]]>
خواطر :
رغم إني أخاف من الغرق ، عقدة تلازمني منذ الصغر...أتمنى الغرق في بحر ذكرى هواك...   (بلقسام حمدان العربي الإدريسي) . 

الاتحاد الدولي للبلي

بواسطة: أحمد محمدي  |  بتاريخ: 2012-05-30 ، الوقت: 18:06:49
  • تقييم المقالة:
* بمناسبة توقف النشاط الكروي حاليا بفكر أعمل مسابقة للبلي علي المستوي المحلي الأول وبعدين الفكرة تكبر بقي ونعمل أولمبيات وكاس عالم كمان تحت شعار " لو بتعرف تلعب تعالي هانعملك ملعب " & " لو كنت حريف تعالي ع الرصيف " & " اللي هايكسب في البلي ليه وجبه كنتاكي " بس بصراحة محتار في نوع المسابقة ياتري أعمله " بلي مسافات طويلة " ولا " بلي حفر عميقة " وبعد ما أحدد النوع اللي هايتم البدء بيه وبعد كده نتوسع هايبقي في مشكلة إن مجلس الشعب مش هايوافق والأعضاء مش هايتخانقوا ولا حاجة والريس ها يحسم الموضوع من قبل ما يبتدي وهايقولنا إن اللعبة مش موجوده في اللائحة وتموت الفكرة من قبل ما تطلع للنور . بس طبعا لكل مشكلة حل وزي ما الفكرة عبقرية حلها برضوا هايبقي عبقري ، إحنا ناخد شوية لاعيبة محترفين في البلي اللي هانحدده ونروح رايحين وكأننا هانعمل إعتصام قدام المجلس القومي للرياضة وهايبقي الهتاف " سلمية سلمية دا البلي ليك وليا " & " الشعب يريد لعبة البلي " ونخلي اللعيبة تلعب وأهو الموظفين يتسلوا وهما قاعدين بعد ما يخلصوا الجرنال وقبل ما الإعتصام يقلب نروح طالعين بمطلبنا وناخد الموافقة منهم ونروح رايحين نفس الكلام قدام أعضاء مجلس الشعب بس مش إعتصام إحنا نهتف ونلعب وهما في البريك وساعة الصلي نقيم الصلاة ونصلي وطبعا خانبقي لابسين هدومنا كلها ومغطين كل العورات وإن شاء الله ناخد الموافقة . أول خطوة بعد لما ناخد الموافقات ونحدد نوع البلي اللي هانلعبة نطالب بمراكز شباب مستقلة تابعة لاتحاد البلي اللي هايبقي منتخب انتخابات حرة ونزيهة وهاكون أول رئيس إن شاء الله وطبعا هايبقي ليا سلطات وصلاحيات وضع اللوائح والقوانين داخل اتحاد اللعبة وطبعا كله بإرداة الجمهور والأعضاء ونعمل أول إستفتاء علي تغيير اللوائح والقوانين ونظبط كده كام لوحة مع كام لافته مع ورق مطبوع ونكتب فيه " نعم مع الله " & " علي شان هوية الاتحاد الإسلامية " وطبعا الناس لسه مش عارفة حاجة عن اللعبة والحمد لله الناس متدية وبكده أضمن نتيجة الإستفتاء وهابقي حر بقي في وضع القوانين اللي عاوزها لأن كل حاجة هاتبقي في إيدي بعد الإستفتاء وكله بإرداة الجمهور وأحب أفكر القلة المندسة إننا في مراكز الشباب ولا هايبقي عندنا قناصة ولا خرطوش وماتحاولوش تخرجوا عن الشرعية اللي اختارها الجمهور .  وطبعا لازم نظبط لأول جلسه لأنها هاتبقي تاريخية لأنها هاتضم جميع اطياف الأمة " السلفيين و الإخوان والعلمانيين والليراليين والاناركية والشباب – آه والله هايبقي في شباب ما تخافش – وطبعا النصاري والفلول واللي مش عارفين أي حاجة ورابطات الأولتراس " وبمناسبة رابطات الأولتراس أو الألتراس هيبقي الكابو بتاعهم صحبي جدا والشق بتاعي كمان علي شان أبقي متحكم فيهم أقوله يمين يمين شمال شمال منا مش ناقص وجع دماغ وطبعا ولأني جاي بإرادة الجمهور يبقي ما يبنفعش أمشي غير بإرداة برضوا يبقي قبل ما أمشي أعمل إستفتاء وطبعا النتيجة هاتبقي معروفة " إني أكمل " بس آلية الإستفتاء المرة دي مش مجهزها بصراحة علي شان مش وقتها علي شان المهم دلوقتي الجلسة الإفتتاحية اللي هابقي الرئيس بتاعها برضوا وهاخلي كل واحد يحلف اليمين واللي هيخالف أو هايزود هاحدفة بالبلي في عينة – مش رئيس إتحاد البلي وليا صلاحيات بقي – وطبعا قبل ما أفتح باب الترشيح لرئاسة الإتحاد هاطلع قائد الأولتراس لأنه مش طمعان في مناصب والأهم إنه الشق بتاعي يمسك هو الإنتخابات اللي هانجح فيها طبعا وهابقي أول رئيس منتخب لإتحاد البلي في انتخابات حرة ونزيهة . * لو عندك فكرة جديدة تخليني أفضل محافظ علي منصبي ما تبخلش عليا ، وحتي لو بعدت عن منصبي وعندك فكرة جدية برضوا ما تبخلش عليا هاستني إقتراحاتك
20/2/2012

A_mohmady@yahoo.com


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق