]]>
خواطر :
الحياة الدنيا مثلها امرأة ، تراها من بعيد جمالا براقا لتكتشف أن كل شيء فيها مصطنع ... من رموش العين إلى احمرار الخدين والشفتين إلى طاقم الأسنان الناصع البياض...   (بلقسام حمدان العربي الإدريسي) . 

طلقنـــي يـــا سيــــد!!!(الحلقة الحادية عشر)

بواسطة: Fairouz Attiya  |  بتاريخ: 2012-04-25 ، الوقت: 17:49:00
  • تقييم المقالة:

و تتابع رقية كلامها له بحماس شديد:

- وبعدين يا سيد الحكاية مستاهلة برضوا , إنت مش شايف العالم بتقتل في بعضها إزاي يا خويا عشان المريسة؟؟؟

- بتقتل في بعضها ليه يعني؟؟؟ دي مسئولية كبيرة يا روقة , ما إنتي بذات نفسك قلتيها رقابي ناس و هتكون متعلقة في رقبتي يا بنت فكرية يبقي العالم هتقتل في بعضها ليه بقي؟؟؟؟

-ما إنت مش عارف يا خويا, أنا أقللك:  شوف يا سيد, إنت فاكر الحكاية كلها هتكون صعبة يا خويا؟؟!! لأ طبعا في أولها بس , بس يا سيد أول ما ترسي عليك الشغلانة يا خويا  و تستلم كدة و يحلفوك إنك تاخد بالك من البلد و من ناسها الغلابة دول و من مراتك حبيبتك حبة نور عينيك اللي ساعدتك و فتحتلك طاقة السعد دي يا سيكة هتقوم كدة يا خويا و تستلم البيت بمفتاحة (ينظر لها مندهشاً) أة أُمْال إية يا سيد!!! لهو إنت فاكر يا سيد إنك يا خويا هتحكم مصر من فوق السطوح يا خويا؟؟!!! لأ يا سيد, دي عالم كلها نظر برضوا و مفهومية, هيروحوا يا خويا يدونا ( أنا و إنت طبعاً يا سيد, مش الريس و حرمته) بيت بحديئه يا سيد, اللي هناك دا عند محطة المترو يا خويا , أة تلاقية كدا ييجي بتاع أربع خمس غرف بمنافعهم يا خويا, لأ و كمان إية يا واد يا سيد يا مريسة إنت , عربية بسواق يا ولا ( يبتسم سيد و يرتاح في جلستة متخيلا نفسه في وضعة الجديد راكبا سيارة بسواق ) و هنقول وداع للمكروباز يا سيد, حتي تاكس مش راكبين, أة يا خويا ماهو المهية هتخليك تعرف تاخد تاكسي يا سيد لو العربية عطلانة يا خويا ولا حاجة, ولا لو أنت معاك العربية و انا حابة أروح أزور أمي ولا هنا و لا حنا ممكن يعني أبقي أخد تاكسي يا سيد.

- أيوة بدينا البعزقة يا رقية!!! تاكسي يا بنت فكرية؟؟!!! إنت عارفة التاكسي من القبة للشبرا ممكن يا خد كام يا بنت سعيد؟؟؟

- ياخد اللي ياخدة ياخويا بقي أة , خلينا نتبحبح يا سيد يُهه!!! إحنا ياخويا هنفضل شايلين هم للدنيا لغاية إمتي؟؟؟؟ و بعدين يا سيد لهو إنت فاكر إنك هتفضل مرتبك 600 جنية عُمي ولا إية؟؟؟؟ لأ يا سيد إصحي معايا أُمْال, دا إنتي علقليلة عالقليلة كدا ممكن تطلعلك بست سبع تلاف جنية في الشهر, و يمكن في الاسبوع يا سيد, إنت يا خويا مش شايف الناس حواليك عاملة إزاي كلة مرشح و هيموت عالشغلانة!!!؟؟؟ بقي يا سيد لو هيه صعبة ولا فيها مسئولية زي ما إنت بتقول كدة كت الناس قتلت روحها عليها كدة؟؟؟!!!!

- والله عندك حق يا بت روقة!!!!

- وبعدين يا خويا حلاوة المريسة اية بقي, إنك يا خويا هيبقي عندك مساعدين, أة ولا هتمد إيدك في جنس حاجة, وزرا يعني يا خويا, و مش بس وزرا, لأ و غفرا كمان, كل واحد عليه شغلانة يا سيد و كل واحد يعمل اللي إنت تقول عليه ولا يتنفس إلا بأمر منك يا سيد, إية يا خويا إنت مش فاكر ولا إية, طب دا حتي شرب الشاي كان بيبقي بتوجيهات سيات الريس يا خويا!!!!

دا غير بقي يا سيد يجيي الصيف و تتحر كدة يا خويا و تبقي مش طايق الهدمتين اللي عليك نطلع علي مصيف راس التين, ييجي الشتا و البرد يلفح قفاك يا سيد ولا مؤاخذة يا خويا نطلع علي شرم الشيخ و نعيش بقي يا سيد!!!!

(إبتسم سيد لكلامها و بدا عليه أنه إتخذ قرارة الأخير)..... 


يتبع.....


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق