]]>
خواطر :
سألت البهائم ذئبا دموعه تنهمرُ...ما أبكاك يا ذئب ، أهو العجز أم قلة الحال...في زمن كثرة الذئابُ واشتد فيه الازدحامُ...   (بلقسام حمدان العربي الإدريسي) . 

أنا وزوجى والدستور

بواسطة: وسام السرى  |  بتاريخ: 2012-12-17 ، الوقت: 02:07:12
  • تقييم المقالة:

طبعا لأننا عملنا فى مصر ثورة، وجبنا رئيس منتخب، وعملنا جمعية تأسيسة لوضع دستور جديد، ماهى مصر بقت داخلة على عصر رائع من الحرية والديمقراطية، إيه أنت صدقتوا؟ ماشى المهم أن اللى هيغيظ زوجى العزيز ووالدى العزيز هو ليه أنا هأقول لا على الدستور، بابا راجل قانون على فكرة، وزوجى صحفى يعنى اللى اتنين مثقفين وفاهمين فى السياسية أكتر منى، لكن أنا رغم أن الدكتوراه بتاعتى فى الاجتماع لكن هأقول الأسبوع الجاى لأ على الدستور عشان الآتى:-

1-أنا عشت فى بلدى غريبة منتهكة الحقوق والحريات مسلوبة الإرادة مجبرة على كل شىء حاسة بالغربة والاغتراب لمدة 33 سنة قبل الثورة وبقالنا سنتين بعد الثورة ومازالت أشعر بنفس الشعور لم يتغير.

2-أنا من صغرى لما قررت أدخل أدبى وكلية آداب وقسم اجتماع كان عشان خاطر أساعد الناس الغلابة وأحل مشاكلهم وأوجد ليهم مخرج من الفقر والجهل والمرض والبطالة والانحراف وتردى الأوضاع فى كافة مناحى الحياة، وكان ده صعب جداً قبل الثورة ومازال بعد الثورة واعتقد وربنا يخيب ظنى أن هيستمر.

3-لما نزلت أيام 25 يناير كانوا بيقولوا علينا مغيبين وقابضين وممولين من جهات أجنبية وبناكل كنتاكى والولاد بيتحرشوا بالبنات، وكان الوضع هناك بين الجبنة النستو والقراميش ووقفة طابور الحمام بالساعات ومازال بعد الثورة بسنتين بيقولوا على اللى بيتظاهر ضد النظام الحاكم أنه شيوعى ومغيب وممول وصاحب أجندة والبنات اللى بتروح الاعتصامات بايظة ومالهاش أهل سبحان الله.

4-لما نزلنا وعملنا ثورة كنا عشان نشيل الحزب الوطنى اللى بقى زى الاخطبوط خلال 30 سنة واتشعب فى كل حتة وسد علينا نور الشمس وبقوا هما أصحاب البلد والبقية أما بيغرقوا وهما بيهاجروا وأما فى السجون وأما ما شيين جنب الحيط، ودلوقتى فى 3 شهور النظام الجديد خلى كل شق فى البلد ماسكه واحد من تبعهم وبقينا زى ما أحنا.

5-جدو حسنى كان هارينا خطب جوفاء ومفيش لا تنمية ولا ترقية للبشر اللى فى البلد ، عمو مرسى صاحب مشروع النهضة فى 3 شهور عمل رقم قياسى للخطب ومفيش لا تنمية ولا نهضة البلد فى انتكاسة .

6-أنا باحثة وطول عمرى بأحلم اشتغل الشغلانة دى ويبقى فيه مؤسسة تمول الأبحاث المحترمة اللى تنفع البلد لما بصيت على الدستور لقيتهم كاتبين أنهم هيعملوا نسبة معتبرة للبحث العلمى بالله عليكم لو حد بتاع عربى يعرف مرادف لمعتبرة دى يبقى يطمنى هى نسبة قد إيه.

7-جوزى قال نعم عشان البلد تمشى ويجى مجلس شعب منتخب ومصر تستقر وأنا مرعوبة لو رئيس واحد منهم والبلد ولعت لو اتملكوا كل البلد هيحصل فينا وفى أولادنا إيه .

8-أنا بصراحة ما يفرقش معايا بنود الدستور ما أنا عشت 33 سنة ما أعرفش حاجة عن دستورنا القديم ولا معظم الشعب كان يعرف ولا مهتم، أنا بس قلقانة من تفكير الناس اللى حطوا الدستور والأول كنا بنقول نواياهم لهم والأفعال لينا دلوقتى الأفعال تخوف والكلام بينبىء عن اللى فى الصدور، أنا ما اشتركتش فى ثورة عشان أشيل حزب وأجيب حزب أنا اشتركت فى ثورة عشان الشعب يرجع يملك ويحكم ويبقى صاحب قرار واختيار مش نرجع تانى لا حول لنا ولا قوة وبنختار تحت التهديد عشان كده هأقول لا للدستور.

وأقروا لى فى مدوناتى بس ورحنا عاملين ثورة


http://elsery76.blogspot.com/


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق