]]>
خواطر :
انساك ! ده كلام ؟... اهو ده اللي مش ممكن ابدا...   (بلقسام حمدان العربي الإدريسي) . 

ما تخفيش

بواسطة: مدحت الزناري  |  بتاريخ: 2012-05-10 ، الوقت: 09:46:58
  • تقييم المقالة:

ما تخافيش
يا صاحبة العشة
يا اللي بنيتي معايا بيتنا
قشه قشه
ياغاسلة توبي بالمحبة
وكانسه حزني
بالمقشة
وسامعه صوتي

والزعيق
زي هيش البحر
منه تروحي حشه

والديابة أما تعوي
تقربي وتطبطبي
و تروحي هشه
فاطمني واسلطني
وف صحن قلبك
فتفتيني وشرّبي
قلبي اللي ياما
فى ليالي الحلم
شالك
فاكر حجاتك كلها
عقدك وشالك
وعشان حبيبك النبي
خليك منك
واخده بالك
لكن عليّ يا حبيبتي
ما تخفيش
رغم أن القلب أخضر
والمخالب مش بتظهر
لكني قادر لسه أعيش
فارد جناحي وعندي ريش
فما تخافيش

 مش قادر أحكي كل حاجة
علشان عنيهم ما انت فاهمه
 كل حاجة
اللي ما تخافش الرصاص
واديك ماسكه أدين ولدنا
بتحركي القلم الرصاص
والضحك ساعة التمثلية
ريحة السمك وقت القلية
لمعة العين السعيده
بعد ما تشوفي القصيده
لما نجيب حاجة جديدة
لما ينجح ابننا في الامتحان
حتى زنك ع الودان
بافتكره واضحك
والكوارث والقزاز
منتخبنا يوم ما فاز
واما يحرق دمي جاز
يوم تمانيه معدش منه
والمرتب كله طار
دمعه مش قادره تادريها
لما اجيب سيرة المطار
كل حاجة يا حبيبتي بنا حلوه
احلى مره سمعت صوتي
لما قلتي معايا غنوة
لسه بأسمع رنة العود في الودان
لسه بأسمع نفضتك وقت الآدان
لسه بأشرب سلسبيلك
وارمي نفسي ف حضن نيلك
وكل ليلة قبل ما انعس
حاجة جوه القلب ترقص
واقرا ورد النوم واقول
الله أكبر من عنيهم
يحمينا ربي م اللي فيهم
ما اطلبش حاجة
غير انه يستر عشنا
بلحاف وحيط
وغموس وعيش
ومدام معانا
يا حبيبتي ..
ما تخافيش
ـــــــــــــــــ
10/5/2012


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق