]]>
خواطر :
شوهدت ذئاب على أطراف الوديان في فرائس تتحينُ ...مرت عليها البهائم وهي تتعجب... ردت الذئاب على البهائم ، لما العجبُ لولا الفرائسُ لما وُجدت الذئابُ...   (بلقسام حمدان العربي الإدريسي) . 

Pوار بين طنطاوي وشفيق

بواسطة: Ahmed Derbala  |  بتاريخ: 2012-06-23 ، الوقت: 14:08:32
  • تقييم المقالة:

 

 

شفيق: صباح الخير يا سيادة المشير

طنطاوي: أهلا يا شفيق ازيك فينك يا راجل؟

شفيق: أنا موجود أهو يا فندم بس أنت عارف بقى كان لازم نعمل شوية منظرة ودعاية علشان تبان ان الانتخابات ديمقراطية وكدة مع إنى اتهانت كتير قوي يا أفندم من العيال المخربين دول

طنطاوي: ولا يهمك يا شفيق أنت كده كده ناجح وهنأدبهم كلهم

شفيق: والله يا أفندم أنا مش عارف اشكرك إزاي على اللى أنت عملته ده علشان نوصل للنتيجة دي

طنطاوي: دة واجب وطني يا شفيق كان لازم نحمي شعبنا من نفسه ومن اختياراته هو مش عارف مصلحته فين

شفيق: صحيح يا أفندم عندك حق إذا كنا سيبناهم ينقلوا سيادة الرئيس من القصر بتاعه لشرم الشيخ وكمان يصمموا انهم يحاكموه !!.... (يسكت للحظات) دى شيء كتير قوي يا أفندم

طنطاوي: اذا كانوا هم عملوا كده لانهم بينفذوا اجندات خارجية فاحنا مش هنسمح لرئيسنا انه يتهان ابدا مهما حصل

شفيق: أمال إيه يا أفندم الحكم اللي طلع ده؟ ده اتحكم عليه بالمؤبد ودخل سجن طرة ... احنا هنسيبه يا أفندم ولا إيه ؟؟!!

طنطاوي : لا مش هنسيب سيادة القائد طبعا هو الحكم طالع عليه انه معرفش يحمي المخربين وده تقاعس عن اداء المهمه انما مش انه قتلهم وفي النقض هيطلع

شفيق: لسه هنستنى للنقض يا أفندم أنا بزعل قوي لما بشوف رئيسي وقدوتي طوال الخمسين سنة اللى فاتوا بيتعمل فيه كده ... أنا أول ما أفوز بالرئاسة – بفضلكم طبعا- هطلعلوا عفو جمهوري واخرجه فورا وكمان سيادة اللواء حبيب العادلي لازم يخرج ده اللى كان له الفضل في الامن اللى كان بيشيد بيه كل الناس

طنطاوي: (وقد بدى عليه الغضب  إلى حد ما) بقولك إيه يا شفيق أنا مش عايزك تتصرف من دماغك أنا وأنت عارفين انك مخك على قدك ده أنت لما بتيجي تتكلم من غير ما يكون الورق قدامك بتفضحنا وتضحك الناس علينا

شفيق: ( مهمهما بصوت منخفض) ما أنت كمان يا طنطاوي مبتعرفش تتكلم خالص ولما طلعت بعد ما قتلنا المخربين في بورسعيد واتكلمت ارتجالا كده ضحكت الناس علينا

طنطاوي مستفهما بحدة : بتقول حاجة يا شفيق

شفيق: لا يا أفندم أنا كنت بقول أمال هنتصرف إزاي؟؟

طنطاوي : احنا بس نخلص موضوع الانتخابات ده وبعد كده نبقى نسالهم هنعمل إيه!

شفيق مندهشا: نسأل مين يا أفندم ؟

طنطاوي: نسأل الناس اللى حطولنا كل الخطط دي علشان نمنع المخربين امثال ابوالفتوح وصباحي وخالد علي من الوصول للحكم

شفيق : مين دول يا أفندم الل عملولنا كل ده ؟

طنطاوي: أنا عايزك تركز معايا كده يا شفيق ده أنت هتبقى رئيس جمهورية ... الأمريكان طبعا احنا لولاهم كنا زمانا ضيعنا مصر يا شفيق

شفيق: طبعا يا أفندم ودي من الحاجات اللى مطمناني اننا هنكسب في الاعادة ..الدعم الامريكي الكبير ده ..بس فيه مشكلة برضه يا أفندم

طنطاوي: مشكلة إيه خلص ؟؟

شفيق : ان اخواتنا الامريكان ليهم علاقات قوية دلوقتي مع الاخوان المسلمين هنا وده ممكن ميساعدناش اننا نوصل للكم ويفضلوهم هما عننا .. ده وفد الكونجرس عملهم زيارة سرية في القاهرة يوم الانتخابات ... تعرف حاجة عن الزيارة دي يا أفندم ؟؟

طنطاوي : بص يا شفيق أنا مقدرش اتدخل في عمل الولايات المتحدة لا يغضبوا علينا واحنا مش قدهم ..بس أنا عايزك تطمن هم اكيد هيفضلوا الحليف اللى مجربينه على قبل وخدمهم كتير عن واحد لسه جديد بيعرض خدماته على الرغم من دلال خيرت الشاطر عندهم بس هم هيفضلوك أنت ..متنساش يا شفيق اننا معاهم بقالنا اربعين سنه من وقت الرئيس المؤمن السادات

شفيق: يا رب يا أفندم يطلع كلامك صح أنا عملت اللى عليا وقلت ان أول دولة هزورها بعد ما ابقى رئيس هي الولايات المتحدة ومعنديش مانع اني ازور اسرائيل كمان واظن ده هيعمل رد فعل كويس

طنطاوي : هو عمل بالفعل يا شفيق بس أنت اللي مش واخد بالك ..الصحف الاسرائيلية والمسئولين هناك فرحانين بيك لدرجة ان نتياهوو طلب من وزرائه ميعبروش عن فرحتهم بفوزك في الجولة الأولى علشان المصريين ميتأثروش بكلامهم عليك

شفيق: هنعمل إيه بس يا أفندم أنا عارف ان الاسرائيليين مش بيستلطفونا بس لازم نخدمهم علشان محدش يقدر يقف ادام الفك المترس

.طنطاوي: لازم نأمن مصر مخاطر الحروب مع الدول دي

شفيق : بس أنا قلقان برضه يا أفندم من المتظاهرين المخربين دول ..ده أول ما الحكم طلع نزلوا مظاهرات بالملايين في الشوارع ...الناس دول مش هيسكتوا لو أنا كسبت (ثم يكمل وقد بدا عليه الهم ) وأنا بصراحة اتضربت كتير قوي بالجزمة يا أفندم

طنطاوي: ههههههه كان شكلك يضحك قوي وأنت بتضرب ..بس عموما احنا سألنا الامريكان في الموضوع ده والحل هيبقى في تزويد الخناق على المصريين من خلال ازمات البنزين والكهرباء والخبز لحد ما المصريين يكرهوا الثورة خالص وكمان هنزود الفوضى الامنية علشان تبقى أنت الحل الوحيد لعودة الامن

شفيق: طب المخربين دول لو طلعوا تاني هنعمل فيهم إيه ؟؟

طنطاوي : زي ما أنت قلت العباسية كانت مجرد بروفة وده اللى هيحصل مع اي حد يخرج عن الشرعية ..

شفيق مبتسما : والله يا أفندم أنا مش عارف من غيرك أنت وكل الجنرلات ورجال القوات المسلحة ورجالة امن الدولة كانت بلدنا دي وصلت لحد فين

طنطاوي: مصر غالية علينا يا شفيق وكان لازم يبقى فيه حد يحميها م اي خطر

شفيق: ربنا يبارك فيكوا يا أفندم ..أنا هستأذن أنا بقى .

طنطاوي : ماشي يا شفيق ...في امان الله

شفيق: في امان الله ...

 

 

A .A.Derbala

 

 

 

 

 

 

 

 

 

 

 


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق