]]>
خواطر :
انساك ! ده كلام ؟... اهو ده اللي مش ممكن ابدا...   (بلقسام حمدان العربي الإدريسي) . 

قبل السلام

بواسطة: مدحت الزناري  |  بتاريخ: 2012-05-11 ، الوقت: 22:44:01
  • تقييم المقالة:

 

قبل السلام

شعر/ مدحت الزناري

 

 

قبل السلام والكلام

ذكر النبي يحلى

ذِكره يشق الضلام

  وينور الرحله

كالبدر ليلة تمام

نور النبي أحلى

 

       *****

برمي السلام ع العتب

وامسح على بابك

واشم عطرك نسيم

والمِسك جلبابك

يا طهرة يا سيدة

 والكل أحبابك

 

        ******

برمي السلام ع العتب

والدمع فوق الخد

 

وأنتِ مداين  جناين

     ورد ما يتعد

 

لمي فروع الشوك

يمكن أطول الورد

 

 

        *****

يا مصر يا علّتي

يا محيره أطبا

يا كتاب عجيب لغوته

  تصعب على الأُدبــا

حُبك ف قلبي وجع

  يا غُربة  يا كُربه

 

         ******

شقيت ضلوع الهوا

        ومسكت فستانك

قلبي المحب اتكوى

        من جمر بُستانك

والدمع واحنا سوا

        يرخص علشانك

 

        *****

على أيه بتتعللي       

بالصبر يا بلدي؟

فين النهار ينطلق

ويجيب معاه مددي؟

وإن قلت آه للمحن

شديني يا سندي

 

*****

جوايا خوف الرضيع

        لما تفوته أمه 

وف سكة تانية يضيع

        وتزودي همه 

وأنتِ ليالي الحنين

        سيالة في دمه

 

        *****

أهرب بقى يامصر

      فيــن منك

وكل حتة  محبة

   تخبرك عنك

قلبي مؤشر حنين

        مظبوط على سنك

        ****

والعمر قاعد على القهوة

       ف باب الخلق

يشرب ف شاي الذكرات

    اللي مليها الخلق

سكر محبة لجل ما

يقدر يفوت ف الحلق

          ******

يا نخلتين ف العلالي

والبلح ممنوع

في ناس تزيد في التعالي

وناس تموت م الجوع

الكل قالك ومالي

وهو ده الموضوع

          ******

 

عايز اقولك بحبك

اقولها هس هس هس

أقولها دافية وصادقة

إحساسي ما يوسوس

اقولها واضحة وسهلة

وصوتي متحمس

          ******

لو كنتي غالية عليا

كنت اقولك لأ

وكفاية كدب وملاوعة

نفسي اقول الحق

يا أعلى حيطة مخيفة

ف كل طوبة شق

          *****

 

قلبي يقبّل يبحر

عمره مامال غربي

ولساني ينطق فصاحة

والنبي عربي

دلوقتي شايف وخايف

باين ومتخبي

          ****

زهر الجناين بشاير

والهوى عنقود

ابكم وأعمى وحاير

كل شيئ محدود

رغم الغيطان والعماير

ليه الأمل مفقود

          *****

عارفك وكاره وبايع

بس بأنسى قوام

وألقى زحامك ف قلبي

وتجيني في الأحلام

واسرح في بكره معاكِ

والهوى أوهام

          *****

 


« المقالة السابقة ... المقالة التالية »
  • طيف امرأه | 2012-05-12

    لمصر تحية إخلاص ومحبة ..ولاوطاننا الممتدة إسلاميا وعربيا

    تحية ودعوتي ان تستفيق  الأمة  وتعيد لملمة شعاثها .. نعيد المجد لا نتغنى به , نعيد الشهامة والكرامة لا نبكي على أطلال

    فقد طال النوم واستأثر الفكر المظلم علينا وغطونا يثياب الجهل رغم ادعاءنا  أننا متعلمين نفقه كل ما يجري ويحصل ويحدث

    لمصر ولكل المسلمين .. أفيقوا فقد  أكلنا  و صرنا مهزلة الشعوب ألا تدركون ؟؟! 

    بورك بكم استاذي ..تحية إجلال وتقدير وتمنياتي لمصر ان يستفيقوا ويتحدوا لتعودوا قمة كما نريد ,,مسلمين لا فراعنة وقوميات وطوائف

    بورك بكم وبما تكتبون من خير

    طيف بتقدير

    • مدحت الزناري | 2012-05-12
      تحية وإعزاز وتقدير لك أختنا الغالية طيف لا أملك إلا أن أرفع يدي قائلا آمين
      لن نفقد الأمل ما دام يسري في العروق نبض ويتراقص الحلم في جفوننا ؛ فكم من عصور أسود من الغرابيب مرت وانجلت وبقيت الأمة والله قادر على ان يبدل الحال وهذه سنته ((ولن تجد لسنة الله تبديلا)).. ((إن بعد العسر يسرا))..
      إن مرورك الكريم و تفاعلك يؤكد لي أن الأمل مازال موجودا وأن معين الوعي لن ينضب ... تحياتي

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق