]]>
خواطر :
اسقيني كاس من رحيق ذكرى وجودك ... لا تتركيه يجف ،كلما جف الكأس ازداد الحنينُ...و لا يطفي شعلة الفؤاد سوى كأس الحنين...   (بلقسام حمدان العربي الإدريسي) . 

سنجافولة رئيس جمهورية Ŗ"

بواسطة: مصطفى يونس  |  بتاريخ: 2013-02-14 ، الوقت: 15:33:54
  • تقييم المقالة:

 

تركت الشلة و هم منهمكون في لعب الطاولة و جلست جانبا أدخن سيجارة و عقلي يموج بالأفكار.."محمد الجندي"..و مليونية الجماعة الاسلامية ( السلمية) في منتصف فبراير و لجان النهضة اللي ناويين يعلموا فيها المعارضة الأدب..و رئيس الوزراء اللي طلع علينا باكتشافه الجهنمي بان البلد مش هتتقدم غير لو طفينا التليفزيون و سبنا فيلم السهرة و رحنا ننام بدري عشان نروح الشغل الصبح و أخيرا الفتوى الجميلة القيمة اللي طلعت بحرمة انفراد المرأة بقرد مسلسل..فعلا..   وجدتني اتمتم بصوت عالي في هستيرية..   - آه..هو القرد..أيوه القرد هو اللي محير دماغي من الصبح "السيد الجمال" كان يتابعني عن كثب، فضحك ضحكة مجلجلة.. -         القرد بيتنطط ولا بطل تنطيط..هههههههههه  في هذه الأثناء دخل "سنجافولة" من باب المقهى و هو يدندن..   "يا عزيز عيني و انا نفسي اروح بلدي واخد رصاصة ف عيني..و الشرطة سحلت جسدي" سحب كرسي و اترزع عليه و ابتسم و هو يدير عينه في وجوهنا.. -         مساء الفل يا شعب..  ضحكنا جميعا و رددنا بصوت جماعي -         مساء الجمال يا ريس  -         خلصت الوردية و غسلت التوك توك غسلة نديفة و اديته للواد "نيفة" السواق يروح يفول من عند الست "أم رودي"..هي سحيح بتخلط البنزين مية م الحنفية و مسرفة زي الست سنية في حكاية المية دي بس بيني و بينكم أحسن ما أملا التانك مية بس..ما هو لازم المكنة – التوكتوك يعني- يشتغل عشان القسط يا زميلي.  مسح "عبد الله عوض" على شاربه.. -         ربنا يعينك يا سيدي. التفت لي "سنجافولة".. -         مالك يا أستاذ   رمى "سيد" الزههر و ضحك -  و النبي سيب الاستاذ في حاله يا "محمد"..القرد بعيد عنك مجننه ولع "سنجافولة" السيجارة الصيني التي كانت خلف أذنه من حجر شيشة "سيد".. -         و النبي يا سي الاستاذ انته واجع دماغك و دماغنا ع الفاضي..ايه القرد و مش القرد؟..سيبك يا راجل..بالك حكاية اني اترشح للرئاسة الانتخابات الجاية دي خيشت في دماغي و عششت في الطاسة قوي..دي شغلانة سقع يا جدع مططت شفتي في لا مبالاة.. -         ازاي يعني؟! -         شفت الست دي اللي طلعت في التليفزيون و بتضرب نفسها ميت شبشب انها انتخبت الريس؟ -         آه مالها -         أنا أول ما شفتها ضربت كف بكف و انا مش فاهم لحد ما ربنا رزقني بحتة راجل كده متعلم و متنور و عسولة كده زي حالاتك ركب معاية توصيلة النهاردةو فهمني الليلة يا زميلي.. -         أنهي ليلة؟ -         الليلة الكحلة اللي خلت كل اللي انتخبوا الراجل ده يحسوا بالخازوق و كوية الغرا و هي بتوج في دماغهم و بيضربوا نفسهم بالشباشب لاجل يطفوها.. و الصراحة يعني كلام الراجل كيفني أنا كمان و خلاني مستني مدة الرئاسة دي تعدي هوا لاجل انط على الكرسي..أمال يا زميلي! تعرف؟ انا بت امبارح و انا عمال أقلبها في دماغي..ياد يا سنجافولة لحسن تترشح و بعدين تنتهي نهاية اسمه ايه ده و تتزحلق في حمام السجن و تتقطم رقبتك..مما هو انا هبقى ريس..مسئول يعني..يعني لو عترت حمارة نشفانة ماشية على بطال في "سرس الليان" بعد آخر بلاد المسلمين بشارعين..ولا وقعت بقرة في ساقية في "نجع حمادي" المفروض أنا مسئول أتحاسب..آه  أمال..يعني صاحب الحمارة يصرخ "وا سنجافولاه" اكون انا عنده قبل الهاء..الراجل بقى الله يكرمه فهمني الليلة..قالك ايه..الراجل اللي دخل السجن ده كان متطبق عليه دستور قديم..لكن من هنا و رايح – و من شهر فات- احنا شغالين بدستور جديد يا زميلي. و نط سيد في قلب الكلام ضاحكا.. -         يعني ايه؟ -         يعني قبل شهر حمادة..و دلوقت حمادة تاني خالص..الريس – اللي هو العبد الفقير يعني- في الدستور الجديد ده – يؤمر و ينهي و يمشي البلد بطرف صباع..و يمشي الوزرا و الكوبارات دول بكلامه و أوامره و نط سيد في قلب الكلام للمرة الثانية ضاحكا.. -         يعني اضرب يا زكي قدرة -         يضرب زكي قدرة -         و اقتل يا زكي قدرة -         يقتل زكي قدرة..ايوه هو ده..لكن يا حاج ساعة الحساب و مين قتل و مين دبح؟هو مالوش فيه..ايوه الراجل قال لي بالنص"مش مسئول سياسيا الا عن الامور الخارجية" يعني اللي برا البلد..جوه البلد بقى..مش قصته..مش بتاعه انتفض "عبدالله عوض" في انفعال.. -         يعني ايه؟..اللي بيجرا في بور سعيد و السويس وطنطا ده لو راحت فيه بشر فوق اللي راحوا دول  مش من حقنا نحاسب الريس ده؟ -         و لا له فيه -         امال مين اللي يتسأل؟ -         وزير الداخلية و رئيس الوزرا -         و النبي ايه؟...طيب كويس اننا لقينا حد نسأله -         آه ما انتوا يا ابني حمير ولاد حمير من أمة عريقة في الحصاوي..انا برضه قلت كده زيك يا عم الأمور..يا ابني انتوا لسه تلامذة.. -         طب فهمنا انته يا  ابوا التفانين.. رفع ايده "سنجافولة" بعلامة النصر في وجه "سيد" فضحك "سيد" .. -         ايه.. انتصرنا؟ -         لأ هات سوجارة سوبر .. أخرج "سيد" علبة سجائره و نفحه سيجارة.. -         اتفضل يا سيدي.. أشعل "سنجافولة" السيجارة في تلذذ.. -         ايوه كده..تكيف لي الطاسة أنور لك دماغك و أفهمك..بص يا سيدي فيه مادة في الدستور بتقول ان محاكمة الوزرا دي لازم تكون بقانون..دي مادة برضه كانت موجودة بالنص كده في الدستور القديم من تلاتين سنة -         طب كويس.. ضحك "سنجافولة" بهستيرية حتى سقط من على الكرسي وسط نظراتنا المندهشة  و ظل لدقائق حتى تمالك نفسه .. -         هات ايدك..قومني -         مش قبل ما تقول لي فيه ايه؟ عاد "سنجافولة" يغالب ضحكه -         أصل القانون ده عمره ما اتعمل و لا حد هيعمله يا ابن العبيطة منك له  
« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق