]]>
خواطر :
قالوا الصبرُ علاج للآلام... فزادت صبرُ السنين للجراح آلاما...   (بلقسام حمدان العربي الإدريسي) . 

طلقنـــي يـــا سيــــد!!!(الحلقة الثانية)

بواسطة: Fairouz Attiya  |  بتاريخ: 2012-04-12 ، الوقت: 17:35:34
  • تقييم المقالة:
دا حتي الكشري بقي يوحشنا يا راجل!!!يارب بس أعمل إيه؟؟! إحترت معاك!!! لو جيت كدا ساعة العصاري أناغشك و أدلع فيك و أنا جايبالك كباية الشاي المظبوط كده بتلهلب في إيدي, تقولي إبعدي عني الساعة دى يا رقية, أنا مش شايف قدامي ولازم أريحلي الساعة دي قبل معاد الشغل التاني يمكن حضرتك في يوم تعرفي إن الدنيا فيها حاجة تانية غير الفول والعدس والبصارة....بدل ما إنت بتعايريني كدة كل ساعة والتانية يا رقية, أعملك إية و أجيبلك منين؟؟ماهو دا اللي علي قد فلوسك.....مش كده ولا أنا غلطان يا رقية؟؟؟ - خلاص يا خويا حقك عليه, أنا اللي غلطانه و بنت ستين كمان بس و حياتك عندي متزعل يا سيد. - أنا زعلت و خلصت يا رقية سيبيني بقى إنشالله أطق و أموت خليني أرتاح شوية يا ولية إنتي!!!! -  طب والشاي يا خويا؟؟؟ - شاي إية يا وليه إنت هو دا هبل ولا غباوة؟؟؟ - غباوة يا خويا و غلاوتك والله. - يبقي إنسدي يارقية وما تطلعيش ضغطي أكتر من كده و تزودي حسرة قلبي وسيبيني أنام في همي. - حاضر حاضر , حاضر يا خويا , نام , نام يا سيد, نام و إرتاح يا خويا و إنشالله أنا اللي أطق و أموت يا خويا.

و كنت أسيبك تنام يا سيد و أنا نصي ضغط و نصي نار , و أقعد كده أبحلق فيك و إنت نايم و أشرب كباية الشاي بحسرتي زي الجعان كدا ما بيبحلق في عربية الحاتي ويعض علي رغيف حاف, لغاية لما أتهد و أروح في النوم أنا التانية كمان, وبعدين تصحي يا خويا متصربع و ملهوف عشان إتأخرت زي عوايدك علي معاد المحل, تخبط و شك بشوبة مية بسرعة, و تحط نفسك جوة أي قميص و بنطلون, و تنط جوة أي جزمة يا خوية ولا مؤاخذة وتطلع تجري عالسلم زي المجنون, أجري وراك زي الهبلة و أقولك نسيت الشاي يا سيد!!! تقولي تنساكي رحمة ربنا يا بعيدة مش تفكريني قبل ما أنزل, لازم كل يوم أطلع و انزل مرتين , مع إنك عمرك ما رجعت تاخدة يا خويا, إشربيه إنت يا رقية, حار و نار....و أشربه أنا يا سيد....كل يوم بشربه يا سيد......ولا يوم عرفت أخليك تشربه يا خويا.....ولو فكرتك بيه قبل ما تنزل تقولي مافيش منه نصيب يا رقية, إشربيه إنتي, مني ليكي يا بنت المحظوظة....وبرضو أشربه أنا يا سيد.....ليه كده بس يا سيد؟؟؟ انا عملتلك إيه  بس؟؟؟  


يتبع........


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق