بيشتغلوا في اماكن مهمه و عيلتي ليها اسمها و علي وصفهم اني لا اتجوزت و لا بشتغل و يادوب داير اسرمح و اضيع في فلوس والدي الي تعب فيها طول حياته.

في اليوم الي جالي الدور ده منمتش من كتر الفرحه اه في الاول و كأنه يريد ان يذكر لطبيبه ما حدث بالتفصيل في هذه الليله أه يا دكتور نسيت اقولك اني بعد ما قفلت التليفون فضلت اعيط عيط كتير اوي .

ليه عيط؟ حسيت بحجات كتير زي مثلا ان تعبي مرحش هدر و اني مضيعتش عمري علي الفاضي و علي احلام مفيش منها فايده زي ما كانوا اخواتي بيقولولي فضلت افكر يا تري هعمل ايه لازم اتدرب كويس و احضر لبس الشخصيه الي همثلها عشان اكون جاهز و المخرج يتبسط مني و يطلبني تاني في اعمال تانيه و فعلا في اليوم المحدد للتصوير كنت اول واحد في اللوكيشن عشان بردوا يعرفوا أني ملتزم بمواعيدي طبعا مش هقدر اوصفلك مدي التفرقه في المعامله بين النجوم الي بيفضلوا مستنينهم بالساعات و علي قلبهم زي العسل و وسائل الراحه المتاحه ليهم و المنتج الي عمل يديهم في فلوس عشان يرضوا عنه و بين ممثلين الدرجه التانيه و التالته الي زي حلاتي طبعا أنا كنت بستحمل دا كله و اقول بكره لما ابقي نجم هلاقي نفسي بتعامل كده فمستعجلش بس للاسف كل ده طلع وهم.

ليه الدور اتاخد منك أو المسلسل وقف لاسباب انتاجيه زي ما بنسمع عن اعمال كتير ؟ ياريت يا دكتور كنت هيبقي افضل علي الاقل هفضل عايش في الوهم الي كنت عايش فيه اني محصلتش في التمثيل و اقوي من اعظمها ممثل بس الفرق الي بيني و بينهم الحظ ان الحظ لعب دور جامد معاهم .

امال ايه الي حصل؟  الي حصل أني مثلت دوري و كنت مبسوط اوي و فضلت مستني لما المسلسل يتعرض و فعلا كان معموله دعايه كبيره اوي عشان زي ما قولتلك قبل كده كان معانا نجوم مهمين و جه رمضان و ابتدي المسلسل يتعرض لحد ما جه دوري و شفت نفسي في الاول كنت مبسوط اوي لحد ما جه في يوم كان اخويا الكبير عازمنا عنده و كلنا اتجمعنا و لما جه المسلسل كلهم فضلوا يتفرجوا و لما طلعت علي الشاشه و لقيت تعليقات اخواتي الاول كانت من تحت لتحت و بعدين ابتدوا يعلوا صوتهم و هما بضحكوا بصراحه انت معندكش فكرتها , تمثيلك مبالغ فيه اوي دا غير متزعلش مني انت في الحقيقه دمك زي السكر يا حبيبي بس في التمثيل دمك يلطش , دا كان تعليق اختي ليا مقدرتش اسمع اكتر من كده و نزلت اجري و هما يحاولوا يهدوني و يقنعوني ان هما كانوا بيهزروا معايا بس كنت خلاص ركبت الاسانسير و نزلت ركبت عربيتي و فضلت امشي بيها مشيت كتير اوي  انا مش عارف انا رايح فين و لا فاكر أني فضلت كده اد ايه من الوقت لحد ما لقيت الوقت اتاخر بيا اوي و انا كنت تعبت روحت علي بيتي و دخلت اشغل الحلقات الي قبل كده الي كنت مسجلها و تخيلت اني مش الممثل الي طالع في الدور لا اتفرجت كأني ناقد أو كأني مشاهد عادي بيقيم الممثل الي قدامه للاسف اكتشفت الحقيقه المره ان فعلا معنديش اي مؤهلات و لا موهبه في مجال التمثيل و كنت طول عمري عايش في وهم كبير اسمه اني ممثل موهوب بس هو الحظ الي معاندني كنت للاسف بعلق فشلي علي شماعة الحظ .

قررت أني اشيل كل الاوهام من دماغي و اعيش في الواقع و احاول اني اعوض الي فاتني بس للاسف الواقع ده شئ صعب اوي يا دكتور احسن حاجه ان الانسان يعيش في الوهم بدل ما يلاقي واقع مرير و من وقتها و انا حاسس بالانهيار و اني ضيعت  عمري هدركان علاجي أني افصل عن العالم الي حواليا و اعيش في احلام اليقظه و احقق كل الي بحلم بيه نجاح و تميز بشتغل كتير و باخد جوايز كتير

طيب ليه مستمرتش في الحاله الي انت عليها و حبيت تتعالج؟ عشان تعبت تعبت اوي يا دكتور من كتر الاوهام الي عايشها و الي عارف انها مش هتتحقق.

بس معقوله الحاله الي انت وصلتلها دي من كلمتين من اخواتك يعني ايه الي خلاك تتأكد ان انت فعلا مش بتعرف تمثل مش يمكن كانوا بيقولوا كده عشان مش بيحبوا اخوهم يشتغل في المجال ده و عايزين يبعدوك عنه؟ لا يا دكتور في المجال ده لو حد عنده موهبه و جتله فرصه كويسه اكيد هيطلب تاني و يثبت نفسه في المرات الي بعديها اكتر و اكتر بس انا لقيت نفسي عند نقطه الصفر لسه و محدش فكر يطلبني تاني يبقي الي انا استنتجته لما شفت نفسي و انا بمثل و كلامهم كان صح.

كل الي اقدر اقولهولك انك بتعيش حالة احباط مسيطره عليك و لازم في البدايه تحاول بالتدريج تتخلص منها خطوه خطوه , لازم تبتدي من اول و جديد .

ازاي يا دكتور بعد ايه بعد احلي سنين العمر ما راحت و انا بجري ورا سراب انا دلوقتي عديت الاربعين يعني بقالي اكتر من عشرين سنه  ضيعتهم من عمري عمال احاول في حاجه و لما تجيلي اكتشف اني اصلا مش موهوب فيها أنا خلاص انتهيت.

المشكله انك بتبص للي فات و مش راضي تلتفت للي جاي أنت عارف لو فضلت تفكر في السنين الي فاتت ايه الي هيحصل ؟ أيه , هتفضل سجين للسنين دي و هتضيع السنين الي جايه هتعيش علي الحصره و الندم لحد ما تلاقي نفسك عديت الخمسين و السنين الي بتندم عليها هتكتر لحد ما تلاقي عمرك كله بيروح, للاسف كتير مننا بيعيش علي الماضي و مش بيفكر في الحاضر لحد ما بتضيع كل حاجه من ايده و لا بيبقي في ماضي و لا حاضر و لا حتي مستقبل لكن مش بندرك ان احنا بنعيش مره واحده , مره واحده بس يعني احنا بنضيع من ايدينا الفرصه الي ربنا ادهالنا عشان نعيش و نعمر الارض و نأدي الرساله المطلوبه مننا ان احنا نفضل نشتغل لحد ما القيامه تقوم مش نعيش علي الحصره .

احنا حياتنا قصيره اوي و مع ذلك بنضيعها في افكار فارغه صحيح ضاع منك سنين كتيره لكن انت كنت مؤمن بحاجه و بتحالو نوصلها و دا مش عيب و لا غلط الغلط أنك تسجن نفسك في الوضع ده .

طيب ايه علاجي يا دكتور؟ علاجك ان انت دلوقتي تروح تطلب من حد من اخواتك انك تساعدهم في شغلهم و هما هيفرحوا جدا بحاجه زي كده و هيقفوا جنبك لحد ما تكون نفسك الحاجه التانيه تشوفلك عروسه بنت حلال تبتدي معاها حياتك الي جايه,دي مين الي هترضي بيا يا دكتور و انا في السن ده, سن ايه انت عارف في ناس كتير بيأجلوا الجواز و مش بيتجوزوا الا و هما في سنك , اتجوز و خلف و شوف اولادك و هما بيكبروا قدامك ساعتها هتحس ان انت عملت حاجه و هتلاقي المتعه الي حرمت نفسك منها ان انت تشوف حاجه منك بتكبر قدامك زي زرعه انت زارعها و كل يوم بتكبر شويه .

تفتكر يا دكتور فيه امل , طول محنا عايشين لازم يكون في امل هي دي طبيعه الانسان لازم يكون في هدف بيحاول يوصله , اسعي و حاول و ربنا معاك.


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق