]]>
خواطر :
انساك ! ده كلام ؟... اهو ده اللي مش ممكن ابدا...   (بلقسام حمدان العربي الإدريسي) . 

شخبطة قلم

بواسطة: احمد احمد  |  بتاريخ: 2012-07-11 ، الوقت: 08:02:06
  • تقييم المقالة:

( هى دى مصر ياعبلة )                                                                                                                                                                                                                                                                                                                                 

" احلف بسماها وبترابها .. حاشفط خيرها واسرقها.. و مسك عيالى مناصبها.. بس مش حنسا ارمى الفتافيت لولادها"

 

صدقونى.. حتى ولو كان محمد مرسى اقسم القسم دا يوم توليه الرياسة فوالله الناس مكنتش حتعترض ..

ايوة مش حتعترض..

بل على العكس تماما..

الناس حاترقص من الفرح وحاتزغرد  كمان  .. علشان بس اخر كلمة ف القسم دا واللى هى ( مش حنسا ارمى الفتافيت لولادها)

خلينا نكون صرحا مع بعضنا ونعترف ان المصريين ميهمهومش مين اللى يمسك البلد..

ميهمهمش حايمسكها ازاى..

كل اللى يهمهم بجد هو ان الريس الجديد يخليهم يعيشو كويس..

و ( يعيشو كويس)  دى مش معناها انهم عايزين ياكلو احسن اكل ويشربو احسن شرب ويلبسو احسن لبس ويسكنو ف احسن شقق مع ان دى _ للامانة_ حقوق مشروعة ليهم بيكفلها الدستور والقانون مدام اقتصاد البلد بخير..

لاء..

 

الناس طلباتها ابسط من دا بخير..

 

الناس عايزة تعيش كويس بمعنى انها عايزة تقبض مرتبات تمشيها طول الشهر مستورة ..

الناس عايزة تعيش كويس بمعنى انها عايزة لما ولادها تتخرج تتعين ف وظايف تناسب مؤهلاتهم ودراستهم....

الناس عايزة تعيش كويس بمعنى انها تاكل اكل نضيف مش مسرطن ..

هو دا اللى الناس عايزاه بجد ..

وبعد كدا ميهمهومش اى حاجة يعملها الريس ..

يسرقهم..

يبقى ديكتاتور..

متزمت..

عميل..

كل دا مالهومش فيه مدام حايعيشهم زى ماهما عايزين..

ودا لانهم اصلا عارفين ومتاكدين ان اى ريس حايكم البلد حتى ولو كان بيصلى على سجادة فلازم حاييجى عليه وقت وحايستغل سلطته ف مصالح شخصية ..

حتى ولو مشى كويس سنة او اتنين او تلاتة ففى الاخر حايستغل سلطته ونفوذه باشكال وطرق كتيرة .. لان دى للاسف التركيبة البشرية للمواطن المصرى ..

الانسان المصرى اصلا مستغل للسلطة..

سواء بقى كان ريس..

وزير.. 

غفير..

حتى ولو كان عامل نضافة..

الكل ف الاخر بيساغل سلطته واللى تحت ايده..

واقع للاسف عايشين فيه كلنا..

والناس عارفة كدا كويس اوى..

عارفة اى ريس حاييجى عليهم اكيد حايستغل صلاحيات سلطته ف يوم من الايام  لامور شخصية .. علشان كدا هما عايزين يطلعو منه باى حاجة..

ممكن دا غلط..

سلبية..

جهل..

عدم انتماء..

بس ف الاخر ياريت مننساش ان الناس تعبت بجد والفقر دق عضمها طول ال30 سنة اللى فاتت وخلاص مش مستحملة تانى صبر او معارضة..

الناس عايزة تعيش بجد..

تعيش على اد احلامها وبساطتها..

الناس شبعت كلام..

شبعت معارضة..

30 سنة عايشة ف غلب واحباط وكانت مستعدة انها ترضا بنظام المخلوع وسياسته لو كان اهتم بيهم شوية ومنسيهومش ف عز السرقة والنهيبة .. ودا درس لازم يتعلم منه محمد مرسى واللى حاييجو بعده.. انه اودامهم فرصة من دهب استحالة حاتكرر تانى مع اى ريس ف العالم.. وهى انهم حايمسكو شعب موافق مقدما على اى حاجة تتعمل فيه مقابل انه يتم توفير لقمة العيبش الكويسة له وشكرا على كدا..

الفرصة من دا ..

 

بس مين اللى يقدر؟!

 

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق