]]>
خواطر :
الحياة الدنيا مثلها امرأة ، تراها من بعيد جمالا براقا لتكتشف أن كل شيء فيها مصطنع ... من رموش العين إلى احمرار الخدين والشفتين إلى طاقم الأسنان الناصع البياض...   (بلقسام حمدان العربي الإدريسي) . 

محتاجين رئيس حمار !

بواسطة: السيد حسن عبد الحليم  |  بتاريخ: 2013-04-08 ، الوقت: 22:26:30
  • تقييم المقالة:

هذا المقال عمل ادبى وعليه فأن الاسماء والاشخاص والاحداث من وحى خيال الكاتب او تم استخدامها فى اطار خيالى . واى تشابه مع الاحداث فهو محض صدفه

 

كنت راكب ( تاكسى ) وهذا الحوار الذى دار بينى وبين (سائق) نقلنى من المنشية _للشاطبى

السائق : "وش " اول ما ركبت وقفلت الباب سألنى ايه رايك فى اللى بيحصل فى البلد ؟

انا: والله البلد فى حاله غريبة انا مش عارف احللها لحد دلوقتى

السائق: طب انت شايف مين من المرشحين للرئاسة يصلح لمنصب الرئيس

انا : بصراحه ولا واحد من المترشحين احنا محتاجين رئيس حمار !

السائق : (متنح ومستغرب ) ازاى محتاجين رئيس حمار اهو ده اللى خدناه من الثورة ان الشباب بقوا يغلطوا فى اى حد

انا : ومين قالك ان حمار (شتيمة)

السائق : والله يا باشا انا طول عمرى اعرف ان كلمه حمار يعنى شتيمه

انا : هى فعلا شتيمه فى مصر بتتقال للشخص الغبى

السائق: طب يبقى كدا انت بتغلط فى رئيس بلدك

انا : والله انا عن نفسى مش شايف كلمه حمار شتيمه ... ده حتى الحمار شعار الحزب الديمقراطى الامريكى ... وكمان اتذكر فى اغنيه المغنى سعد الصغير الشهيره

السائق : اه بحبك يا حمار

انا : الله ينور عليك ... وكمان بطل فيلم شريك

السائق :/ قاطعنى ... بتاع الغول

انا : ايوه هو بتاع الغول

السائق : على فكره انا ليسانس حقوق ( معرفش ايه دخلها بالحوار ؟ )

انا : انعم واكرم ..يعنى انا وانت زمايل ... ما علينا( ماحنا بقينا زى الرز) كنت بقول ان دور من الادوار الرئيسة فى الفيلم ده كان حمار اللى قام بتمثيله الممثل الافرامريكى ( ايدى ميرفى) ...طب بلاش كل ده انت اكيد عارف ان لحم الحمير محرم بيعه فى مصر

السائق : اه طبعا

انا : يبقى الحمار مش شتيمه .."ولامؤاخذه " ما الحمار بياكل فول زيى وزيك

السائق : لا حاسب الحمار بيحب الفول مخلوط بالتبن ...انما احنا بنحبه مخلوط بالزيت

انا : يا سيدى ديه مساله مزاج

السائق : طب انا بردو مفهمتش ايه دخل الرئيس بالحمار ...وازاى انت راجل متعلم وتشتم الرئيس ..المفروض يبقى الشعب عنده ادب من نفسه

السائق : كسر اشارة طب اسنان وشتم واحد معدى ( يا حمار مش تخلى بالك ) !

انا : ولا اى اندهاش ... ااقولك انا ليه محتاجين رئيس حمار ...تعرف ايه هى مبادئ الحمار ؟

السائق : لا انا اعرف انه بيحب البرسيم ..وهو فى حمار ليه مبادئ يا باشا ؟

انا : اكيد طبعا ... من اهم مبادئ الحمار انه ينتج ويتنج ولا يبغى من وراء انتاجه اى منعفه او مقابل اللهم الا حبه البرسيم ... فهدفه الاساسى هو العمل لمصلحة الغير وانكار المصلحة الحمارية الشخصية او المصلحة الحمارية الحزبية ... وكمان بيختلف عن القطط اللى بتاكل وتنكر وتسرق وتجرى ...وبيختلف عن الحصان المدلل ...وكمان عنده حده بصر وقوة سمع ... وعنده صبر يفوق جبال

وكمان عمرى ما شفت حمار طالب ببردعة مرصعه بالياقوت او سرج دهب او حتى طلب انه يعين الجحش ابنه فى اى وظيفه كويسه

السائق : اه فهمتك انت عايز رئيس بمبادئ حمار ... تصدق انى احترمت الحمار

 انا: مش انا اللى عايز اى دولة فى العالم تتمنى رئيس بممادئ حمار

السائق : بس ياترى هنلاقى رئيس عنده المبادئ ديه ؟

 

والسؤال لك الان ايها القارئ هل يمكن ان ياتى رئيس بمادئ حمار ؟!

 

 

السيد حسن


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق