]]>
خواطر :
الحياة فصول .. جلوسنا لدقائق , لا يعني إحتوائها تماما هي دقائق نتأملها ..لا غير.   (طيف امرأه) . شوهدت ذئاب على أطراف الوديان في فرائس تتحينُ ...مرت عليها البهائم وهي تتعجب... ردت الذئاب على البهائم ، لما العجبُ لولا الفرائسُ لما وُجدت الذئابُ...   (بلقسام حمدان العربي الإدريسي) . 

الرسالة المدمرة ؟!

بواسطة: سحر فوزى  |  بتاريخ: 2013-03-03 ، الوقت: 09:52:31
  • تقييم المقالة:


الرسالة المدمرة ؟!

في دلال شديد ..توسدت صدره ..وراحت تذكره بأيام الخطوبة ..وكلام ورسائل الغرام أيام الخطوبة.. اعتدلت وجلست...ثم ربعت رجليها ..ولملمت شعرها في غيظ ..وسألته : هو أنت ليه من يوم ما أتجوزنا بطلت تبعت لي رسايل حب ، وغرام ؟ هو خلاص أنا ما بقتش انفع يتبعت لي رسايل ؟ما أنت ليل ونهار قاعد على الهباب النت ؟ يبقى تبعت لي رسالة وانا هاخلي البت(كريمة) تعمل لي البتاع  ده اللى أسمه أيميل ،وافتح وأقراها ؟ تفزز من صوتها ..واعتدل هو الآخر محاولا تهدئتها حقنا للخناق ..وحتى يريح رأسه من زنها ..وعدها ان يكتب لها رسالة مليئة بالشوق ، واللهفة وأنه سيترك  عمله ، ويعطل مصالح الناس، من أجل حبها.. هدأت وهى تتوعده قائلة : على الله ما تبعتهاش ..هتشوف أنا هاعمل فيك إيه ؟ لو ما وصلتنيش رسالة منك الصبح.. هترجع البيت مش هتلاقيني ، وإبقى وريني هتعمل إيه في العيال ؟ وفي الصباح ذهب أبو كريمة إلى عمله ..ونسي وعده لأم كريمة ..وفجأة رن الموبايل ..وإذا بها تسأله في غضب : يعنى ما وصلنيش حاجة ؟ فين الرسالة يابيه ؟ طبعا نسيت ؟ مهو انا مش على بال سعادتك ؟ رد مرتبكا : أبدا يا روحي.. ده أنا كنت قاعد اكتبها من الصبح وهتوصلك حالا .. ترك كل ما بيده ..وجلس يكتب لها رسالة غرام على عجل .. ومع ضغط أم كريمة ، وضغط العمل ، وضغط الدم ..لم يستطع مراجعتها ولا ترتيبها أو إتقانها ..وأرسلها لها بأخطائها كما هي . فكانت هكذا:

هببتي أم كيكة:

 انا ليه كلب يهواكي ، وليه عجل ما ينساكي ، أنا ليكي وانت وليه .

حالاً وبدون تأجيل وكسل..كتبت هذه الرسالة ووصيتها تروح لأغلى البقر

 لما بأشوفك بأرجع لأيام زمان ...قبل مايخترعوا الدش في الحمام

أنت يا سمينة ..ووردة ، وقلة .. صدقيني يا أمورة  بكلبي خروفك محفوره..

من يوم مادخلتي كلية قلبي ، وأتخصصتي في حبي ، اصبح تخرجك مستحيل

لما قالوا الفلك ، والأرصاد ضاع منهم قمر، قلت انبهك ليقفشوكي

رحت السوق أشتري ساعة .. ما لقيت ساعة زى اللي شفتك فيها

نورك أعماني..خلاني مش عارف عيني من وداني

سمعت صوت خبط ورقع جامد اووى .. اتارى حبك بيبنى دورمخالف فى قلبى وخايف ليهده

أهديك شيك بمليون قبلة....أبقي أصرفيه من بنك الحظ .

وفي النهاية أحب أقول لك : ربنا يهدك و مايخرمني منك ، ياجمل ، وألد زوحة في الهون

ملحوطة هامة:

من السهل أن تطرد جيش استعمر وطنك.. ولكن من الصعب أن تطرد زوجة استعمرت بيتك وقلبك.

قرأت أم كريمة الرسالة ..وعلى الفور لمت هدومها وسابت البيت ومشيت ؟!

بقلم /سحر فوزي / كاتبة وقاصة مصرية / 3/3/2013

 

 

 

 

 

 

 

 

 

 

 

 

 

 

 

 

 

 

  


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق