]]>
خواطر :
انساك ! ده كلام ؟... اهو ده اللي مش ممكن ابدا...   (بلقسام حمدان العربي الإدريسي) . 

ع القهوة ديه

بواسطة: مدحت الزناري  |  بتاريخ: 2012-03-22 ، الوقت: 20:20:53
  • تقييم المقالة:


 

 خمسين سنه
قاعد .. هنـــا
ف الناحية ديه
ع القهوة ديه
وف ايدي ديه
الشيشة ديه

عمَال دماغي يلف..

يتمرجح ما بين يمين وشمال
زي الجريدة ف نخلة..

زي الحمل فوق شيال
زي الضفاير على ضهور البنات
والحلبة ف الكوبايه
حتى الزمايل معايا
قاعدين هنا ويايا

ف الناحية ديه
على القهوة دي
وهي دي الأحوال

تخرج سناني الصفره من تحت القفص
ويترعش كرشي المحشر ف القميص
واضحك بُكا لما تزيد الفزلكا
لما الكلام اللي يودي الحبس يكتر
واللي ما غير نملة من تحت الجدار
واللي ما أحدث أي حالة دربكة
صابر واحب الصابر اللي عمره مرة ما اشتكا
وصحيح مفلس.. بس احب الأنتكا
واكره مراتي لما تزود ف النكد
واكره قوي لما تكتر رغيها
حولين حاجات مطلوبة لازم للعيال



الكورة حلوة يا جدع
بألعن أبو الحكام براحتي
وانجعص زي أجدعها جدع
وأرجع الكرسي اللي تحتي
وأشتم اللعيبة و الجمهور واشلت
و ف أي حاجة تخصها تلاقيني بأفتي
حتى الحكومة تحبها
يمكن تكون هي الوحيدة
اللي تساع العربجي جنب الوزير
من غير فوارق راس .. براس
حاجة أمتع م الخيال

 


ع الحالة ديه كل يوم
والرغي نفس الرغي ولا يخلفش يوم
لحد ما ندهوا عليا..
وساعتها شفت النور بيشرق من كلامهم
والحقيقة كلها من بين أديا
والكرامة والرجولة والشهامة والبطولة

كل دوله شفتهم  ..

وسألت نفسي ابقى مين جنبهم؟
 ياه د انا صغير .. صغيربالقوي
وحمار وتافه..
كل حاجة واي حاجة بالقوي
ومشيت وراهم للميدان
وعرفت إن الخوف جبان
وفضلت قاعد ديدبان
لحد ما اتشال المقرفص فوق صدورنا
لحد ما سمعت وداني الجرس و يا الأدان



معقول يا ناس
 أول م ربك ينصفك
ترضى لننفسك تخسفك
حبة بدل صفره
وتعمل كل ساعة ميت مؤامره
معقول يا خلق يا اللي ف العتبه وباب الخلق
ياللي واخدين مكروباص بينادي شبرا
 

يا اللي في البلكونة والشباك
ياللي غاوين ارتباك
يا ولاد اللذينه
لسه كده راضيين
باللي يقرطسكو ف راسكو
لسه كده قاعدين
ف الناحية ديه
على القهوة ديه

وف ايدكو ديه
 الشيشة ديه
 بقى هي دي الأحوال؟؟؟؟

ــــــــــــــــــــــــ
مدحت الزناري


« المقالة السابقة ... المقالة التالية »

» إضافة تعليق :

لكي تتمكن من التعليق يجب عليك تسجيل الدخول
البريد الالكتروني
كلمة السر  
او يمكنك الدخول والتعليق عن طريق فيسبوك او تويتر
 انشر التعليق على حائطي في فيسبوك او على صفحتي بتويتر
علق مع فيسبوك       الدخول عن طريق تويتر
او يمكنك التعليق بإستخادم اسم مستعار
اسمك المستعار:
آضف تعليق