]]>
خواطر :
إذا سمعت عويل الذئاب...يعني ذلك ، إما في المصيدة تتألمُ أو في الغنائم تتخاصمُ...   (بلقسام حمدان العربي الإدريسي) . “كلا – كلا ! لا ظلام في الحياة وإنما هي أنظارنا الكليلة التي تعجز عن مرأى النور في أبهى مجاليه(مي زيادة )   (طيف امرأه) . 

طلقنـــي يـــا سيــــد!!!(الحلقة الثامنة)

بواسطة: Fairouz Attiya  |  بتاريخ: 2012-04-20 ، الوقت: 17:52:50
  • تقييم المقالة:

فاكر يا سيد لما كنت تحب ترتاح يا حبة عيني, كنت تجيني كدة و تحط راسك علي رجلي و شعري كدا يا خويا , أيام كدة ما كان في صحة يا خويا وكان لغاية كعبي (فينظر لها سيد لينهاها عن هذه المبالغة) يعني يا خويا مش كعبي كعبي بس يعني لغاية كدة نص ظهري (يكرر النظر إليها) يوة يا سيد بقة !!! أهو يعني كان طويل بقي والسلام, عديها بقي يا سيد و متحبكهاش, بس يعني يا خويا كان يبقي كدة شعري مضلل عليك و انت نايم علي رجلي , وتقولي مش إحنا يا بت يا رقية جعانين و كحيانين و شحاتين و حالتنا بالبلي (ينتفض من مكانة و يعيد النظر إليها فتعيدة بحنان و تهدئه) , يعني يا خويا القصد ضاربنا السلك و حالتنا عدم, بس يا بت يا رقية و أنا نايم النومة دي علي رجلك الطرية دي اللي زي الملبن (يقاطعها مراجعاً: رقية!!!) المهم يا خويا المهم يعني, و شعرك دا يا بت يخربيت حلاوتك بيضلل و يهفهف عليا , بحس يا بت كدة كأني و زير ولا حتي ملك , وعندي عزبة كبيرة قوى و قاعد متنغنغ في العزبة تحت العنباية, أة والله يا خويا, فاكر يا سيد؟ (تسألة و تنام هي بدلال علي رجله و يسرح هو في كلامها و هو يتخلل شعرها بأناملة)  فاكر يا رقية فاكر (مستسلماً للذكريات الناعمة التي زجت بها في طريقة) يا سلام يا سيد!!! طب والله إنت كان عندك حق يا خويا, هوة الواحد يعني يسوي إية من غير حد يحبه كدة و ياخده في حضنه و يشرب معاه الشاي يا سيد؟؟؟   (فتهب هي مسرعة لتستغل الفرصة و تسألة بحماس) أعملك شاي يا خويا؟؟؟ فيعيدها بيدة بحزم إلي نومها علي رجله ويبادرها: لأ يا رقية! مش عايز شاي , إتهدي بقي شوية يا بنت فكرية, بقي حد يضيع اللحظة الحلوة دي عشان كباية شاي يا بنت المجنونة؟؟!!! فتعود بإستكانة للنوم علي رجله و تغمزه: لأ يا خويا خلاص بلاش, بلاش شاي يا سيد, بدام اللحظة واصلة حلاوتها من غير شاي يبقي بلاش شاي يا سيد, وأهو حتي نوفر شاي و سكر يا واد يا سيد يا مسكر إنت. (و توكزه بدلال فيضحك كلاهما و هما في غاية الانسجام) ياسلام يا ولاد!!! دا أتاري راحة البال دي حلوة قوي يا سيد. صح يا بت يا رقية والله يا سلام يا خويا كدة لما نبقي أنا و إنت كدة قاعدين سوا رايقين و فايقين و مهيصين ولا شالين للدنيا هم, ييجي معاد الغدا نلقي المشمر و المحمر جايينا لغاية عندنا , والحلو كمان ياخويا أُمْال إية؟!!, و ييجي وقت العشا يا خويا نلقي السفرة إتمدت قدامنا كدة أشكال و ألوان, و نحتار كدة يا خويا ناكل إية ولا إية, ولا الفطار, فطار كدة من بتاع ولاد الزوات يا سيد, إشي لانشوم, و بيض, وشاي بحليب يا سيد.....  حيلك حيلك حيلك!!!! بلاش تدوسي قوي كدة يا رقية لتلبسي فالحيط,  إية دا كلة يا بنت فكرية؟؟؟ تريقة دي ولا معايرة يا بت ؟؟؟ لا يا خويا والله أبدا, (فتقسم بحرارة و تصميم لتنفي عن فكرة أي نوايا مغرضه) والله ولا جه علي بالي و لا كان لي في خاطر ولا مر في سرايير نيتي يا سيد, يا ختي!!! بقي كدا يا سيد!؟؟؟أعايرك يا واجع قلبي!!! يوة قصدي ينوجع قلبي يا خويا لو جه علي بالي أعايرك يوم يا سيد, إخص عليك و علي أصلك يا سيد!!! كدة تفكر فيه التفكير البطال دة يا خويا, وأعايرك ليه و علشان إية و بأمارة إية يا سيد؟؟؟!!! هوة أنا يعني إللي جاية من قصر القبة ولا ساكنة الزتون يا سيد!!! ما الحال من بعضة يا بن حارتي, والهم ماهو مبيت في حضني قبل ما يطول ديل بنطلونك يا سيد, يا سلام, بقي كدة يا سيد؟؟!!! خلاص يا روقة حقك عليه يا بنت الناس!!! (يتأثر بكلامها و يخجل من نفسه و يبدأ في محاولة مستمية لتطيب خاطرها و إرضائها و لكن دون جدوى) والله إخص عليك يا سيد , لأ يا سيد لأ زعلتني!

  

 


يتبع......


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق