]]>
خواطر :
ما الحياة الدنيا إلا أمواج في مد و جزر مستمر... أرحام تدفع و تراب يبلع...   (بلقسام حمدان العربي الإدريسي) . 

مستهون بالرجاله ياخويا ....

بواسطة: د.هاله محمد البيلى  |  بتاريخ: 2013-02-17 ، الوقت: 12:50:16
  • تقييم المقالة:

معلش يا جماعه فى الكلام اللى هقوله لأنه ما ينفعش يتقال غير كده .....مع عيد الحب اللى لسه خلصان ...والبنات والولاد اللى مهيصين فى عيد الحب ......وكل واحد أو واحده مفكر إنه ملك العالم....وأنا مبتكلمش على الحبيبه المتجوزين دول ربنا يكثر من أمثالهم.....أنا بتكلم على الحبيبه اللى لسه فى مشروعهم للجواز......وأنا بس حبيت أقول شوية حجج فارغه  للرجاله.....أصل الراجل ما يعرفش إن آخره دبدوب فى عيد الحب .....كل واحده جالها دبدوب السنه اللى فاتت تلاقيها فركشت السنه دى...وتقعد تسأل نفسك ليه؟ ده كان حتى جايبلها دبدوب السنه اللى فاتت .....وتلاقى يا عينى المخطوبه من دول مستنيه هدية عيد الحب بتاعها وتلاقيها جايلها بعديها بشهر ولا شهرين مع عيد ميلادها مثلا .....وتقول ليه بيعملوا كده معرفش.....خلاصة الموضوع أنا هقول شوية جمل ....وأتحدى إنك تجيبلى واحده ماسمعتش واحده منهم ........

أول واحده.....جابلها دبدوب السنه اللى فاتت وبيحبها وبيموت فيها بس مش هينفع يكملو مع بعض ....ليييييييييييييه......أصل ماما عايزه تجوزنى بنت خالتى....

ثانى واحده.....بحبك والله العظيم ....بس أنا ظروفى ملخبطه ومش عايز أبهدلك معايا....

ثالث واحده.....بحبك بجنون ....بس بابا مش موافق على الجواز ومش هيساعدنى ....

رابع واحده ....يشوفك بت روشه كده وواخده بالك من نفسك وهو من الأول عارف وعاجباه على كده....بس فجأه كده ضميره صحى ......وعايزك تحتشمى ....طب يا عم وماله نحتشم  ماهو خير بردو ...بس تعالى أخطبنى وأنا أحتشم  حتى إختارلى اللبس اللى على ذوقك ......يقوم مكشر ويقولها الحوار بنا إنتهى خليكى براحتك ....إنتهى ليه يا عم الحاج ...معرفشى....

خامس واحده.....يجى كده يلاقيكى بدأتى تشتغلى وتكسبى يقوم يقولك أنا عايز مراتى ست بيت ....ما أنا بقالى مية سنه مابشتغلشى أشمعنى دلوقتى...

سادس واحده....يشوف بنت عمك مثلا ولا واحده صاحبتك حلوه ومتريشه ....يقوم يكلمك عنها ويعرف أخبارها منك ....وبعد كده يقلبك فى لحظه ويروحلها .....ولما تيجى تكلمى البت وتقوليلها ده كان بيحبنى ...تقوم تقولك أنا عارفه أنكو كنتوا أصدقاء وبس...صداقة إيه اللى بدباديب فى عيد الحب ....متسألشى

سابع واحده......يكون كده جاله عقد عمل وهيسافر ......يقوم يقولك هتستنى لما أرجع .....والبت تفضل عايشه فى الوهم ومستنيه ....ولما تيجي تقوليلها حرام عليكى نفسك ....ماتسمعش الكلام وتفكر إنها لو إتجوزت هيرجع هو من السفر ويغنى أغنية عمرو دياب .....وما ترتحش إلا لما تسمع أنه إتجوز وخلف وهى ما تعرفش......

ثامن واحده .....ودى بقى حلوه أوى ....تلاقى الراجل مهتم بالبت ودباديب ورسايل ومكالمات وهدايا لغاية ما البت تبقى مش مصدقه روحها ....و يطلب منها الجواز .....وخلاص البت وصلت .....وفجأه بس أنا كنت عايز أعترفلك بحاجه ....إيه هى يا كابتن ....أصلا أنا كنت متجوز ومخلف عيل ونسيت أقولك.....وبس خلاص..

تاسع واحده .......تلاقيه ماشى مع واحده ثانيه وجايبلها دبدوب بردو .....وتيجى تسأليه مين دى ...يقولك أرجوكى إفهمينى ....وعلى فكره اللى بيقولك إفهمينى تسيبيه علطول علشان دايما آخرته سوده .....بس البت يا عينى بتبقى نفسها تببرر له ماهى بتحبه وواخده دبدوب .....يقوم فى الآخر يطلع الواد بيحب الإثنين ومحتار يختار مين فيهم هما الإثنين عاجبينه .....وتقوم البت واخده منه خابور وأهو بدل الدبدوب بردو.....

عاشر واحده .....أنا بحبك بس خايف باباكى يرفضنى ......البت ...لأ يا سيدى ماتخافشى .....

الواد..لأ أنا واحد عندى كرامه وخايف ومش هينفع نتجوز....

ونيجى بقى على الناس المخطوبه......

أول واحده .....عيد الحب بدعه ومابجيبش هدايا فيه ......ولما يجى عيد الأم تلاقيه أول واحد بيفكرك بهدية أمه لحسن تنسى ..أصل عيد الأم بقى شرعى ....

ثانى واحده .....ما يجيبشى هديه لا فى عيد الحب ولا فى عيد الأم ولا فى أى عيد أو مناسبه ....بس البت حدأه وبتفهمها وهى طايره ده أكيد بخيل .....وتقوم سايباه ومرجعاله الشبكه ......يقوم هو يكسر وراها قله ....ويروح يخطب واحده ثانيه بنفس الشبكه ويجيبلها كل الهدايا .....طب ليه بابنى كده ....أصله كان بيزهقك علشان ترجعيله الشبكه يا فالحه ......

ثالث واحده .....تجيبله البت هديه فى عيد الحب ...يقوم ينكسف ويجيب هو كمان .....وبعدين يوم عيد ميلادها يبقى مشغول طول النهار ويتصل عليها وهو متعصب وفيه مشاكل كثير والبت تقعد تعيط جنبه .....وبس اليوم عدى وماحدش حس ....

رابع واحده ....يجيب الهديه وأمه باصه فيها ...ويقولهاوالنبى ما تقوليش لماما إنى جيبتلك هديه لحسن تعمل مشكله ....وبعدين فى ساعة صفا بينه وبين أمه يقوم يقولها إنه جاب هديه .....وبعدين أمه تيجى تسألها ...قوليلى يا حبيبتتتتتتتتتتتتتتتى هو إبنى جابلك إيه هديه ...والبت ترد ده ماجبش حاجه يا مامااا ......وبعدين تطلع البت كذابه وبتاكل وتنكر ومايتآمنلهاش......وهو يفضل ننوس عين أمه الحيله بسلامته .....

خامس واحده...يجيبلها كل الهدايا فى كل المناسبات دهب ....والبت بقى مفكره إنها وقعت وقعه سقع ....وبعدين يجى يوم الشبكه يجيبلها حاجه كده كليشى إن كان ....إيه يا عمنا فين الشبكه ....يقوم يقولها ما تحطى الهدايا  اللى أنا كنت جايبها فيها .....أن أن ....ده أنت كنت بتجيب الشبكه بالتقسيط....مش كنت تقول يا راجل ....

سادس واحده .....يجيبلها دبدوب معفن ....ويقولها معلشى أصل أنا ماكنتش فاضى وأختى هى اللى نزلت وجابته كثر خيرها ....وإنت مال أختك بحبنا يا حبيبى .....هو كده بقى ....

سابع واحده ....يجيبلها هديه مفيده كتاب للطبخ  مثلا .....أصله عاقل ومش عايز ياخد ذنوب ....طيب لو إنت جيبت الدبدوب قبلها بيوم ولا بعدها بيومين هتأخد ذنوب بردو .....وعجبى ...

وبعدين نرجع نقول المثل الشهير (يا مآمنه للرجال يا مآمنه للميه فى الغربال )

 

 

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق