]]>
خواطر :
ما الحياة الدنيا إلا أمواج في مد و جزر مستمر... أرحام تدفع و تراب يبلع...   (بلقسام حمدان العربي الإدريسي) . 

اريس اريس ... نفسى اعيّد فى بيتنا

بواسطة: Walaa Ezz Eldin  |  بتاريخ: 2012-08-16 ، الوقت: 15:31:33
  • تقييم المقالة:

سيادة رئيس الجمهورية

تحية طيبة وبعد ...،

معلش فى كلمتين محشورين فى زورى من ساعة ماسمعت كلام سيادتك فى مرحلة الاعادة والوعود الكتيرة اوى اللى كنت بتوعدنا بيها ... وعلى فكرة صدقناها ... بس انا عارفة المسئوليات بقى، وطبعا "جلّ من لا يسهو" ... فقولت فى عقل بالى كده مفيهاش حاجة يابت لما تفكرى سيادته يمكن نسى فعلا ...
الا بقوللك ايه سيادتك ... ومعلش بقى سامحنى فى انى معتبرة البساط احمدى كده عشان فهمونى ان سيادتك يعنى شخصية شبهنا كلنا كده وينفع نتكلم براحتنا معاك ... ولا ايه؟؟؟!!
المهم مش هطوول عليك ...
شوفت اعلان "صهيبة" ياريس؟؟؟!!

على فكرة "صهيبة" دى مش اسم كومباوند جديد فى التجمع الخامس ولا عصير من اللى خوتنّا فى التليفزيون باعلاناته ... صهيبة دى طفلة صغيرة ... ايوة بنت صغيرة مستغرب ليه؟.
عجبنتى اوى فكرة اعلان الطفلة الرقيقة دى اللى بكل براءة بترد على جملة "نفسك فى ايه؟؟؟!!" بـ "نفسى اعيش" ... جملة قصيرة صحيح لكنها حقيقية اوى ... حقيقية لدرجة الصدمة سيادتك ...
مش عرفة ليه اول مبشوف الاعلان ده وهو بيتكرر ادامى كل يوم  كده ... بتخيل مشهد وكل مرة يتكرر نفس المشهد ادام عنية ... طبعا عايز تعرف ايه هو المشهد ده ... هقوللك
بتخيل واحد من معتقلى الثورة اللى هما يعنى حدث ولا حرج ... العدد فى اللمون ... فجأة كده وبدون مناسبة قرروا يسألوه "نفسك فى ايه؟؟؟!!" ... طبعا ممكن اى حد فينا لو اتسأل سؤال زى ده يطلب طلبات عادية زى واحد من الاطفال اللى فى الاعلان اياه لما بيسئلوه "نفسك فى ايه؟" فيرد "عايز اكل كشرى"  بس انا عشان عارفة رومانسية الشباب اللى فى المعتقلات دلوقتى وحسة بيهم تخيلت انهم هيطلبوا حاجة واحدة بس هى "الحرية" ... فاكرها سيادتك؟؟؟!! ... ايوة الحرية اللى هى المطلب التانى من شعار الثورة اياااااااه فاكره؟؟؟!! ... "عيش حرية عدالة اجتماعية"... يعنى بعد العيشة عايزين حرية ... بصراحة الحرية اتاخرت اوى على انقى واشرف واطهر وانبل واجدع شباب فى البلد دى ...
رسالتى خلصت ياسيادة الرئيس بس بيتهيئلى كده ان كل واحد فيهم نفسه يوصللك رسالة قبل نهاية الشهر الكريم ... شوف كده عايزين يقوللولك ايه؟؟؟!!

انا معتقل من 25 يناير 2011... نفسى اعيّد فى بيتى.
انا معتقل فى احداث البلون ... نفسى اعييد وسط اهلى.
انا معتقل فى احداث السفارة ... نفسى اشوف ابنى.
انا معتقل فى احداث ماسبيرو ... نفسى اشوف ابوية وامى.
انا معتقل فى احداث محمد محمود ... نفسى ابات على سريرى.
انا معتقل فى احداث مجلس الوزراء ... نفسى اشوف نور ربنا.
انا معتقل فى احداث العباسية ... نفسى اصلى العيد وسط اهلى وجيرانى.
انا معتقل من ضباط 8 ابريل ...  نفسى اشوف مراتى وبنتى.
انا معتقل من ضباط نوفمبر ... نفسى احضر فرحى.
 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق