]]>
خواطر :
اسقيني كاس من رحيق ذكرى وجودك ... لا تتركيه يجف ،كلما جف الكأس ازداد الحنينُ...و لا يطفي شعلة الفؤاد سوى كأس الحنين...   (بلقسام حمدان العربي الإدريسي) . 

حكاية مواطن معذب

بواسطة: احمد المليجى  |  بتاريخ: 2013-06-06 ، الوقت: 00:48:34
  • تقييم المقالة:

حكاية مواطن معذب

احمد المليجى

.........................

365

 اللى جايين أمر م الفايتين

يا ريس قول لى  دا كله منين ؟

الناس فى ايامك ليه تايهين ؟

ليه   يا بيه مش لاقيين ؟

كل يوم كارثة قل لى منين؟

لو قلت  مصيبة تلاقى اتنين

و ناس بتموت   وناس عايشين

وناس مطحونة ومش قادرين

وناس بلبانة  ودول غاوين

ما لهمش ف طور ولا ف طحين

كلامهم زن عجين فى عجين

كلمة جريئة و فعل ما فيش

يقول الكلمة ف جيبه ملايين

جوا وبرا ومش ساكتين

ضغوط ع الشعب شمال ويمين

لبانة ف بوقه  دول خاينين

مش دافعين مش دافعين

قالوا عنهم دول مجانين

 

الناس بتشكى مش عارفين

أغراب فى بلادهم ؟

والله عجايب !!

هو الحق يبقى الغايب ؟

ضمير الغيبة كمان بيخاصم ؟

هو الفعل خلاص مش لازم ؟

أصل الفاعل ضمير مقتول

جوا الروح صوته معلول

قيده فى رقابته بحبل طويل

زى الليل بالويل مفتول

يدفع فاتورة وفاتورتين

قلوب عطشانة وجنب النيل

ليلة طويلة مليانة عويل

قلبى عليكوا يا مصريين

حاتقضوا الليل من غير فوانيس

جاز وسولار مش طايلين

يترمى فى الصحرا لصالح مين

مية نضيفة مش شايفين

أصل العتمة مالية العين

حتى الراحة مش طايلين

مجارى وطافحة ف كل مكان

لقمة هنية بعيد وبعيد

 

 

لسة النيل ونيس العمر  

 هاتسيبه ياريس ؟

طب و لمين ؟

شوية حِبش عسلهم طين ؟

 مستنى اللجنة ؟

كلام مجانين

و لا الحلو خلاص بقى طين  ؟

كنت وعدت وقلنا جميل

وعد الحر  دا زى الدين

أتارى الوعد  يبقى بخار

خرج م الأرض مالهش مصير

كفاية يا ريس مش عايزين

 

 

زعلان يا ريس م اللايمين ؟

فين كلام الزبدة قولى يابيه

تخطب بيه و فى كل مكان

جامع وكنيسة وف ميدان

غنوة قديمة بقالها سنين

معاك يا زعيمنا ليوم الدين

ناس ع الفطرة ناس ع الدين

أصدق قول ما شوفش الشغل  

نتيجة الوعد أكل ف طين ؟

 

بلاشِ نلومه يا مصريين

يا أهل البَر  يا وطنيين

قبلى  وبحرى و سيوة وطابا

يا بشرة سمرة يا وجه النيل

الريس بتاعنا قولوا له آسفين

ما كانش فاهمنا كلامه متين

قولوا يا ريس خلاص آسفين

ابن الثورة دا  إبن لعين  

ضيع حق بقى له سنين

و ادى حلايب وكمان شلاتين

ضاعت منه ف غمضة عين

لسة الهرم وأبو الهول

شىء فى ضميره نفسه يقول

 

اسمع منه كلامه معقول

بكره يبيعه وانى بقول

لما يقولوا عليه كمان دا فلول

قلنا الريس دا راجل دين

يصون العهد بالإحساس

لكن فاتت مدة كلها إخلاص

هم فى هم معاه همين؟

لكنا اليوم بنقول آسفين

يا ريسنا خلاص  مش عايزين

بعت الدنيا وبعت الناس

وراحت الثورة بضربة راس

سيبها يا ريس والله يعين

الأرض دية ما بتخلاش

يوم  ورا يوم وطنيين

فكرة جميلة و حكم رشيد

و حدة ارض وشعب ودين

صوت بيلم ما يفرَّش

يملا الخزنة ما بيسرقش  

يقول الكلمة وبإحساس

متخافش ياريس يا حساس

 بلدنا غنية بشعب نبيل

يحفر أرضه بصبر جميل

تلاقى الورد عطره أصيل

يرفع علمه بعزة روح

تلاقى الأرض بحب تبوح

تلاقى الخضرة شمال ويمين

كفاية ياريس و بلاش تبذير

ضمير الشعب مش بيموت

صوت الخوف بس يموت

سيبها يا ريس فوقنا خلاص

هى الفاس بقت ف الراس ؟

أبدا أبدا  مش حابكون

شعب بلدنا قلب يصون

عيشه و ملحه طامر فيه

دين الرب ما يشرك بيه

عام و يعدى  يرمى  سنين

صوت القرض ليه سامعينه

نهر الدمع ليه شايفينه

كلام القهر ليه تقراه

هى الثورة ما مسحتهوش ؟

365 يوم يا ريس كفاية  عليك

عدت منا  وبقينا مداس

جوا وبرا سقطت راس

كرامة بلدى عدوا عليها

داسوا عليها وغنوا سنين

كفايه ياريس دى ليها معين

فوق السما حكمه مبين

داخلوها باسمى وعزى

امن امان ليوم الدين

مصر يا ريس مش ألعوبة

للاخوان والغادرين

دفنت فرس و بطليموس

ونابليون غرق ف الطين

 و ف شر مساح اللى ف شربين

و بحر صغير  وف اشمون

غرقت حملة نابليون

كفاية ياريس مش كيلو لمون

سيبها لناسها ومش حاتهون

يوم ما اختاروا قلت الدين

وجاه الاخوة رجال حلوين

اتارى العهد  دا زى المية

تاه ف الارض بقاله سنين

سيبها يا ريس  والله يعين

سيبها يا ريس والله قادرين

بعد دا كله وعايز شرح ؟

بعد دا كله ما شفتش جرح

ما حدش قال لك دولا مين

سيدنا الريس كفاية عليك

حضرات الزعما  خلاص بايعين

خلوا الناس فصيل واتنين

و العيلة الحلوة بقت عيلتين

كفاية يا ريس بقينا اتنين

 بعد ما كانت الوحدة عمر طويل

بطول النيل والبحرين

365 يوم وعدت

الله  معانا وكمان بيعين

*******************

 

 

 

 

 

 

 

 

 

 

 

 


من ديوانى : عرب واعراب

احمد المليجى


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق