]]>
خواطر :
رغم إني أخاف من الغرق ، عقدة تلازمني منذ الصغر...أتمنى الغرق في بحر ذكرى هواك...   (بلقسام حمدان العربي الإدريسي) . 

إبن عرس و شوية كلاب

بواسطة: Hesham Elbitar  |  بتاريخ: 2013-06-04 ، الوقت: 11:38:08
  • تقييم المقالة:

حبايبى الحلوين.......... النهارده ححكي لكم قصة إبن عرس ( إبن عرس هو حيوان إسمه إبن عرس بس مش عارف إسمه بفتح العين ولا بضمها عموما إفتح أو ضم أو حتى إكسر إنت حر أنا ما عنديش تشكيل فى الكاى بورد) و إبن عرس يا حبايبى هو حيوان مالهوش  لازمه بس حقير و حرامى يسرق الكحل من العين........... كان إبن عرس عايش فى الغابه الجميله أجمل غابه و تقع وسط كل الغابات علشان كده هى أهم غابه و الكل طمعان فيها..............و الغابه دى قديمه جدا و هى اللى علمت كل الحاجات الحلوه للغابات اللى جنبها و اللى يحكم الغابه دى يا سعده يا هناه علشان كده حاول كتير من أهل الغابات التانيه إنهم يحاولوا يحتلوا الغابه دى بعضهم فشل و بعضهم الآخر نجح بس ما طولش كتير علشان أهل الغابه دى مش زى أى حد............... و كان فى شوية كلاب سارقين الغابه اللى جنبهم من أصحابها و كان حلم حياتهم يسرقوا الغابه الجميله و فعلا قدروا يسرقوا جزء من الغابه الجميله من الأسد اللى كان بيحكمها و اللى كان أسد محبوب و قوى و لكن كان عنده شوية غلطات...........المهم يا حبايبى يا حلوين مات الأسد ده و حكم من بعده الغابه ثعلب ذكى و ماكر و أهل الغابه الجميله إعتمدوا عليه إنه يرجع الجزء المسروق من غابتهم الجميله فكل جزء من غابتهم عزيز عليهم جدا و فعلا الثعلب ما كدبش خبر و قاد جيش الغابه علشان يرجع القطعه العزيزه المسروقه من غابته و فعلا قدر يرجع جزء كبير من غابته من شوية الكلاب............. بس الكلاب أنواع و كان فى نوع تانى من الكلاب بيحكم غابه تانيه بعيييييييييييده هى غابه قويه بس مغروره فاكره نفسها هى الزعيمه على باقى الغابات و بتحب أوى كلاب الغابه المسروقه علشان كلاب زى بعض و علشان مصلحتهم مع بعض ساعدوا الكلاب اللصوص .................... و هنا قرر الثعلب الماكر إن كفايه حرب لحد كده و يبدأ يتفاوض مع الكلاب و يعمل معاهم صلح ياخد بيه بقية غابته الجميله و فى نفس الوقت ممكن يتفاوض على الغابات المسروقه من جيرانه.......... بس يا حبايبى يا حلوين الكلاب حتفضل كلاب و ممكن تعضك فى أى وقت و مالهمش أمان علشان كده جيرانه فى الغابات اللى جنبه زعلوا منه أوى و كمان كتير من أهل غابته زعلوا بس هو كان عنيد و ما بيسمعش لحد و بيعمل اللى فى دماغه ............... و هنا قام شويه من أهل غابته قتلوه و هو فى وسط حرسه بيحتفل بذكرى إنتصاره فى الحرب مع الكلاب.

و هنا يا حبايبى الحلوين تبدأ قصة الحيوان إبن عرس ........... و إبن عرس يا حبايبى كان مجرد واحد من جيش الغابه و كمان ماكانش أهم واحد فيهم كان فيه أبطال فى الغابه أهم منه بكتيييييييييييييييييير ............... و هو كان عارف إنه مجرد حيوان إبن عرس مالهوش أى قيمه ........... بس هو فرح إنه قاد النسور فى الحرب على كلاب الغابه و إنه أول واحد رمى طوب على الكلاب الحراميه ............. المهم فجأه و ما تعرفش ليه الثعلب إختاره إنه يبأه المساعد بتاعه ؟.............. رغم إن فى من أبطال الغابه أحسن منه بكتير ............ بس جايز الثعلب شاف إنه علشان هو مجرد حيوان إبن عرس و مش مهم فهو حيسمع الكلام و الثعلب كان بيحب اللى بيسمع الكلام ............. و يقال إن الثعلب كان حيغيره بعد الإحتفال بذكرى الإنتصار على الكلاب بس إتقتل قبل ده ما يحصل ............... دى صدفه؟ الله أعلم.

المهم يا حبايبى  يا حلوين مات الثعلب و حكم الحيوان إبن عرس اللى ماكانش مصدق نفسه إزاى حيوان حقير زيه يحكم الغابه الجميله مره واحده؟ ............... فبدأ يحكم الغابه مش لوحده لأ و مراته كمان تحكم معاه و مراته لها أصول كلابيه قديمه......... و أولاده إفتكروا الغابه غابتهم فققعدوا يسرقوا فيها همه كمان ........... و إبنه الصغير اللى نصه إبن عرس و نصه التانى أصله كلب كان بيحلم يحكم الغابه فجاب شوية حيوانات علشان يساعدوه إنه يحكم الغابه بعد ما الحيوان إبن عرس الكبير ما يموت.......... و خلاهم همه كمان يحكموا الغابه و يسرقوا و ينهبوا زى ما همه ما عايزين .............. و خلى الحيوان إبن عرس الكبير الضباع تحمى أمن الغابه فبدأت الضباع تفترس أهل الغابه الطيبين و تعذبهم ........... و إنتشر الفساد فى كل أنحاء الغابه الجميله و الحيوان إبن عرس فرحان بكده و رغم نهبه للغابه بدأ يشحت من الغابات جيرانه الغنية علشان هو ما نساش إنه مجرد حيوان إبن عرس حقير و مالهوش قيمه و اللى من حقارته إتبرى من إخواته و من أمه اللى ولدته ............. وصاحب الحيوان إبن عرس الكلاب الحراميه و الكلاب القويه و بأه لعبه فى إيديهم يقولولوا يمين يروح يمين يقولولوا شمال يجرى بسرعه نحية الشمال ............. و من كتر الفساد و الظلم اللى إنتشر فى الغابه زهق أهل الغابه الجميله الطيبين من العيشه و اللى عايشينها فقرر شباب الغابه الجميله إنهم لازم يعملوا حاجه و ينقذوا غابتهم.

راح شباب الغابه يا حبايبى يا حلوين قاموا فجأه و جابوا عالى الغابه الجميله واطيها ............. و الحيوان إبن عرس و اللى معاه ما كانوش مصدقين إن أهل الغابه الطيبين ممكن يعملوا كده ............... و حاول هو و حيواناته و ضباعه إنهم يقاوموا ......... لكن ما عرفوش  يعملوا حاجه كان غضب شباب الغابه أكبر منهم ............. حاول يستعين بالتمساح العاقل اللى بيحكم جيش الغابه إنه يحميه بس التمساح العاقل كان بيحب غابته و أهلها علشان كده رفض و قاله إن عمر جيش الغابه ما يكون ضد أهل الغابه أبدا.

و نجح يا حبايبى يا حلوين شباب الغابه إنهم يشيلوا الحيوان إبن عرس من حكم الغابه ............. و إنهم يحاكموه هو و اولاده و حيواناته ...........و يسجنوهم ............. و زعل جدا الكلاب الحراميه و الكلاب القويه على خادمهم المطيع الحيوان إبن عرس ..... بس مافيش فى إيديهم حاجه يعملوها له و خصوصا إنهم بتوع مصالح و مصالحهم ما عادتش معاه ........... و دى نهاية كل حيوان يظلم أهل غابته و يعاديهم و يصادق الكلاب و يحبهم.

حبايبى الحلوين كان نفسى أقولكم توته توته فرغت الحدوته بس للأسف الحدوته لسه ما خلصتش و لسه ليها باقى ......... ممكن أحكيلكم باقى الحدوته فى يوم تانى لو عجبتكم الحدوته دى ........... لكن لو ما عجبتكمش كفايه عليكم لحد كده إستحملتوتنى كتير.......... لكن إيه يا حبايبى إيه اللى إستفدتوه من القصه دى؟....... أكيد إستفدتوا إن حيوان إبن عرس حيوان حقير و حرامى و إن المفروض ماحدش يزعل على حيوان حقير زيه ولا يصعب عليه .............. لأن حيوان إبن عرس حيفضل طول عمره إبن عرس حيعيش إبن عرس و حيموت إبن عرس..............  و إن الكلب حيفضل طول عمره حتة كلب و مالهوش أمان و ماحدش يثق فيه أبدا ........... و إن جيش الغابه الجميله دايما عزيز و قوى و بيشتغل بس لمصلحة الغابه ................ و إن شعب الغابه الجميله مهما كانت الظروف سيئه فهو شعب طيب و مافيش زيه و مهما إنكسر مسيره يقوم من تانى .......... و أتمنى فى يوم نشوف بعينينا الغابه الجميله بتتحد مع الغابات جيرانها و بترجع حقها و حقهم و بتتخلص بجيشها القوى من كل الكلاب سواء كانت حراميه أو قويه و تسترجع كل قطعة غابه إتسرقت من أصحابها ........... هل ده مجرد حلم ؟....................يا ريت أشوفه فى يوم من الأيام باه حقيقه و شكرا على إحتمالكم لى يا حبايبى الحلوييييييييييييييين و .............................. سلااااااااااااااااااااااااااااام.



 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق