]]>
خواطر :
رغم إني أخاف من الغرق ، عقدة تلازمني منذ الصغر...أتمنى الغرق في بحر ذكرى هواك...   (بلقسام حمدان العربي الإدريسي) . 

لمـا البنات تشرب شيشة الشبان يعملوا إيه ؟

بواسطة: على حسن السعدنى  |  بتاريخ: 2012-08-17 ، الوقت: 21:36:30
  • تقييم المقالة:

- على حسن السعدنى يكتب:

 لمـا البنات تشرب شيشة الشبان يعملوا إيه ؟

لاحظت انتشار ظاهرة تدخين الشيشة بين الشباب في معظم الأماكن ، حبيت أعرف ما هي أسباب انتشار هذه الظاهرة ؟   

هل كثرة مشاكل و أزمات الشباب في المجتمع المصري دفعت الفتى والفتاة للتعبير عن غضبهم عن طريق شرب الشيشة ، فمثلاً الولاد إلي بيعانوا من البطالة وعدم القدرة على تحمل تكاليف الزواج اتجهوا لشرب الشيشة ممكن للترويح أو التنفيس عن نفسهم ، وفي ساعات كثيرة بيكون عبارة عن تقليد ،  فمثلاً الولد بيقول أصلي أنا أتعودت أشوفها في أيد بابا ، والمصيبة انه بيكون فاكر إن شرب الشيشة ده ممكن يضيف عليه رجولة ووقار أمام الفتيات ده ممكن يكون بالنسبة للأولاد ، ولكن ما سبب انتشارها عند البنات ؟

 ممكن يكون نوع من رفض المجتمع ورفض عاداته في كل شئ ومن ثم عمل ذلك للتمرد على المجتمع الشرقي الذكوري بفرض ظاهرة تدخين الشيشة في الأماكن العامة لثلاث أسباب :

1 – دفع المجتمع لتقبلها كشئ عادي للبنت .

2 – للفت نظر المجتمع أنها حرة في كل تصرفاتها وسلوكياتها مثلها مثل الولد .

وده ممكن يكون السبب الأرجح من وجهه نظري لأن معظم البنات بيني وبينكم عندهم عقده الفرق بين الولد والبنت ونظرة المجتمع للولد ونظرته للبنت وتقبل أي شئ من الولد حتى لو كان تصرف غلط .

3 – ممكن تكون البنات بتحب تقلد بعضها جدا مش كل البنات بس معظمهم بيحبوا يقلدوا وخلاص وده سبب أنا شايفاه .

كل دي اعتقاداتي  من وجهة نظري أنا شخصياً حبيت اعرف آراء الشباب في الموضوع فطرحت السؤالين على عدة شباب .

- إيه سبب انتشار شرب الشيشة                                                                                                                                                                                                                                                                                                         

- ما هي نظرة الولد للبنت إلى بتشرب شيشة ، ورأي البنت في الشيشة ؟

 

- السؤال الاول : كانت إجاباته قليلة ، اجتمعت كل إجاباته تقريباً في كلمتين وكأن الشباب مش عارفه تبرر الغلط لنفسها ، فجاءت ردود الولاد والبنات واحدة  إننا عادي بنشرب لما بنخرج مع أصحابنا يعني نوع من التدخين والترويش وتضييع الوقت .

 - أما السؤال الثاني :  فكانت الآراء فيه كثيرة ومختلفة . فمثلا لما سألت يوسف 23 سنة – اكاديمية القاهرة للعلوم والفنون قالي ما البنت تشرب وأنا مالي لو بتحبها اجيبهالها واشرب معاها كمان ، بس أنا اعتقد إن البنت علشان بنت مش لازم تحترفها وأخرها تجربها وتروش بيها مش أكتر من كده .

أما محمد – تربية Englishجامعة  طنطا . هو ما بيحبش البنات إلي بتشرب شيشة بس هو شايف   إن الموضوع ده بقى عادي دلوقتي بس بالنسبة له لأ . وكان لـ محمد 26 سنة رأي مختلف قالي إذا بليتم فاستتروا ، ممكن البنت تشربها في بيتها لكن أمام الناس عيب .

أما صلاح 22 سنة – تجارة القاهرة – رأية أصلاً إن التدخين مكروه دينياً لكل الناس وإن الفتاه إللي تشرب شيشة غير محترمة دينياً و اجتماعيا .

محمد 20 سنة – هندسة القاهرة . على الرغم من انه مدخن شره ، بيقول انه لما بيشوف بنت بتشرب بيكون مذهول ، لأنه تصرف خطأ وسلبي ولازم البنات تغير من سلبيتها .

دعاء 19 سنة بتكره كل البنات إلي بتشرب شيشة .

سما 18 سنة – كلية ألسن عين شمس . رأيها إن البنت إلي ما بتتكسفش تعمل كده وسط الناس ما بتتكسفـش تعمل أي حاجة تانية .

نادر 24 سنة – مهندس مدني . فرأيه ان البنت الي بتشرب سجائر شكلها احسن والذ من البنت الي بتشرب شيشة علشان إحنا أتعودنا ان الشيشة للمعلمين .  

رامز 20 سنة – أكاديمية المستقبل .  يعرف بنات كتير محترمين جداً وبيشربوا شيشة فلا توجد علاقة بين الأخلاق وشرب الشيشة وهو يعرف بنات بتشرب لما بتكون متضايقة .

بسملة 21 سنة  - صيدلة المنصورة . رأيها إن جميع أنواع التدخين عادة خاطئة ، ومضره لكل الناس بكل الأعمار ، وان البنات صحتها ما تستحملش الشيشة لأن تقريبا الشيشة بتعادل 70 سيجارة بس مش معنى كده إنهم يشربوا سجاير .

رأيي أنا مختلف ، مش هتناول الموضوع من زاوية العادات والتقاليد وعيب وغلط والبنت والولد والكلام إلي كلنا عارفينه ومش راضيين بيه من جوانا . أنا نظرتي ممكن تكون مختلفة شوية .

يعني أنا شايفة إن متوسط عمر الإنسان تقريباً في مصر من 60 – 65 سنة يعني مش بيعيش كتير فلازم كلنا نخاف على صحتنا ونهتم بيها وإن عددنا المتزايد بشكل كلنا ملاحظينه و كثرة العوادم والأدخنة مقللة من نسبة الأكسجين في الجو وكلنا لازم نتنفس علشان نعيش ولازم نحارب التلوث علشان كلنا محتاجين بيئة صحية وجو نقي ونظيفة .

  وأنا شايفة إن كلنا بنحب نقلد الغرب في كل شئ  الموضة – ستايل الحياة كل حاجة تقريبا  ، ونسينا إن المجتمعات الغربية مانعة الشيشة في الأماكن العامة ، فليه مانخفش على تلوث مجتمعاتنا زيهم !!

أما بالنسبة للبنات إلي بتحب يكون شكلها حلو وبشرتها نضرة فالدخان بيكرمش الجلد بسرعة ، و بيساعد على احمرار العين خصوصا مع وجود عدسات لاصقة ، وبتحجب الرؤية في الأماكن المغلقة .

ده غير الأمراض الخطيرة إلي بتسببها الشيشة زى سرطان اللسان ، والمياه على الرئة .

 

 

 

  

 

   


... المقالة التالية »
  • موج | 2012-09-12
    السلام عليكم 
    شكرآ على طرح هذا الموضوع
    السبب الرئيسي في انتشار هذه الظاهره وخاصة لدى البنات هو الاهل 
    هنا يلعب البيت والاهل والبيئة المحيطة دورآ كبير ومهم فالاهل يجب عليهم متابعة ابنائهم وتثقيفهم بصورة صحيحة وخطأ كبير اننا نقلد الغرب السنا مسلمين ولنا عادات وتقاليد تختلف عن عادات وتقاليد باقي البلدان ويعتبرها البعض انها حرية شخصيه !!!! اية حريه التي تجعلنا نقوم بتقليد اناسآ هم اساس في انتشار عدة ظواهر خطيره وتسئ الى سمعة بلدنا.
  • باسم قشوع- فلسطين | 2012-08-18
    إحترامي وتقديري لكل الأراء حول موضوع الشيشة ، ولكن هذة نتيجة من عشرات النتائج السلبية للعولمة،ولكن الأسباب التي تم ذكرها لهذه الظاهرة - الشباب والشيشة- ربما لا تكون كافية حيث أنها  بطبيعتها مبررات أكثر منها مسببات ،فلكل نتيجة سبب ووراء كل سبب عامل أو محفز يؤدي لنتيجة، ولهذا أسمحوا لي أن أطلق على هذه الأسباب جميعها كوكتيل  الحضارات -  والمسكوبة بكأس الديمقراطية والحرية للشباب من وجهة نظر الغرب ، وفي نفس الوقت هناك حشيشة الشعوب المغلفة بالعدالة والحرية وجميعها مزجت بدم وكرامة شعوبنا العربية لكي نتاولها ونسكر ونتمرد على أنفسنا ونحرق الأخضر واليابس من أجل الحصول على كأس مزيف من الكوكتيل كتب عليه حرية.إن الحرية بمفهومها العلمي ليس أن تمارس وتطبق كل ما يخطر ببالك وإنما أن تعرف الحقيقة الموضوعية - واجباتك الشاملة إتجاه نقسك وعائلتك وبلدك ووطنك  - وأن تقوم بها وأن تطبقها على أكمل وجه.الشيشة من وجهة نظري مرفوضة حتى على مستوى الشباب الذكور وليس الفتيات فقط إذا ما كان الهدف منها حب الكوكتيل الغربي المدمر للصحة والأخلاق وللثقافة والحضارة العربية الأصيلة،فبدلاً من التمرد تعلموا وثقفوا أنفسكم أيها الشباب وأبتكروا وأبنوا بلدكم بأيديكم لأنكم ستكونون كمن سبققم سكارى ستطهدون الأجيال القادمة.وكما فعلتم في ثورتكم المجيدة وضحيتم بدمائكم اليس بمقدوركم أن تتركوا الكوكتيل الغربي وتصنعوا كوكتيلكم العربي الأصيل الخاص بكم وببلدكم بما يخدمنا جميعاً!!!!!؟؟

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق