]]>
خواطر :
شوهدت ذئاب على أطراف الوديان في فرائس تتحينُ ...مرت عليها البهائم وهي تتعجب... ردت الذئاب على البهائم ، لما العجبُ لولا الفرائسُ لما وُجدت الذئابُ...   (بلقسام حمدان العربي الإدريسي) . الحياة فصول .. جلوسنا لدقائق , لا يعني إحتوائها تماما هي دقائق نتأملها ..لا غير.   (طيف امرأه) . اختصار الكلام براعة لا يجيدها كل أحد، كما أن الإسهاب فيه فن لا يتقنه إلا القلة، والعبقري من يجمع بين الحُسنين   (محمد النائل) . 

قصيدة سيناريو البشاير

بواسطة: أشعار  |  بتاريخ: 2011-05-11 ، الوقت: 03:50:16
  • تقييم المقالة:

 

  سيناريو البـشـــــــاير =======  البشاير .. أربعه وعشرين يناير .. داخلى خارجى ..خارجى داخلى.. ليل .. بلا أخلاق .. ليل كما الخناق .. ليل مطول .. ليل مقندل .. دوت . فى مصر .. جوه قصر .. أو فى شقه .. المهم الجو خنقه .. والولاد .. صبيان .. بنات .. تورن أون ويندوز .. وبدأوا يشيتوا .. خد وهات .. هات وخد .. جوه غرف الشات حكاوى صد  رد .. إنما الحدوته جد .. الولاد مع بعضهم .. والأهالى لوحدهم .. كل واحد ويا حاله .. همه رزقه وقوت عياله .. ده اللى ظاهر .. مشغولين .. والحقيقه هربانين .. كله داخل جوه ذاته .. كله ملهى ف زيف حياته .. كله بيخبط كفوفه .. يشتكى قسوة ظروفه .. والغلا .. والمسئولين .. الجبابره المرتاحين .. اللى كابسين ع الصدور .. ليل طويل ماباينله نور .. كله متضايق ومل .. والحكايه مالها حل .. كله همه بطنه زوره .. كله بيسلك أموره .. كله مابقاش يختشى .. كله راشى ومرتشى .. والفساد بقى عادى .. عاده .. كل ده .. ودور العباده .. مليانين بمصليين .. مسلمين .. أقباط .. يصلوا .. كله مكبوت .. فش غله .. فش غله ف وش اخوه .. غل .. غيرهم شعللوه .. واتلهينا نسينا حالنا .. وابتدينا قال وقلنا .. والولاد عـ الشات بيبنوا .. بيت جديد .. للأب وابنه .. الصبيه قالتله إمتى ؟ .. رد .. بكره .. خمسه .. سته .. دبلتك ويايا .. وانتى ؟ .. دبلتك ويايا .. قالوا .. ماشى أوكيه .. باااااااااااى يابنتى .. بااااااااااى يامان .. وبدأ خياله .. يااااااااااااه .. حايتحقق أملنا ..؟ بعد حدوتة نضالنا ..؟ بكره خطبتهم لبعض .. جوه تحرير اسكوير .. وسط شله بينها وعد .. يبدأوا الحلم الكبير .. حلم للناس كلهم .. اللى حاضنين ظلمهم .. ظلم عشش فى الوطن .. اللى غطاه العطن .. اللى مّوت كل حى .. بس هانت .. بكره جى .. جى متجدد هواه .. ويا فجر .. جديد ضياه .. ضى حايضوى العقول .. والقلوب وياه تنول .. كل أحلامها الجميله .. يللا عدى قوام ياليله .. يللا يانهار come قوام .. وانطفى النور .. cut .. نام .. شوت تانى .. هيه صاحيه .. لسه عايشه ف حلمها .. بس كانت شايفه ناحيه .. تانيه .. فى اللى يخصها .. بنت طبعا .. بالغريزه .. عندها أحلام لذيذه .. تبقى أم .. ده المهم .. أم أولاد منه هوه .. هوه موش جان أو فتوه .. ولا فارس .. بس راجل .. واد رومانسى جرىء مناضل .. هوه يمكن حمقى حبه .. غيرته نار ..لكن وماله .. بكره اظبط بالمحبه .. والحنان والرقه حاله .. طول ماقلبه نضيف ودافى .. شهم .. واد مجدع وصافى .. موش بيظلم أو بيكره .. إمتى تيجى قوام يابكره ..؟ وانطفى النور .. cut .. قاموا .. تانى يوم ..وف وقت واحد .. راحوا ع التحرير وعاموا .. جوه بحر شباب مواعد .. واعدوا بعض وجم ووفوا .. ورد بلدى جرىء صريح .. فيه براءه وطهر يشفوا .. قلب أى وطن جريح .. وابتدوا المشوار .. وقالوا .. كلمة الحق الجريئه .. شاهد العالم بحاله .. وقفه سلميه وبريئه .. مصر ياأم الحضاره .. النهارده الحق يومه .. وابتدى شغل القذاره .. وابتدوا العسكر يزوموا .. غاز مسيل للدموع .. ضرب ..  تكسير للضلوع .. دهس .. هرس ..  قرار وزارى .. طلق مطاط ..  طلق نارى .. طفل وسط الزحمة خايف .. جوه حالة رعب واقف.. جاتله طلقه .. قلبه ينزف .. طب ساكت.. هيه جريت .. تحضنه .. للدم توقف .. جات تشيله البنت وقعت .. هيه وقعت ..دول شافوها .. زى عصفوره اصطادوها .. شافها .. راح ينده عليها .. ياااااااحبيبتى .. كات إيديها ..   حاضنه جرح الطفل .. شالهم .. قام وقف .. قام كلب جالهم .. والسلاح آلى ف إيديه .. البطل قال الحقونا .. الخسيس نشن عليه .. قال له ليه بتموتونا .. قال له مأمور أمر ميرى .. فين ضميرك ؟ .. قال ضميرى .. مات .. وفاته وراح لحاله .. بص لرفيقة نضاله .. وقعوا .. كان الطفل بينهم .. كان بيقرا اللى ف عيونهم .. عينها قالت آآآآآآآآآه .. باحبك .. البطل قال آآآآآآه .. باحبك .. بكره يتحقق يامان .. حلمى .. حلمك .. حلمها .. عدل .. حريه.. وأمان .. ده اللى مطلوب ..  ضمها .. ضمته.. ضحكت عينيهم .. Zoom على الدبله ف إيديهم .. Cut .. ماتوا .. استشهدوا .. تتر مكتوب ..  اشهدوا .. من بعيد ..  الشمس طالعه .. بس نازل منها دمعه .. لحظه ضلمه .. ثم كلمه .. موش نهايه ..لأ .. بدايه .. قلب طاير .. البشاير .                                                                      فوزى المليجى      28-1- 2011     
« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق