]]>
خواطر :
اسقيني كاس من رحيق ذكرى وجودك ... لا تتركيه يجف ،كلما جف الكأس ازداد الحنينُ...و لا يطفي شعلة الفؤاد سوى كأس الحنين...   (بلقسام حمدان العربي الإدريسي) . 

سمع .....هُس.

بواسطة: Sherif Hosni  |  بتاريخ: 2011-08-01 ، الوقت: 23:27:19
  • تقييم المقالة:
" سمعْ ............هُس

سكوت ...مش عايز اسمع صوت أنت وهو..واللى حايتكلم حايطلع برة !! الموضوع اللى احنا جايين نتكلم فيه ,شاغل كل الناس اليوميين دول ..فيه اللى فاهم ..وفيه اللى .....!
اللى ايه ياكوتش ؟ فيه اللى زيك ياظريف ..أُمال انت جاى هنا تعمل ايه ؟ ..كلمة تانى وتطلع برة !!...انت زعلت ؟..ماتزعلش ..ماأنت حبيبى ..اصل انت من اولها بتقاط...عنى .
طب خلاص .......نكمل...كل واحد نفسه عضلاته تزيد ! إزاى مش مُهم !!
يجرى على الاجزخانة ,ويشترى شوية بودرة ,ولا كام حباية أمينو ..واشرب يامعلم ...وكل مايشرب أكتر ,العضلة تبألل أكتر .وتيجى تسأله هو يعنى إيه بروتين ؟ يسكت ..وكأن لسانه كلته القطة
مبدأى بقى ياحبايبى "اللى يجى يغلط ..يغلط صح ".
بصوا بقى ..جوه البروتين فى حاجة إسمها "نيتروجين" بيعمل إيه بقى ؟ بيسحب كل البروتين ويدخله جوه العضلة .ويقفل عليه ....لغاية كده مافيش مُشكلة .
المُشكلة بقى ياحلوين تظهر لما كمية البروتين تزيد عن اللى الجسم محتاجه.

قوم بقى إيه ...البروتين ينشطر!! ..يعنى مُركباته بتتفكك ,ويفقد النيتروجين ,اللى هو أهم حاجة فيه ! ويخرج مع البول والعرق ....وانت ياعم الظريف ..مش حاتسأل الباقى حايروح فين ؟ أصل أنا بصراحة مابعرفش أكمل كلامى إلا لما تنكُشنى .
شوية بيروحوا يعملوا طبقة فوق العضلة ,وشوية يترسبوا فى الدم ,فى صورة ال.دى.ال ,

قوم بقى ايه يعمل شوية تصلُب , وإنسداد للشرايين , إستنى الكلام ماخلصش ..وبعد كده تظهر حاجة كده إسمها "الأمونيا"وديه مادة سامة بعيد عن السامعين ..بس من رحمة ربنا أنه بيخلى الكبد يحولها إلى"بولينا",اللى بينقلها الدم للكليتين ...اللى ياعينى مظلومة معانا ,وبتخرج مع البول , وطبعاً كلنا عارفين ان البولينا هى اللى بتسبب "النقرس"ماهى ناقصة بقى !!والليلة تكمل ب "حساسية الهيستامين"!!

يعنى ياحلو حاتاخد...أقراص زيلوريك+فوار يوروسولفين +بونيدون 75 علشان إلتهابات المفاصل ...أصل صاحبنا بقى عنده أملاح النقرس ,وأُميجا 3 علشان دهون الكبد .

وذكائك ياحلو انت وهو... إنك لما تيجى تغلط ,تغلط صح !! يعنى لما تيجى تاخد بروتين ,ماتزودش عن 30 جرام فى الوجبة الواحدة ,وأكتر من كده يحصل اللى قولنا عليه .


حسبى الله ..كل ده ومش فاهم !!!!حاضر ..أوضح ..ماأنا اللى جبته لنفسى !

غدة البنكرياس عصارتها مابتقدرش تهضم أكتر من 30 جرام بروتين فى الوجبة الواحدة ,سبحان الله ..ماهو الجسم ليه حدود ...وإلا بقى كان الجسم بعد سنة ولا إتنين يبقى عملاق ,وشوية "جى إتش"يبقى الجسم مترين !! أُمال إيه ..إنتوا فاكرين إن العملية سايبة ؟المُهم ..توزن جسمك ..والرقم تضربه فى اتنين ..واللى حايطلع يبقى كمية البروتين اللى جسمك محتاجها علشان يزيد ,وتوزعها على اليوم كله ,بعد ماتقسمها على 30 ,والرقم اللى حايطلع يبقى هو ده عدد الوجبات ,وماتنساش تاخد انت وهو فاصل ساعتين على الأقل بين الوجبة وأُختها .

معايا إنت وهو؟ ولا أنا بكلم نفسى ؟ اللى مش فاهم يقول ,ماهو مابقاش بينا كسوف ,

وطبعاً البروتين نسبته من الوجبات اللى إنت حسبتها يبقى 30-35 % .
شوفتوا بقى إن العملية سهلة إزاى ..وإن أنا مش مُعترض على مبدأ تناول المُكملات الغذائية...أنا إعتراضى على سبب ,وكمية ,وإمتى تاخد البروتين ؟.....مانت لازم تاخده بعد
ماتحسب كميات البروتين اللى حاتدخل جسمك عن طريق الأكل ياحلو ...ماإنت مش حاتعتمد على المُكمل ,أُمال إسمه مُكمل ليه؟ .

أنا بصراحة تعبت ..اللى مافيه حد فيكم فتح بُقه وسأل سؤال يوحد ربنا ...هو إنتوا ماصدقتوا
..أنا قلت مش عايز صوت كنت أقصد أبو لسان طويل ..
أنا عارف إن إنتوا مكسوفين ..وحاتبعتوا الأسئلة على "مُدرب أُون لاين"
عجبكوا الكلام ,أوماعجبكوش ..أنا مستنى تعليقاتكم علشان أعرف فهمتوا ولا ...حاتعملوا زى صاحبنا الظريف !!!

 


... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق